Куыд зонæм, афтæмæй Цæгат Ирыстон-Аланийы поселок Фиййагдоны 24-æм 26-æм октябрмæ уагъд цæуы Æхсæнадæмон фестиваль «Территория мира». Хуссар Ирыстонæй мыхуыр æмæ информацийы комитеты сæргълæууæг Хъотайты Мария æмæ йæ хæдивæг Харебаты Майя. Фестивалы фæткмæ гæсгæ фæстаг бон уыдзæн музыкалон конкурс «Искра». Уырдæм та фæхуыдтой Цæгат æмæ Хуссар Ирыстоны музыкантты. Хип-хоп стилы сæххæст кæнын хъæуы терроризмы тематикæйыл фыст зарджытæ.
Хуссар Ирыстонæй фестивалмæ ацыдысты зынгæ зарæггæнджытæ Лалыты Альберт æмæ Икъаты Миленæ. Уыдон пресс-конференцийы рæстæджы раргом кодтой, цы зарæг азарынмæ хъавынц, уый цы уавæрты ныффыстой, уыцы сусæгдзинæдтæ. «Нæ зарæг хуыйны «Дети Беслана – город ангелов». Миленæимæ йæ иумæ ныффыстам. Фестивалы хайад кæй исдзыстæм, уый базыдтам сентябры мæйы. Беслæныл дзурын хъæуы иронау, фæлæ конкурс æхсæнадæмон у æмæ уымæ гæсгæ ныхæстæ ныффыстам уырыссаг æвзагыл. Оранжировкæ саразын нын бантыст РХИ-йы президент Гаглойты Аланы руаджы», – зæгъы Лалыты Альберт.
Икъаты Миленæ та афтæ загъта «Мах фарон дæр хайад райстам ацы фестивалы. Тынг фæцыдис нæ зарæг жюрийы зæрдæмæ. Сæххæст кодтам зарæг «Цхинвал». Фæлæ тематикæмæ гæсгæ фыст зарæг нæ уыд. Ныр цы зарæг ныффыстам Альбертимæ иумæ, уый нæхи зæрдæмæ дæр тынг цæуы. Мæн ныфс ис, зарæг алкæй зæрдæмæ дæр тынг кæй бахъардзæн. Нæ зæрды ис дарддæр зарæгыл клип сæвæрын».
УАЗÆГТЫ Марфæ
