Диссагыл дис ничиуал кæны, æндæра дæхи цæсты къала бæлас дæр ма уынай, искæй цæсты та æрду дæр уынай… Ноджы ма йæ зæгъон артистизм æмæ мæнг ныхæстæ кæнынмæ дунейы гуырдзиаг адæмæй рæвдздæр ничи у. Æндæра дæхи бæстæйы адæм уынгты мæгуыргур рацу-бацу кæной æмæ æндæр паддзахадæн та гуманитарон æххуыс бакæныны тыххæй дзурай. Дыууæ къуырийы бæрц Зæрæмæджы таможнæйон пунктыл хуссарирыстойнаг амалиуæггæнджытæн сæ товартæ ласынæн цахæмдæр ныхдуртæ кæй сæвзæрд, уый фæдыл Гуырдзыстон цъиувæдис кæны дунейы алы организацитæм.
Дзыллон информацийы фæрæзтæ куыд хъусын кæнынц, уымæ гæсгæ ацы бонты Гуырдзыстоны президент Саломе Зурабишвили фыстæджытæ арвыста Æнæниздзинад хъахъхъæныны дунеон организацийы генералон директор æмæ адæймаджы бартæ хъахъхъæныны фæдыл ИНО-йы уæлдæр къамисармæ.
Уый дунеон æмæхсæнады хъусдард здахын кæны Хуссар Ирыстоны цæрджыты уавæрмæ, цыран, зæгъгæ, аптекæты нал уадзынц гуырдзиаг æвзагыл фыст цы препараттæ ис, уыдон уæй кæнын. Йæ фыстæджы дзуры Гуырдзыстоны «оккупацигонд хайы» уæззау гуманитарон уавæры тыххæй. «Оккупацигонд» Хуссар Ирыстоны цæрджытæ, уæлдайдæр та пенсиисджытæ сты уæззау уавæры. Бирæтæ сæ хъизæмар кæнынц хроникон низтæй æмæ сæ æппынæдзух хъæуы медикаменттæй хос кæнын», – фехъусын кодта Зурабишвили. Афтæ ма Зурабишвили æрсидт дунеон организацитæм, цæмæй сæ хъусдард аздахой Хуссар Ирыстоны хæлцадон дефицит кæй сæвзæрд, уымæ. Загъта, зæгъгæ, дам, Гуырдзыстон цæттæ у Хуссар Ирыстонæн гуманитарон æххуыс бакæнынмæ.
Хуссар Ирыстоны уынгты цæрæнбонты мæгуыргур никуы ничи федта, фæлæ Гуырдзыстоны, æгæрыстæмæй, сывæллæттæ дæр мæгуыргур куы рацу-бацу кæнынц… Гуырдзыстоны æддагон хæс у 17,2 миллиард доллары, уыимæ ис фæсарæнты финансон дæлбарады бын. Бонæй-бон фылдæр фæсарæйнаг компанитæ сæхи фидар кæнынц экономикон æмæ финансон фадгуыты. Гуырдзиаг зæхкусджытæ тæссаг фыны дæр никуы ахъуыды кодтаиккой æмæ сæ бæстæйы сæйраг хъæздыгад – хъæздыг зæххытæ Инди, Китай æмæ æндæр бæстæты амалиуæггæнджыты къухты уой.
Гуырдзыстоны президент Саломе Зурабишвили йæ фындзы бын цытæ цæуы уыдон куынæ уыны, уæд æй цы хъæуы Хуссар Ирыстонæй. Хæдбар Республикæ Хуссар Ирыстонмæ цы гуманитарон æххуыс æрбарвитынмæ хъавы, уый байуарæд йæ бæстæйы мæгуыртыл. Хуссар Ирыстоны æххормаг ничи у, нæдæр хæлцадон продукттæй фæцух стæм. Стæй дæр, сыдæй куы мæлæм, уæддæр нæ не знæгтæй ницы хъæуы. Кæд ныл фæзæрдийæ сты, 2008 азы сабыр цæрджытыл пайда кæныны бар кæмæй нæй, ахæм кассетон бомбæтæ куы калдтой, æппындæр куынæ ауæрстой марыныл, фæнды сывæллон уыдаид, фæнды сылгоймаг, уæд. Цæмæннæ йæ æмбарынц, Хуссар Ирыстоны Гуырдзыстонæй æппындæр кæй ницы хъæуы, уый. Хуссар Ирыстоны оккупацигонд территори куы хонынц, æмæ сæхицæн ныфсытæ куы æвæрынц йæ раздахынæй, уæд æй цæмæннæ æмбарынц Хуссар Ирыстоны Гуырдзыстоны дæлбар кæй никуыуал уыдзæн, уый. Хуссарирыстойнаг цæрджытæ уый бæсты равзардзысты мæлæт.
Иннæ ахæм Гуырдзыстоны Парламенты вице-спикер Гия Вольский фыссы: «Хуссар Ирыстоны Уæрæсейы архайдтытæ здæхт сты уымæ, цæмæй регионы мауал баззайа бынæттон цæрджытæ. Уæрæсейæн Цхинвалы регион у æфсæддон полигон. Мæскуыйы политикæ здæхт у, цæмæй ссæрибар кæной регионы адæмæй æмæ уым фылдæр бынат баззайа æфсæддон полигонæн». Ацы рæнхъытæ кæсгæйæ, адæймаг ахъуыды кæндзæн: сæ ныфыссæг у бынтон сæрхъæн. Стыр Уæрæсе ирон адæмы никуы ауæй кодта æмæ бахъуыды рæстæджы та алыхатт дæр нæ фарсмæ сты. 2008 азы августы хæсты рæстæджы дæр ирон адæмы бынтон скуынæг кæнынæй бахызта Уæрæсе. Æмæ цыфæнды ардауæн ныхæстæ ма кæной гуырдзиæгтæ, уæддæр уыцы æнæбындур ныхæстæн ирон адæм ницы нысаниуæг ратдзысты, уымæн æмæ йæ зонынц знаг æмæ сын хæлар чи у, уый. Уый бæсты сæхи мæгуыргуртæм æркæсæд!
ДЖИОТЫ Екатеринæ
Comments are closed, but trackbacks and pingbacks are open.