Куыд зонæм, афтæмæй Уæрæсейы Федерацийы, уыцы нымæцы Цæгат Ирыстон-Аланийы дæр интенсивонæй вакцинаци цæуынц цæрджытæ коронавирусы ныхмæ. Вакцинаци цæуынц, нæ республикæйы территорийыл цы 4-æм æфсæддон базæ ис, уый службæгæнджытæ дæр. Куыд ма хъусын кодтам, афтæмæй нæ республикæйы цæрджытæ дæр ифтонг æрцæудзысты вакцинæ «Спутник-V»-йæ.
Горæтон поликлиникæйы сæргълæууæг Санахъоты Тамарæ куыд зæгъы, афтæмæй низы ныхмæ судзинтæ аразынæн ныридæгæн куыст цæуы бынæттæ бацæттæ кæныныл. Коронавирусы ныхмæ вакцинаци скæнынмæ чи цæуа, уыдон æппындæр ницы зындзинадыл æмбæлдзысты. Кæй зæгъын æй хъæуы, вакцинаци скæныны тыххæй уынаффæ алкæцы адæймаг дæр исы йæхæдæг. Фыццаг рады вакцинаци цæудзысты медицинон уагдоны кусджытæ сæхæдæг. Куыддæр уыцы процедурæ конд фæуа медицинон кусджыты ‘хсæн æмæ иннæ адæмæн сæхи цæвиттонæй равдисой, вакцинæ адæймагæн æдас кæй у, афтæ уый скæныны фадат уыдзæн алкæмæн дæр. Фæлæ судзин аразаны размæ алы адæймаг дæр хъуамæ ауынаффæ кæна йæхи фадыгон дохтыримæ. Фадыгон дохтыр зонгæ у анкетæйы фæрцы алы адæймаджы медицинон картæимæ. Уымæ гæсгæ вакцинæ райсынæн, гæнæн кæмæн ис, уымæн лæвæрд æрцæудзæн барлæвæрды гæххæтт. Коронавирусæй чи схос кодта, уыцы рынчынтæн дæр арæзт æрцæудзæн вакцинæ. Æрмæст рынчын куы уыд, уымæй 6 мæй куы рацæуа, уæд. Поликлиникæйы йын сараздзысты анализ, кæд æмæ йæ антителæтæ дæсæй фылдæр уой, уæд ахæм пациентæн нæма хъæудзæнис саразын прививкæ, фæлæ фондзы онг кæй титртæ æрхауой, уый аразын хъæудзæн æнæ-мæнг, цæмæй йыл дыккагæй ма бахæца ацы низ. Хроникон рынчынтæ чи сты, ома, зæрдæйы низ, диабет, онкологи æмæ æндæр ахæмтæ, уыдонæн вакцинæ арæзт цæудзæн индивидуалонæй.
Comments are closed, but trackbacks and pingbacks are open.