Цхинвалы бирæпрофилон колледж байгом 2010 азы Цхинвалы хъæууонхæдзарадон техникумы бындурыл. Ацы ахуырадон уагдон цыбыр рæстæгмæ ссис нырыккон царды æнæмæнгхъæуæг специалистты цæттæгæнæн центр. Ам 9-æм къласы фæстæ, науæд та скъола фæуды фæстæ равзарæн ис 10 дæсныйадæй фылдæр. Колледж цы хуызы специалисттæ цæттæ кæны, уыдон сты: хæринагаразæг, кондитер, слесарь, электрик, токарь, автомашинæтæ цалцæггæнæн, хуыйæг, æхсæнадон хæлцы продукцийы технолог æмæ æнд. Ацы аз ма колледжы байгом цифрæйон информациты дæсныйад. Уымæн æмæ уый абон приоритетон у нæ æрыгон республикæйы. Бæрæг куыд у, афтæмæй рæзы нæ республикæйы цифрæйон телеуынынад, уым та хъæудзæнис квалификациджын специалисттæ.
2016 азы колледжæн арæзт æрцыд йæхи æрмадзтæ, фæлæ уæдмæ та студенттæ кондадон практикæйы цыдысты республикæйы арæзтадон объектты. Хайад-иу райстой Цæгат Ирыстоны кондитерты, слесарты æмæ хуыйджыты конкурсты. Ныр сын фæзынд хицæн, уæрæх хатæнтæ, алыгъуызон дæсныйæдты фæдыл æрмадзтæ. Уыдон иууылдæр ифтонг æрцыдысты нырыккон ифтонггæрзтæй. Ис дзы уазал æмæ хъарм дон, хинайæнтæ. Практикæйы цæуынæн сын ис æппæт уавæртæ.
Ахуыры процесс кæм цæуы, уый та у дыууæладзыгон бæстыхай, йæ иумæйаг фæзуат у 980 кв. метры.
Бирæпрофилон колледжы директор Козаты Лирæ нын куыд загъта, афтæмæй ивгъуыд аз колледжмæ ахуыр кæнынмæ æрбацыд 92 студенты. Уыдонæй чидæртæ, ахуыры процессы рæстæджы йæ зонындзинæдтæ æвзæр кæмæн уыдысты, æмæ сæ ахуырмæ кæй нæ цыдысты, уый тыххæй æрвыст æрцыдысты колледжæй. Иууыл фылдæр студенттæ вæййы хæринагаразæг æмæ кафелæвæрæджы хайады. Иууыл къаддæр студенттæ та – аграрон хайады.
Колледжы къухдариуæгад архайы, цæмæй бирæпрофилон ахуыргæнæндонмæ æрыгон фæлтæр тынгдæр тырной. Уый тыххæй ам кусæг ахуыргæнджыты хъæппæрисæй уагъд æрцæуы «Гом дуæртты бон». Уырдæм хуынд æрцæуынц горæты скъолаты ахуыргæнинæгтæ, афтæ ма республикæйы районты скъоладзаутæ дæр. Педколлектив æмæ ахуыргæнинæгтæ скъоладзауты базонгæ кæнынц, цы дæсныйæдтæ сæм ис, уыдонимæ. Саразынц сын экскурси куыд æрмадзтæм, афтæ ахуырадон корпусмæ дæр. Сæ зæрды ис уымæй республикæйы рауагъдонтæн фидæны дæсныйæдтæ равзарыны фадат радтын.
Ацы аз дæр та уагъд æрцыд ахæм мадзал. Студенттæ сæ ахуыргæнджытимæ сцæттæ кодтой алыгъуызон хæринæгтæ. Ацы аз рауагъдонтæ-кондитертæ скодтой диссаджы рæсугъд адджинæгтæ. Уымæй студенттæ фенын кодтой, ахуыры азы аккаг зонындзинæдтæ кæй райстой æмæ сæ дæсныйадыл кусгæйæ, сæхи профессионалтæй кæй æвдисдзысты.
Ацы аз бирæпрофилон колледжы цы рауагъдонтæ уыд, уыдон сарæзтой дипломон куыстытæ æмæ сæ зонындзинæдтæ та бафидар кодтой фæлварæнтæй. Ног ахуыры азмæ райдыдтой абитуриентты исын. Исæн къамис кусдзæнис суанг августы мæймæ. Колледжы директор Козаты Лирæ зæгъы: «Мах ацы аз æнхъæлмæ кæсæм фылдæр студенттæм. Махмæ ис æппæт уавæртæ дæр фидæны дæсныйæдтæ райсынæн. Вæййы афтæ дæр, студент иу аз райсы иу дæсныйад, дыккаг аз та – æндæр. Нæ колледжы студенттæ ифтонг цæуынц æмдзæрæндонæй дæр. Боны иу хай уыдонæн вæййы ахуыр, иннæ хай та – практикæ. Уымæ гæсгæ ифтонг цæуынц хъарм сихорæй дæр.
Колледжы студенттæ æнцонтæй ссарынц куыст, уымæн æмæ ам цы дæсныйадтæн ис райсæн, уыдон се ‘ппæт дæр сты, ныртæккæ нæ республикæйы зæрдиагæй чи хъæуы, ахæмтæ.
УАЗÆГТЫ Марфа
Comments are closed, but trackbacks and pingbacks are open.