Нӕ республикӕйы хицӕн районты дыргъы куыст рапарахат кӕнынӕн ис хорз климатон уавӕртӕ, зайы дзы куыд хъӕддаг, афтӕ культурон дыргъы мыггӕгтӕ дӕр. Уымӕ гӕсгӕ сӕм фӕстаг рӕстӕджы стыр хъусдард аздӕхтой куыд хицӕн дыргъкуыстгӕнджытӕ, афтӕ фермертӕ дӕр, зилынц сӕм агротехникӕйы домӕнтӕ ӕххӕст кӕнгӕйӕ, ӕмӕ уый фӕстиуӕгӕн, сӕ фӕззӕджы бӕркад вӕййы зӕрдӕйы фӕндиаг. Нӕхи ӕркӕнгӕ дыргъ та, бӕрӕг куыд у, афтӕмӕй у хӕрзаддӕр, стӕй адӕймаджы организмӕн у пайдахӕссӕг.
Ӕппӕт уыдӕттӕ зӕрдыл даргӕйӕ, нӕ республикӕйы азӕй аз фылдӕр кӕны, дыргъы куыстмӕ йе ‘ргом чи аздӕхта, уыцы ӕмбӕстӕгты нымӕц ӕмӕ уый та у раппӕлинаг.
Ахӕм куыстуарзаг адӕймӕгты нымӕцмӕ хауы Туаты Славик дӕр. Æртӕ азы размӕ уый Цхинвалы районы Присы быдыртӕй райста 43 гектары зӕхх. Райдианы уал базылд зæхмæ ӕмбӕлон ӕгъдауӕй ӕмӕ дзы стӕй ӕрӕвнӕлдта алыхуызон дыргъы культурӕтӕ садзынмӕ. Номхуындӕй дзы сагъд ӕрцыд чъерамийы ӕртӕ сорты ӕртӕ гектары фӕзуатыл, атъамийы сорттӕ та сты цыппар ӕмӕ сӕ иумиаг фӕзуат ахсы 25 га, 3,5 га сты балы талатӕ, чылауийы 7 хуызы ӕмӕ ӕндӕртӕ.
Арендатор йӕ зӕрдыл дары агротехникӕйы ӕппӕт домӕнтӕ дӕр ӕмӕ сӕ ӕххӕст дӕр кӕны рӕстӕгыл. Уыдон та сты бӕлӕсты хус ӕмӕ уӕлдай къалиутӕ ӕхсӕдын, донхӕр кӕнын ӕмӕ сӕм, уыимӕ иумӕ, хъацӕнтӕй фӕкӕсын. Ныридӕгӕн уал иуӕй-иу дыргъы культурӕтӕй райста фыццаг тыллӕг ӕмӕ сӕ барухс йӕ зӕрдӕ, уӕй та сӕ кӕндзӕн нӕ горӕты ӕмбӕстӕгтӕн.
ХУЫБИАТЫ Никъала
Comments are closed, but trackbacks and pingbacks are open.