Президенты Администрацийæн – ног сæргълæууæг
Президент Гаглойты Алан йæ Администрацийы коллективы базонгæ кодта сæ ног разамонæг Мæргъиты Аланимæ.
Бавдысты хайад райста Президенты Администрацийы раздæры къухдариуæггæнæг Джиоты Алан. Уый Президенты Барамындмæ гæсгæ нысан æрцыд Хицауады Сæрдары хæдивæг – Юстицийы минист-рæй.
Гаглойты Алан бузныг загъта Джиоты Аланæн иумæйаг куысты тыххæй.
«Мах æнтыстджынæй куыстам, бирæ нын бантыст. Фæлæ цыбыр рæстæгмæ, кæй зæгъын æй хъæуы, алцыдæр нæ сараздзынæ. Ног бынаты дын мæ цæст уарзы æнтыстытæ Хуссар Ирыстоны адæмы æмæ паддзахады хæрзиуæгæн», – загъта Президент.
Бæстæйы сæргълæууæг банысан кодта, зæгъгæ, æвзонг кæд у, уæддæр Мæргъиты Алан хайджын у Президенты администрацийы æмæ разылæууæг хæстæ скъуыддзаг кæнынæн æнæмæнгхъæуæг фæлтæрддзинад æмæ зонындзинæдтæй.
«Фæнды мæ, цæмæй йын мах баххуыс кæнæм, йе уæхсджытыл цы бæрндзинад æвæрд æрцыд, уый хæссынæн. Абон зын рæстæг у, фæлæ къухтæ ауадзын нæ хъæуы. Мах æппæт нæ тыхтæ куы нæ радтæм, уæд нын ницы бантысдзæн», – загъта Гаглойты Алан.
Йæ фарсæрдыгæй, Джиоты Алан бузныг загъта Президент æмæ администрацийы коллективæн иумæйаг архайды тыххæй æмæ ныфс бавæрдта, администрацийы ног сæргълæууæг кæй адарддæр кæндзæн иумиаг æнтыстджын куыст.
Мæргъиты Алан бузныг загъта Президентæн йе ‘ууæнкдзинады тыххæй æмæ банысан кодта, зæгъгæ, цæттæ у администрацийы коллективимæ скъуыддзаг кæнын паддзахады раз æвæрд хæстæ.
Таможнæйон комитеты
Президент Гаглойты Алан Таможнæйон комитеты коллективы базонгæ кодта ног къухдариуæггæнæг Цоциты Александримæ.
Ацы бынатмæ йæ снысан кæныны тыххæй Барамындыл Президент йæ къух æрфыста 24 октябры.
Президент бузныг загъта Таможнæйон комитеты раздæры къухдариуæггæнæг Цхуырбаты Муратæн бирæ азты дæргъы ацы бынаты йæ куысты тыххæй.
«Зын уавæртæ уыд. Æз æй æмбарын, коллективæй ацæуын зын у, фæлæ мæнæн æхсызгон уыд, ныхас кæныны рæстæджы кæй равдыста йе ‘мбаргæдзинад æмæ райсгæ уынаффæйы æнæмæнгхъæуындзинад», – загъта Гаглойты Алан.
Уый банысан кодта, зæгъгæ, ног къухдариуæггæнæгæн ведомствойы ис куысты стаж, зоны куыст æмæ йæ бон суыдзæн йæ разылæууæг хæстæ скъуыддзаг кæнын.
«Коллектив дæр ын хъуамæ æххуыс кæна. Мах æй уынæм, Уæрæсейы уæззау уавæр кæй сæвзæрд, æмбарæм дунейы уавæр дæр. Æз афтæ хъуыды кæнын æмæ Таможнæйон æмæ Хъалонты комитеттæ хъуамæ фылдæр тыхтæй архайой, цæмæй паддзахадæн æххуыс кæной. Мах дæр хъæуы кусын, цæмæй Уæрæсеимæ æппæт бадзырдтæ сæххæст кæнæм, бацархайæм, цæмæй нæ паддзахад йæхи фæрæзтæй цæра æмæ хисæрмагонд æфтиæгтæ фылдæр кæной», – загъта Президент.
Гаглойты Алан банысан кодта, зæгъгæ, паддзахад хъуамæ уа хæдбар æрмæст гæххæтыл фыстæй нæ, фæлæ уый хъуамæ йæхи ифтонг кæна æмæ тыхджындæр кæна бонæй-бонмæ.
Юстицийы министрады
Президент Гаглойты Алан Юстицийы министрады коллективы базонгæ кодта ног къухдариуæггæнæг Джиоты Аланимæ. Уый ма ацы ведомствойы сæргъ уыд 2014-2015 азты.
2022 азы июнæй уыд РХИ-йы Президенты Администрацийы къухдариуæггæнæг.
Бæстæйы сæргълæууæг бузныг загъта Гаглойты Олегæн йæ куысты тыххæй, кæцыйæн цыбыр рæстæгмæ бирæ бантыст Юстицийы министры бынаты.
«Республикæйы арæзт æрцыд ног ведомство – Фæллойад æмæ социалон хъахъхъæнынады министрад. Ахсджиаг у уæрæсейаг коллегæтимæ конкретон куыст æрбæстон æмæ проблемон фарстатæ аскъуыддзаг кæнын. Мах бирæ уынаффæ кодтам ног ве-домствойы сæргълæууæджы кандидатурæйыл æмæ æрцыдыстæм ахæм хъуыдымæ, Гаглойты Олегæй хуыздæр уыцы хæстыл кæй ничи фæтых уыдзæн. Æз ныхас кодтон йемæ, æмбары йæ, уый стыр бæрндзинад кæй у. Нæ дызæрдыг кæнын, Гаглойты Олег цыбыр рæстæгмæ кæй сахуыр кæндзæн куысты ног здæхт æмæ йæ разылæууæг хæстæ æнтыстджынæй кæй скъуыддзаг кæндзæн», – банысан кодта Гаглойты Алан.
Уый ма банысан кодта, ноджы иу Барамындæй юстицийы министры бынатмæ нысан кæй æрцыд Джиоты Алан, кæцы хорз зонгæ у, куыд коллективимæ, афтæ ахсджиагдæр ведомствотæй сæ иуы архайдимæ дæр.
«Алчидæр йæ куысты бынаты йæ разылæууæг хæстæ гъæдджынæй куы æххæст кæна, уæд махæн алцыдæр бантыстдзæн», – загъта Президент.
Гаглойты Алан ныфс бавæрдта, зæгъгæ, куы бахъæуа, уæд республикæйы къухдариуæгад цæттæ у æххуыс бакæнынмæ.
Финансты министрады
Хицауады Сæрдар Джуссойты Константин Финансты министрадæн бавдыста ног снысангонд разамонæг – Тадтаты Дзамболаты.
Хицауады сæргълæууæг банысан кодта, зæгъгæ, Тадтаты Дзамболат алыгъуызон паддзахадон бынæтты йæхи равдыста, куыд бæрзондквалификациджын специалист æмæ разамонæг, æмæ йын йæ цæст бауарзта æнтыстытæ ног куысты бынаты.
«Экономикæйы рæзтæн хъæуы эффективон æгъдауæй чи кусы, ахæм финансон системæ. Дзамболат Мервадикы фырт у республикæйы экономикæйы фадыджы иууыл фæлтæрдджын специалисттæй сæ иу. Уырны мæ, йе ‘ххуысы фæрцы финансон сектор кæй райсдзæн йæ рæзты ног импульс», – загъта Хицауады Сæрдар.
Тадтаты Дзамболат йæ рады бузныджы ныхæстæ загъта республикæйы къухдариуæгадæн ахæм æууæнчы тыххæй æмæ банысан кодта, зæгъгæ, коллективимæ иумæ æппæт тыхтæ дæр кæй ратдзæн разылæууæг хæстæ скъуыддзаг кæнынмæ.
«Махæн ахсджиаг сты фæстиуджытæ. Бахъæудзæн нæ кусын зын уавæрты, ресурстæ сты арæнгонд. Нæ сæйраг хæс у æрмæст ныры хæстæ скъуыддзаг кæнын нæ, фæлæ рæзты фарстатæ дæр. Куыст бирæ, фæлæ сыл иумæ фæтых уыдзыстæм», – загъта Тадтаты Дзамболат.
Экономикон рæзты министрады
Президенты Барамындмæ гæсгæ Экономикон рæзты министрæй нысан æрцыд Хъотайты Сæрмæт. Уый размæ куыста Республикæ Хуссар Ирыстоны Хицауады аппараты разамонæгæй.
Коллективæн ног министры базонгæ кодта Хицауады Сæрдар Джуссойты Константин.
Уый бузныг загъта ведомствойы раздæры сæргълæууæг Тадтаты Дзамболатæн йæ цæсгомджын куысты тыххæй æмæ йын йæ цæст бауарзта æнтыстытæ Финансты министры бынаты.
Хицауады сæрдар банысан кодта, зæгъгæ, Хъотайты Сæрмæт у фæлтæрдджын къухдариуæггæнæг, куыста бирæ бæрнон бынæтты æмæ йæ бон суыдзæн æнтыстджынæй æххæст кæнын йæ разылæууæг хæстæ.
«Уырны мæ, Сæрмæт Эдуарды фырт, ды куыд зондджын къухдариуæггæнæг, æнтыстджынæй спайда кæндзынæ ног бынаты дæ зонындзинæдтæ æмæ фæлтæрддзинадæй. Кæй зæгъын æй хъæуы, министрады раз лæууы вазыгджын хæстæ, æнхъæлмæ уæм кæсы куысты егъау гуырахст, фæлæ мæ уырны, иумæйаг тыхтæй сыл кæй фæтых уыдзыстут», – загъта Джуссойты Константин. Уый ма банысан кодта, зæгъгæ, хицауады кадрон ивындзинæдтæ здæхт сты паддзахадон структурæты куыст фæхуыздæр кæнынмæ æмæ иумæйагæй паддзахадон хæстæ скъуыддзаг кæнынмæ.
Хъотайты Сæрмæт раарфæ кодта республикæйы къухдариуæгадæн се ‘ууæнчы тыххæй æмæ ныфс бавæрдта, æппæт тыхтæ дæр кæй ратдзæн министрадыл æвæрд хæстæ скъуыддзаг кæнынмæ.
«Бузныджы ныхæстæ мæ фæнды зæгъын республикæйы къухдариуæгадæн ахæм бæрзонд æууæнкдзинады тыххæй. Коллективимæ иумæ сараздзыстæм æп-пæтдæр, цæмæй эффективонæй кусæм нæ разылæууæг ног хæстæ æмæ цы проекттæ райдыдтам аразын, уыдон скъуыддзаг кæныныл», – загъта уый.
