Профессионалон дæсныйады фестиваль

Ивгъуыд къуырийы кæрон нæ горæты Театралон фæзуаты фыццаг хатт уагъд æрцыд профессионалон дæсныйады фестиваль «Там, где нас ждут», кæцыйы сорганизаци кодта Цхинвалы бирæпрофилон колледж РХИ-йы Культурæйы министрады æххуысæй. Ардæм æрбацыдысты нæ горæты цæрджытæ æмæ уазджытæ æмæ стыр цымыдисимæ зылдысты колледжы студентты сфæлдыстадыл.

Колледжы æппæт факультетты студенттæ сæ ахуыры рæстæджы цы зонындзинæдтæ райстой, уыдон практикон æгъдауæй æвдыстой адæмæн. Фестиваль гом кæныны церемонийы хайад райстой Республикæ Хуссар Ирыстоны Президент Бибылты Анатоли, РХИ-йы Хицауады Сæрдар Пухаты Эрик, РХИ-йы Ахуырад æмæ зонады министр Гасситы Натали æмæ æндæр официалон адæймæгтæ.

Театралон фæзуаты рæгъ-рæгъы равæрдтой, студенттæ сæхи къухтæй цы сарæзтой, уыцы æрмæджыты. Арæзтады факультеты студенттæ сæ арæхстдзинад æвдыстой сис амайынæй. Уыдон агуырийæ самадтой рæсугъд чысыл арæзтад, кæцыйы бæрæгæй зындис профессионалон æрмдзæф. Цымыдисон рауадис сæ мæсыг дæр, кæцыйы фарсмæ зæрдылдарынæн адæм истой сæ къамтæ. Сылгоймæгтæ та рæвдзæй цыдысты æмæ уыдтой хуыйджыты æмæ хæринагаразджыты арæзт продукци. Адджинæгты уæрæх ассортимент бынаты дегустаци кодтой фестивалмæ æрбацæуджытæ æмæ-иу райгондæй баззадысты.

Сфæлдыстадæн табу чи кæны, уыдон та-иу æнæмæнгдæр бацымыдис кодтой хъæдæрмæгæй арæзт мигæнæнтæм. Се ʻхсæн фенæн уыдис тухгæ бандæттæ æмæ стъол дæр.

Фестивалы ма сæ арæхстдзинад æвдыстой æндадз-джытæ (сварщиктæ), электриктæ æмæ плитæвæрджытæ дæр. Президент Бибылты Анатоли æндадзджыты баййæфта сæ куысты уæлхъус æмæ сын æвæрццагæй саргъ кодта сæ куыстæн.

Бæрæг куыд у, афтæмæй колледжы абитуриенттæн ацы ахуырадон уагдонмæ бацæугæйæ, байгом вæййынц бирæ æндæр æмæ æндæр дæсныйæдтæ райсыны тыххæй ахуыры дуæрттæ. Колледжы ис æндæр æмæ æндæр профилы дæс факультеты. Æрыгон фæсивæд равзарынц автомеханик, хæринагаразæджы, хуыйæджы, электрикы, хъæдырмæг нывæфтыд кæныны æмæ æндæр ахæм дæсныйæдтæ.

Алы ног ахуыры азы дæр колледжы профилон факультетты нымæц уæрæхдæр кæны, баконд æрцæуынц, нæ республикæйæн абон æмæ сомбон чи бахъæудзысты, уыцы дæсныйæдтæ. Уымæ гæсгæ ацы ахуыргæнæн уагдоны абитуриентты нымæц фылдæр кæны.

Фестиваль гом кæныны рæстæджы колледжы директор Козаты Лирæ бузныджы ныхæстæ загъта æрбацæуджытæн кæй зонгæ кæнынц студентты куыстытимæ, уый фæдыл. Уый ма куыд загъта, афтæмæй ацы фестиваль бацæттæ æмæ йæ ауадзыны хайад  истой куыд ахуыргæнджытæ, афтæ студенттæ дæр. «Ныфс нæ ис æмæ нæ фæнды, цæмæй нын нæ бæрæгбон æмæ нæ циндзинад сымах дæр банкъарат», – банысан кодта колледжы директор.

Уый  банысан кодта, зæгъгæ, ацы фестиваль ахъаз у фæсивæды куыстыл цайдагъ кæнынæн. «Махæн  абон  нæ хæс у, цæмæй хъомыл æмæ ахуыр кæнæм нæ республикæйæн хъæуæг кадртæ. Уымæн æмæ мах бахъæуы æрхонын æндæр республикæтæй æндæр æмæ æндæр специалистты», – загъта Козаты Лирæ. Республикæйы Ахуырад æмæ зонады министрад колледжæн æппынæдзух сæ фарсмæ кæй ис æмæ сын иузæрдион æххуыс кæй кæны  сæ куысты, уый тыххæй сын Козиан загъта бузныджы ныхæстæ.

Нæ бæстæйы сæргълæууæг Бибылты Анатоли дæр арфæ æмæ бузныджы ныхæстæ загъта фестивалы æппæт хайадисджытæн æмæ йæ чи сорганизаци кодта, уыдонæн дæр. «Бузныг Лира Филиппы чызгæн æмæ æппæт уыдонæн, ахæм цымыдисон мадзал чи бацæттæ кодта, стæй фæсивæдмæ куыстмæ уарзондзинад чи æвзæрын кæны. Абон ардæм цы фæсивæд æрбацыдис æмæ сæхи цæстæй цы федтой, уый сæ зæрдыл бадардзысты æмæ дарддæр сæ ахуыры фæндаг акæндзысты колледжы уагдоныл», – банысан кодта Президент Бибылты Анатоли.

Уыцы бон ма колледжы педагогон коллектив бирæ арфæйы æмæ бузныджы ныхæстæ райстой РХИ-йы Ахуырад æмæ зонады министр Гасситы Наталийæ дæр. Нæ республикæйы æмбæстæгтæм цы тæлмæнтæ æвзæрдис, уыдон нысан кодтой, колледж цы арфæйы чиныг бакодтой, уым, кæцыйы фыццаг ныффыста Президент Бибылты Анатоли.

Нæ уацх.