25-æм августы Информацион агентад «Спутник»-ы пресс-центры Республикæ Хуссар Ирыстоны Ахуырад æмæ зонады министр Гасситы Наталийæн уыд пресс-конференци ног ахуыры азы æрбалæуды охыл. Нæ республикæйы ахуыры къабазы цы ивындзинæдтæ æрцыд, куыд цæттæ сты ног ахуыры азмæ æмæ цавæр проблемæтыл æмбæлынц, æппæт уыдæттыл æрныхас кодта министр мадзалы бацæуæны. Уый, фыццаджыдæр, банысан кодта, цалдæр боны размæ та сын ауагъд кæй æрцыд ахуыргæнджыты æрвылазон конференци, цыран бæстонæй æрдзырдтой, ивгъуыд ахуыры азы æнтыстытыл æмæ ма сæ разы цы хæстæ æвæрд уыд, æппæт уыдæттыл. Конференцийы æппæт дæр банысан кодтой, ахуыр-хъомыладон куыст бæрзонддæр къæпхæнмæ сисын кæй у ахуыргæнджыты сæйраг нысан æмæ аудинаг. Æмæ цæмæй уый къухты æфта, уымæн хъæуы æнæзæрдæхудт куыст, æндæрты хорз фæлтæрддзинад биноныг кæнын æмæ нæ сомбоны цардаразджытæм зæрдиаг ахаст дарын.

Ног ахуыры азмæ куыд цæттæ сты скъолатæ, уый тыххæй уал радзырдта Гасситы Натали.

– Стыр бузныг, абон æз уæ уазæг кæй дæн æмæ уемæ хъуыддагон ныхас кæй кæндзынæн.

Ног ахуыры аз æрбалæууыд нæ къæсæрыл æмæ нæ республикæйы канд нæ министрад нæ, фæлæ ма æппæт цæрджытæ дæр сæхи кæй цæттæ кæнынц ацы бæрæгбонмæ.

Цæмæй 1-æм сентябры стыр цины æнкъарæнтимæ æмæ æхсызгонæй æрбайгом кæнæм нæ республикæйы æппæт скъолаты дуæрттæ, уый тыххæй мах нæхи цæттæ кæнæм алыварсонæй.

Цалцæггонд æмæ хæрзæфснайд цæуынц куыд горæты, афтæ районты æмæ хъæуты скъолатæ. Горæты бирæ цалцæггæнинаг объекттæ кæй ис, уый тыххæй нæ республикæйы Хицауад рахицæн кодта æхцайы фæрæзтæ – 6 милуан сомы бæрц. Уыдон нысанмæздæхтæй хардз цæуынц ацы цалцæггæнæн куыстытыл. Алкæцы скъолайы дæр бæрæгæй разынд, цы дзы ис саразинаг, уыдæттæ. Кæмдæрты агъуыстыты хъæуы бацалцæг кæнын, кæмдæрты хъармгæнæн системæ саразын æмæ сæ æмткæй та алкæцы скъолайы дæр хъæуы косметикон ремонт саразын. Мæнмæ гæсгæ ацы цалцæггæнæн куыстытæ рæстæгыл фæуыдзысты. Зæгъæм, Ленингоры районы капиталон цалцæггæнæн куыстытæ цæуынц скъолайы агъоммæйы ахуыргæнæндоны. Цалцæг ма цæуынц Цъинагар æмæ Орчъосаны астæуккаг скъолатæ, ахæм æнгæс куыстытæ цæуынц æндæр районты скъолаты дæр. Зæгъын мæ фæнды уый, æмæ ацы скъолаты кæй цæуынц æрмæстдæр æнæмæнг-хъæуæг цалцæггæнæн куыстытæ.

– Куыд ивгъуыд аз, афтæ ацы аз дæр ног ахуыры азы райдианмæ эксплуатацимæ лæвæрд цæудзæн исты ног ахуыргæнæндон объект?

– Инвестпрограммæйы ахуырадон объекттæ саразыны хъуыддæгтæ цъус нæ уыдысты. Дæхæдæг дæр æй куыд банысан кодтай, афтæмæй ивгъуыд аз бирæ бафтыд нæ къухты. Фæнд кæнæм ацы аз Ленингоры районы уырыссаг астæуккаг скъола саразын. Арæзт дзы цæуы ныртæккæ скъолайы агъоммæйы уагдон дæр. Куыд зонут, афтæмæй Ленингоры районы ис дыууæ скъолайы агъоммæйы уагдоны. Æмæ уый тыххæй арæзт цæуы иу стыр бæстыхай, цæмæй сæ иу агъуысты бын фæкæнæм.

Рæхджы эксплуатацимæ лæвæрд æрцæудзысты нæ горæты колледжы æрмадзтæ. Мах ацы хъуыддагмæ дарæм лæмбынæг хъусдард. Банысан кæнын мæ фæнды иу хъуыддаг: нæ адæм иууылдæр се ‘ргом кæй аздæхтой уæлдæр ахуыргæнæндонмæ, фæлæ нæ паддзахады хъæуынц, колледжы цы дæсныйæдтыл ахуыр кæнынц, уыцы специалисттæ дæр. Кæй зæгъын æй хъæуы, алы паддзахадæн дæр хъуамæ уа йæхи уæлдæр ахуыргæнæндон, цæмæй бæрзонд æмвæзадыл ахуырад исой сывæллæттæ. Цæмæй абон мах нæ колледжмæ æрбакæнæм фылдæр ахуыргæнинæгты, уый тыххæй мах хъæуы чысыл фæивын не ‘мбарынад уыцы хъуыддаджы. Растдæр уæд махæн нæ бон зæгъын суыдзæнис, ацы колледжы цы æрмадзтæ арæзт цæуынц, уыдон ахуыргæнинæгтæн кæй уыдзысты цымыдисон æмæ сæм кæй цæудзысты зæрдиагæй.

Ацы аз не ‘мдзæрæндоны дæр сæрибар æрцыдысты æртæ хатæны, ныридæгæн дзы цæуынц цалцæггæнæн куыстытæ ног ахуыры азы райдайæнмæ. Æмæ махæн нæ бон уыдзæн райсын дæрддаг хъæутæй цæуæг студентты. Дард рæттæй æрцæугæ    ахуыргæнинæгтæн горæты ахуыр кæныны хъуыддаг вæййы зын, уымæн æмæ нын бирæ азты дæргъы нæхи æмдзæрæндон нæ уыдис. Уый та у æнæмæнгхъуыддаг студентон царды. Уæдæ, афтæ зæгъæн ис, ацы проблемæ дæр сабыргай кæй цæуы скъуыддзаг. Кæд цадæггай, уæддæр уал ын ис райдиан.

– Абон колледж цас популярон у?

– Стыр хъыгагæн, мах абон уым не ‘мбырд кæнæм æххæст контингент, ома нæ цас хъæуы, уыйас ахуыргæнинаджы йæм не ‘рбацæуы. Ацы аз нæм æрбацыд 70 куырдиатæй фылдæр. Августы фæудмæ, æгæрыстæмæй, суанг сентябры райдианы дыууæ къуырийы дæргъы кусдзæн исæн къамис колледжы. Вæййы афтæ дæр, æмæ бирæтæ фæстæдæр сфæнд кæнынц ардæм ахуырмæ æрбацæуынмæ, чи йæ хæстæджы, чи та йæ сыхаджы амындмæ гæсгæ.

– Цавæр професси арæхдæр равзарынц колледжы?

– Иууыл арæхдæр дзы абон æвзæрст æрцæуы Автомеханикæйы факультет. Иттæг хорз контингент ма вæййы кондитерон факультетмæ. Банысан кæнын хъæуы уый, æмæ дзы тынг хорз æнтыстытимæ кæй сахуыр кæнынц. Арæх фæисынц хайад Уæрæсейы Федерацийы æндæр æмæ æндæр горæтты конкурсты. Ивгъуыд аз бацахстой призон бынат, фæуæлахиз сты æмæ хорзæхджын æрцыдысты хорзæхтæй дæр. Фæлæ уыдон стыр æнтыстытæ нæма сты колледжæн. Иухатт ма йæ сфæлхатт кæнон, мах хъæуы ивын не ‘мбарынад. Æнæуый та банысан кæнын хъæуы, профориентацион куыст нæм æмбæлонæй кæй ацыдис. Фæлæ нæ абон хъæуы ныййарджыты æмæ скъолаты ахуыргæнджыты æххуыс дæр. Уымæн æмæ скъоладзаутæ скъола каст фæуыны фæстæ фылдæр се ‘ргом аздахынц ахæм факультеттæм, куыд юридикон, экономикæ æмæ медицинæмæ. Æмæ дарддæр цы? Цал юрист æмæ экономисты хъуамæ уа республикæйы? Куыд æй æмбарын, уымæ гæсгæ уæлдæр ранымайгæ факультетты рауагъдонтæй иугæйттæ свæййынц бæрзондквали-фикациджын специалисттæ. Уыдонæн куысты бынæттæ ссарын дæр æнцон вæййы. Фæлæ йæхи йæ профессийы чи не ссары, уыцы фæсивæд та цы хъуамæ аразой? Уымæ гæсгæ развæлгъау рауагъдонты фæхъæуы акæсын, ахъуыды кæнын, цæмæй цы хъуыддагæн хуыздæр æмæ пайдадæр уой, уыцы професси равзарой. Афтæ адæймаг царды йæхи ссары бирæ æнцондæр. Ныййарæг йæхи сывæллæттыл куыд хъуамæ кæна эксперименттæ? Чизоны, дæ сывæллонмæ æндæр курдиат ис. Сывæллæттæн равзарын кæнынц, ныййарджытæ сæхæдæг цы дæсныйад фæуарзынц, уый. Ацы фарст вазыгджын у æмæ мах фылдæр бакусдзыстæм ацы фæдыздæхтыл. Цавæр фæстиуджытæ йын уа, уый та равдисдзæн рæстæг.

– Колледжы уыцы æрмадзтæ куы скусой, уæд нæй гæнæн æмæ сæ студенттæ пайда кæной, сæхицæн æмæ колледжæн æхцайы фæрæзтæ бакусыны хъуыддаджы?

– Мах ацы хъуыддаджы фæдыл семæ дзурæм рагæй. Кæд æмæ дзы уа уавæртæ æмæ ифтонг уой, æнæмæнгхъæуæг нырыккон домæнтæн дзуапп чи дæттынц, ахæм ифтонггæрзтæй, уæд. Цæмæннæ ис гæнæн, кæд æмæ колледжæн фидаргонд у коммерцион архайд æмæ дзы пайда дæр скæной. Зæгъæм, кондитертæн сæрибарæй сæ бон у æмæ фыцой адджын гуылтæ æмæ æндæр ахæмтæ æмæ афтæмæй сæ продукцийæ ифтонг кæной, зæгъæм, æввахсдæр сæм цы сывæллæтты цæхæрадон ис, уый. Мах сæ нæхæдæг дæр уыцы хъуыддагмæ кæнæм. Уый хауы автомеханиктæм дæр. Махæн арæх вæййы проблемæтæ хъæууонхæдзарадон машинæтимæ нæ республикæйы. Колледжы ахуыргæнинæгтæ куы зоной ахæм машинæты сцалцæг кæнын, уæд ма искæцæй цæмæн кæнæм. Афтæ колледж йæхицæн араздзæн бюджет. Уыцы бюджеты дарддæры фарст куы лæууа, уæд, кæй зæгъын æй хъæуы, колледжы рæзты хъуыддагæн. Уый уаид хорз хъуыддаг. Ахæм дæнцæгтæ бирæ ис. Уым ма ис иттæг хорз хуыйджыты хайад дæр. Мах сын сæ куыстытæ мониторыл æвдыстам, æрæджы ахуыргæн-джытæн цы конференци уагъд цыдис, уым. Цæй тых-хæй? Уымæн æмæ нæ хъæуынц уыцы профессийы минæвæрттæ, фæлæ сæ дарддæр дæр хъæуы æххæст кæнын ногдзинæдтæй. Æрыгон фæлтæрæн уæд йæ миддуне дæр кæндзæнис рæзгæ. Уыцы ран ма æвдыст æрцыдысты нæ горæты Сфæлдыстады галуаны, æрыгон натуралистты æмæ æрыгон техникты станцæты куыстытæ. Равдыстам дзы хуыйæн дзаума, кондитерон хæринæгтæ æмæ бирæ æндæртæ. Уый та у ахæм раст рекламæ, цæмæй дæ сывæл-лоны барвитай ахæм дæсныйады фæдыл ахуырмæ. Махæн ис хорз уавæртæ, цæмæй сывæллон размæ цæуа. Ис ахæм япойнаг зондджын хъуыды, зæгъгæ, сывæллон куы райгуыры, уæд вæййы курдиатджын, сфæлдыстадмæ – æвзыгъд, æппæтмæ дæр – цæттæ, æмæ цæмæй дарддæр уыцы ратгæ курдиат  райхæла, уый тыххæй хъуамæ бацархайа йæ хъомылгæ-нæг. Абон махæн нæ хæс у, цæмæй алыварсонæй дæр, сæрмагондæй, ахуыры хъуыддаджы æххуыс кæнæм нæ сомбонаразджытæн. Мах искæуыл кур-диат нæ бафтаудзыстæм, нæдæр искæмæй сараздзыстæм гени, фæлæ сæ нæ бон у раргом кæнын алкæцы сывæллоны миддунейы дæр.

– Цы квотæтæ нын дæттынц, уыдон нæ домæнтæн æмбæлон сты?

– Райдайæм уал сæ райсыны механизмæй.

Июлы-августы мæйы нæ республикæ аразы “Россотрудничество”-йы домæнмæ гæсгæ паддзахадон заказ, кæй зæгъын æй хъæуы, иннæ азмæ. Мах ахæм æнгæс фыстæджытæ барвитæм министрадтæм æмæ нæм уыдон æрбарвитынц ахæм дæсныйадты номхыгъд, кæцытæ абон махæн сты æнæмæнгхъæуæг. Ацы заказ ацæуы æмбæлон структурæтыл. Мах райсæм заказ, фæлæ мæ бон нæу æмæ зæгъон квотæты 100 % кæй баззайынц.

Табу Хуыцауæн, ацы аз нæм ветеринарон дæсныйад райсыны фæдыл уыд æнтыстытæ. Бирæты фæндыдис ацы хаххыл сахуыр кæнын. Мæн уырны æмæ ахуырмæ чи ацыд, уыдон нæ республикæйы кæй ссардзысты кусæн бынæттæ. Фидæны дæр кусдзыстæм афтæ, цæмæй паддзахады домæнмæ гæсгæ ахуырмæ æрвитæм нæ фæсивæды. Стыр бузныг Цæгат Ирыстон-Аланийæн – немæ æмгуыст кæнынц. Уым нæ сывæллæттæй ахуыр кæны тынг бирæ æндæр æмæ æндæр уæлдæр ахуыргæнæндæтты. Ис нын хæларадон ахастытæ, уыдон нæм æрцæуынц æмæ сæм мах дæр ацæуæм хъуыддагон балцыты.

Абон куыст ссарын у тынг зын. Республикæ афтæ стыр нæу æмæ нæм курдиатджын фæсивæд та бирæ ис. Уымæн фæдзурын: æгæр тынг арæх æвзарæм иу кæнæ иннæ дæсныйад. Зæгъæм нæ хъæуы дыууæ экономисты, фæлæ нæм æрцæуы дæс. Кæй зæгъын æй хъæуы, уыцы дыууæ ссардзысты куыст æмæ иннæтæ та нæ, кæнæ та фенхъæлмæ кæсынц, сæ рад кæд æрцæудзæн æмæ кусын кæд райдайдзысты, уымæ. Стæй ма иу хъуыддаг: уæлдæр ахуыргæнæндоны рауагъдон бирæ рæстæг куыст куы нæ ссары, уæд нал фæцымыдис кæны уыцы хаххыл бакусын. Хъыгагæн, ахæмтæ дæр нæм арæх вæййы. Æмæ та йæ ногæй бахъæуы ахуыр кæнын, йæхиуыл бакусын. Уый у стыр æмæ арф проблемæ. Ис дзы пенсион кары фарст дæр. Ацы фарсты дæр нæ хъæуы куырыхондзинад равдисын, кæрæдзи бамбарын. Хъæуы нæ баххуыс кæнын фæсивæдæн, уымæн æмæ уыдоныл баст у нæ сомбон. Кæд бынтон нæ, уæддæр хистæр кары адæмæн сæ хæс у æмæ фæкæсой æвзонг специалисттæм. Цыфæнды сырх дипломимæ рауагъдон ма ‘рцæуа, уæддæр æм нырма нæ вæййы куысты фæлтæрддзинад, ома, куыст куыд домы, афтæ йæ куыст æххæст кæна. Сусæггаг нæу, æмæ махмæ абон ацы хъуыддагмæ кæй кæсынц зæрдæхсайдимæ, ома, бирæтæн сæ цæст нæ фæуарзы æвзонг специалисттæм сæ хъус æрдарын.

– Пенсиисæг ахуыргæнджыты тыххæй фæстаг рæстæджы арæх цæуы дзырд. Куыд уыдзæнис сæ уавæр?

– Уыдонæй алкæимæ дæр индивидуалон куыст кæнæм. 65-аздзыдæй мах куыстæй никæй фервитæм. Фæлæ семæ саразæм бадзырдтæ иу азæй фондз азы æмгъуыдмæ. Ис нæм ахæм пенсион кары кусджытæ æмæ æнæ уыдон никуыд нæй гæнæн. Уыдон, афтæ зæгъæн ис, æмæ æнæзивæгдæр вæййынц сæ куысты æрыгон кусджытæй. Ис дзы ахæм пенсийы кары ахуыргæнджытæ дæр, кæцытæ æрмæстдæр исынц мызд. Мах алцы дæр хорз æмбарæм, фæлæ рæстæг дæр йæхион домы.

Цхинвалы районы нæм пенсиисджытæ-къухдариуæггæнджытæй фондз адæймагæй сæхæдæг æрбарвыстой, сæ бынæттæ сын чи раива, ахæм кандидатурæтæ. Уыдон æнтыстджынæй рацыдысты аттестаци. Фæлæ уыцы пенсиисджытæ дæр нæ ацæудзысты скъолайæ. Уыдон дæр кусдзысты скъолаты æмæ сæ куысты фæлтæрддзинад рæдауæй амондзысты, сæ бынæттæм чи ‘рбацæуа, уыдонæн.

Банысан кæнын хъæуы уый дæр, æмæ ацы аз республикæйы ахуыргæнæн уагдæттæм кусынмæ кæй ‘рбацæудзæн 22 æрыгон кусæджы.

– Дзауы скъола-интернаты агъуысты ивгъуыд аз æрцыд зынгсирвæзт. Ныййарджытæ катай кæнынц, зæгъгæ сæ сывæллæттæ дарддæр куыд ахуыр кæндзысты ахæм бæстыхайы. Куыд скъуыддзаг кæндзысты ацы скъолайы хъуыддаг?

– Ацы скъола нымад цæуы хорз скъолайыл. Ис дзы хорз ахуыргæнджытæ, ахуыр-хъомыладон куыст дæр  – æмбæлон æмвæзадыл. Уыдис зынгсирвæзт, басыгъдысты дыккаг уæладзыджы систæ. Скъола-интернаты фарст лæууы Хицауады раз æмæ йын агуырынц фадæттæ, цæмæй йæ ногæй саразой. Алыгъуызон хъуыдытæ сæм ис йæ саразыны тыххæй. Афтæ мæм кæсы, æмæ кæд ацы аз нæ, уæддæр ын фидæнмæ амæлттæ кæй скæндзысты æмæ йæм кæй æрæвналдзысты.

– Зæгъут-ма нын, абоны онг уæм цал куырдиаты ис фыццагкъласонтæй?

– 1-æм сентябрмæ нæм æрбацæудзæн 620 фыццагкъласоны. Фæлæ нырма сентябры кæрæттæм ацы нымæц фæивдзæн. Гæнæн ис, æмæ фæфылдæр кæнæ фæкъаддæр уа. Уый царды уавæртимæ баст у. Чизоны, искæцы бинонтæ ацæуой цæрынмæ æндæр ранмæ æмæ афтæ иннæрдæм дæр. Уымæ гæсгæ уал нæм абон ис 620 сывæллоны. Уый та у ивгъуыд ази-мæ абаргæйæ фылдæр нымæц.

– Бирæ хатт фыстам, зæгъгæ, рауагъдмæ цæт-тæ цæуы ахуыргæнæн чиныг Хуссар Ирыстоны историйæ. Куыд зонæм, афтæмæй нырма уыцы чиныг нæ рауагътой, кæд фендзæн рухс ацы чиныг?

– Ацы хъуыддагмæ фæрсæрдыгæй куы бакæсай, уæд афтæ зыны, цыма æнцонтæй аразгæ у. Æрмæст хъæуы æрбадын нæ ахуыргæндты æмæ йæ ныффыссын. Фæлæ фарст афтæ хуымæтæг нæу. Мах ацы хъуыддаджы фæдыл сарæзтам къамис, кæцыйæн йе сконды сты историйы хуыздæр ахуыргæнджытæ. Уыдон рахастой ахæм вердикт: ахуыргæнæн чиныджы æвзаг у зын æмæ вазыгджын скъоладзаутæн. Уый хыгъд, ахуыргæнинагæн та хъуамæ уа цымыдисон æмæ йæ ахуыр кæна сæрибарæй, æхцонæй. Раст у, æцæгдæр зын кæсæн у скъолайы кары сывæллæттæн. Уымæ гæсгæ мах фыстæг дæр арвыстам æмбæлон уагдæттæм. Ацы фарст æз куыд зонын, афтæмæй иу æмæ дыууæ хатты не ‘вæрдтой нæ ахуыргæндтæ, зонад-иртасæн институты кусджытæ. Уымæ гæсгæ чиныг цæуы корректировкæ. Иу хатт ма йæ зæгъон, ацы чиныг ныридæгæн кæй хъуамæ рацыдаид, фæлæ нæ ахуыргæнджыты домæнмæ гæсгæ фæстиат кæны. Фæлтау афæстиат уæд æмæ сывæллæттæн куыд æмбæлы, афтæ æнцон æвзагыл уагъд æрцæуæд, цæмæй стæй ма фæсмон кæнæм.

Ахæм æнгæс проблемæ ис Хуссар Ирыстоны географийы ахуыргæнæн чиныгимæ дæр. Ацы проблемæмæ дæр нæ хъус дарæм, арæзт æрцыдис къамис дæр. Йе сконды сты Габаты Владимир, Чилæхсаты Екатеринæ æмæ æндæртæ. Уыдон кусынц ацы проектыл. Хуссар Ирыстоны географи кæцы кълæсты ахуыр кæндзысты, уый фылдæрбæрцæй кæнгæ у, чиныджы гуырахст цæй бæрц уа, уымæ гæсгæ. Хуссар Ирыстоны историйы та ахуыр кæн-дзысты хистæр кълæсты.

– Скъолаты фæлварæнтæ радтыны тыххæй исты ивындзинæдтæ рацæудзæнис æмæ цы формæйы уыдзысты?

– Мæ бон фидарæй зæгъын у æмæ нæм уыцы хъуыддаджы ивындзинæдтæ кæй не ‘рцæудзæн. Æз афтæ хъуыды кæнын, иууыл оптималондæр æмæ эффективондæр сты дзыхæйдзургæ æмæ фыссынæй экзаментæ (устно, письменно). Уымæн æмæ ахуыргæнæг æмæ ахуыргæнинаджы комкоммæйон контакт у хуыздæр. Дзырд куы цæуа ИПФ-йыл (ЭГЭ), уæд мах алкæмæн дæр бар дæттæм, цæмæй уыцы-иу рæстæджы уый дæр радтой. Декабры мах фехъусын кæндзыстæм скъолаты уый тыххæй æмæ кæйдæриддæр фæнда, уыдонæн сæ бон у махмæ æрбахатын æмæ уыцы хъуыддаджы фæдыл бацæттæ кæндзыстæм номхыгъд  уый фæстæ сæ ратдзыстæм Цæгат Ирыстонмæ. Уыдонæн фадат уыдзæн, цæмæй радтой иууон паддзахадон фæлварæн (ЕГЭ).

– Дæрддаг хъæутæ та куыд ифтонг сты кадртæй?

– Ахæм скъолатæ ахуыргæнджытæ куынæ ссарынц, уæд сын вæййы пайдадæр (худы министр), уымæн æмæ иннæтæ райсынц уыцы сахаттæ æмæ сæ бакусынц.

Кæй зæгъын æй хъæуы, дæрддаг хъæутæм тынг зын у ахуыргæнджытæ ссарын. Хъуамæ сын ссарæм, æхсæвиуат кæм кæной, ахæм цæрæн бынæттæ дæр. Мах саразæм афтæ: кæнæ сын сæ фæндаггæгтæ бафидæм, кæнæ та сын администраци хъуамæ рахицæн кæна цæрæн бынæттæ. Æхсызгон нын у, цалдæр æрыгон лæппуйы нæм кæй æрбахатыдысты, дæрддаг хъæутæм цæттæ кæй сты ацæуынмæ æмæ ахуыргæнджытæй бакусынмæ, уый. Фæлæ ацы аз хъуыддаг бирæ фæкарздæр ис дипломтимæ. Махæн нæ бон нæу æмæ йæ дипломы æрмæст 3-тæ кæмæн ис, ахæмы райсæм ахуыргæ-нæгæй. Ныртæккæ сывæллæттæ сты размæцыд æмæ сын сæ разы лæмæгъ ахуыргæнæджы æрлæу-уын кæнæм, уый бар нын нæй. Уæд ма цæмæ дзурæм ахуырады æмвæзад фæбæрзонддæр кæныныл. Мах кусæм ахуыры гъæд фæхуыздæр кæныныл. Ацы хъуыддаджы кусæм нæ университетимæ дæр, цæмæй студент куыддæртæй ма райса йæ диплом, фæлæ йæ райса æмбæлон æгъдауæй.

Республикæйы Ахуырад æмæ зонады министр ма журналистты къорд фарстытæн радта бæстон дзуаппытæ. Кæронбæттæны та нæ паддзахады æппæт адæмæн дæр раарфæ кодта ног ахуыры азы æрбалæуды цытæн æмæ сын йæ цæст бауарзта фидар æнæниздзинад æмæ сæ ног ахуыры азы стыр æнтыстытæ.

ЦХУЫРБАТЫ Л.

Comments are closed, but trackbacks and pingbacks are open.