Радон хатт та гуырдзиæгтæ равдыстой сæ хъомылад. Гуырдзыстоны телеканал «Рустави 2»-йы телеамонæг Георги Габуния Уæрæсейы Федерацийы Президент Владимир Путины адресыл цъаммар дзыхæй ахæм ныхæстæ дзырдта, æмæ ахæм дзыхыуагæй, йæхи нормалон адæймаг чи хоны æмæ мад-фыды хъомыл чи у, уый хъæды дæр не сдзурдзæн.
Диссаг уый у, æмæ гуырдзиæгтæ европæйаг бæстæты адæмы раз сæхи культурон, цивилон адæм хонынц æмæ уыдоны дæр уырны, кæнæ сæхи афтæ æвдисынц, цыма сæ уырны. Æнæгъдау адæймæгтæ алы нацийы дæр ис, фæлæ нæ «культурон» сыхæгтæ сæ «цæсгом» æмæ сæ хъомыладæй сæрыстыр сты æмæ сæ æргом адæмы рæгъмæ дæр уымæн хæссынц. Амæйразмæ дæр Хуссар Ирыстоны арæнмæ æввахс цы журналисттæ, æхсæнады минæвæрттæ æрбацыдысты, кæцытимæ уыдысты æхсæнадæмон организациты, уыцы нымæцы ЕÆÆО-йы минæвæрттæ дæр, æмæ сæ хæлæфтæ раласгæйæ, цы «æгъдау» равдыстой, уый у Гуырдзыстоны цæсгом, сæ телеалæвæрд «Рустави-2» та фенын кодтой Гуырдзыстоны культурæ.
Журналист Георги Габуния хуымæтæджы адæймагыл нымад нæу, уый у телеканал «Рустави-2»-йы цæсгом, уадзы иууыл рейтингондæр программæ хуыцаубонон эфир «Постскриптум».
Уæрæсейы Федерацийы Президенты пресс-секретарь Дмитри Песков куыд банысан кодта, афтæмæй «стыр истори æмæ хъæздыг традицитæ кæмæн ис, уыцы гуырдзиаг адæмæн Габунияйы ны-хæстæ худинаг сты».
Пресс-секретары ныхæс-тæм гæсгæ, ацы инцидент ноджы тынгдæр фæкарздæр кæндзæн уæрæсейаг-гуыр-дзийаг ахастыты.
Песков банысан кодта, зæгъгæ, фæстаг бонты Гуырдзыстоны русофобион ахастытæ карзæй-карздæр кæны-нц. Уый та дзурæг у, Тбилис цæттæ кæй нæу кæнæ та йæ нæ фæнды экстремистты ных бакъуырын.
Уæрæсейы Федерацийы Фæсарæйнаг хъуыддæгты министрад тынг карзæй стæрхон кодта, уæрæсейаг къухдариуæгады адресыл Габунияйы æнæцензурон ныхæстыл.
Министрады официалон сайтыл цы æрмæг æрцыд мыхуыр, уым дзырдæуы, зæгъгæ, Габунияйы ныхæстæ сты æнæпрецедентон сæ æлгъагдзинадмæ гæсгæ. Гуырдзиаг телеканал «Рустави-2»-йы инцидент здæхт у Мæскуы æмæ Тбилисы ахастытæ фехалынмæ, нысан-мæздæхт гуырдзиаг радикалты æргом провоквци. Уæрæсейаг дипломатты хъуыдымæ гæсгæ, уый у, русофоби кæдæм æркæны, уымæн ирд цæвиттон.
Ныр та Уæрæсейы Фæсарæйнаг хъуыддæгты министрад æнхъæлмæ кæсы профилон æхсæнадæмон æмæ регионалон организациты æрдыгæй адекватон реакцимæ, уымæн æмæ ахæм инциденттæн бынат ма хъуамæ уа цивилон паддзахадты.
Уæрæсейы Федерацийы Фæсарæйнаг хъуыддæгты министрады официалон минæвар Мария Захарова тынг раст характеристикæ радта гуырдзиаг телеканал «Рустави-2»-йы телеамонæг Георги Габунияйы уагахастæн, «гуырдзиæгты æнамонддзинад»-æй кæй схуыдта, уы-мæй.
Габунияйы ныхæстæм куыдфæндыйы цæстæй нæ ракастысты Уæрæсейы Федерацийы информацион фæрæзты минæвæрттæ дæр.
Уæрæсейаг зындгонд журналист æмæ телеамонæг Ольга Скабеева Владимир Путины ныхмæ Георги Габунияйы скандалон ныхæсты схуыдта æнæзæрдæмæдзæугæ, æлгъаг адæймаджы митæ. УФ дзыллон информацион фæрæзты минæвары ныхæстæм гæсгæ, ацы инциденты тыххæй Уæрæсейы Федерацийæ хатыр хъуамæ ракура Гуырдзыстоны президент Саломе Зурабишвили йæхæдæг.
Кæй зæгъын æй хъæуы, Габунияйы «культурон» дзырдтæ нæ фæцыдысты, Гуырдзыстонæй раджы цы гуырдзиæгтæ ацыд æмæ Уæ-рæсейы чи æрбынат кодта, уыцы адæймæгты зæрдæмæ дæр. Уыдонæй иу у Тина Канделаки. Георги Габунияйы «уæздан» ныхæсты тыххæй уый йæ комментарийы банысан кодта, зæгъгæ, «Георги Габуния йæ авторон программæ «P.S.»-ы райдиан дæргъвæтин рæстæджы чъизи æмæ уынгты æвзагæй Президент Владимир Путины ад-ресыл цытæ дзырдта, ахæм æвзагæй фæдзурынц иууыл цъаммардæр радикалтæ, кæцытæ лæууынц, Гуырдзыстоны цы стыр фыдракæндтæ æрцыд, уыдоны фæстæ.
Канделаки бахатыд Гуырдзыстоны хицауиуæгадмæ æмæ телеканал «Рустави- 2»-йы къухдариуæгадмæ, цæмæй ахæм ныхæсты тых-хæй хатыр ракурой Уæрæсейæ. Хатыр ракурын Канделаки хоны,ахæм эфирæн уæвæн цы бæстæйы ис, уый цæсгомæй ма цы чысыл мур баззад, уый бахъахъхъæнын.
Тина Канделакийы комментаримæ гæсгæ,телеканалы реалон бенефициар у Михаил Саакашвили, экс-президентæн йæхи та хоны «фыд-гæнæг, цъаммар æмæ æнаккаг адæймаг». «Саакашвилийы хуызæн адæймæгты руаджы æрцæуынц иууыл тугкалæндæр хæстытæ, кæцытæ сæ фæстæ ныууадзынц пыр-хæнтæ», – банысан кодта Тина Канделаки.
Хъыгагæн, Канделакийы амындтытæ æвæццæгæн нæ бахъардтой Гуырдзыстоны хицауиуæгадмæ. Уыцы цъаммар ныхæсты тыххæй нырма официалон æгъдауæй хатыр нæ ракуырдæуыд Уæрæсейы Президент Владимир Путинæй дæр æмæ уæрæсейаг адæмæй дæр.
Кæд Тбилисы мэр Къаха Къаладзе дæр Георги Габунияйы митæ схуыдта «партриотизм»-ы фæстæ æмбæхст провокаци æмæ «хи бæстæ-йы ныхмæ фыдракæнд», уæддæр йæ ныхæсты хатыр ракуырды хуызæн ницы уыд, йæ ныхæстæ уыдысты Гуырдзыстоны экономикон потенциал бахъахъхъæныны фæдыл.
«Мах æй иу хатт федтам, ацы политикон фыдæхдзинад бæстæйы цæмæ æркæ-ны. Уый нал хъæуы фæлхатт кæнын», – загъта Гуырдзыстоны столицæйы мэр.
Гуырдзыстоны сæргълæууæг Саломе Зурабишвили дæр Twitter-ы йæ фарсыл цы ныффыста, уымæ гæсгæ, Габунияйы ныхæстæ бæстæйы традицитæм нæ хауынц. Уыдон бæстæйы кæнынц æн-дыгъддзинадмæ,æхсæнады ныддихтæ кæнынмæ æмæ ног хæсты райдианмæ.
Кæй зæгъын æй хъæуы, Хуссар Ирыстоны арæнмæ æввахс гуырдзиаг журналисттæ æмæ адæм цы «культурæ» æвдыстой, кæд уый Гуырдзыстоны традицитæм гæсгæ арæзт æрцыд, уæд Габунияйы уыцы ныхæстæ не сты гуырдзиаг традициты хуызæн.
Цард афтæ у, æмæ æгъдау, традицитæ æмæ хъомылад кæмæ нæй, уыцы адæймæгтæ цы бæстæйы цæсгом сты, уыцы бæстæйæн фидæн нæй.
Гуырдзиæгтæ, уе ‘мбисонд уæхи.
ОСИАТЫ Индирæ
Comments are closed, but trackbacks and pingbacks are open.