Цхинвалы районы Культурӕйы управлени (йӕ сӕргълӕууӕг Гаглойты Ростислав) архайы, цӕмӕй культурон уагдӕтты куыст уа хорз ӕмвӕзадыл ӕмӕ цӕрджытӕ хайджын уой йӕ ахадӕн хӕрзиуджытӕй. Уыдӕттӕ зӕрдыл даргӕйӕ, районы культурæйы разамонджытӕ банкъардтой фылдӕр бӕрндзинад ӕмӕ цасдӕрбӕрцӕй фӕхуыздӕр кодтой сӕ куыст, фӕхъӕздыгдӕр сӕ аивадон программæ.
Районы архайынц хореографион ансамбль «Амонд», ирон фӕндыры къорд, вокалон-инструменталон ансамбль ӕмӕ ӕндӕртӕ. Уыдон сӕ аивадимӕ зонгӕ кӕнынц ӕмӕ сӕ ралӕудтытӕй барухс кæнынц канд сæхи районы хъӕуты нӕ, фӕлӕ ма республикӕйы иннæ районты ӕмӕ уымӕн ӕдде сценӕмӕкӕсджыты зæрдæтæ дæр. Уымӕй дарддӕр ма хъӕууон Культурӕйы хӕдзӕртты цы хӕдархайгӕ аивадон къордтӕ ис, уыдон дӕр сӕхи хорз бацӕттӕ кӕнынц зӕрдылдарӕн бӕрӕгбонтӕм ӕмӕ сӕ программӕимӕ базонгӕ кӕнынц бынӕттон цӕрджыты.
Культурӕйы уагдӕтты куыст ноджы фӕхуыздӕр ӕмӕ фӕмидисджындӕр кӕныны нысанӕн Гаглойты Ростислав бахӕс кодта йӕ дӕлбаруӕвӕг кусджытӕн, цӕмӕй цӕуой районы иу кӕнӕ иннӕ хъӕууон клубтӕм ӕмӕ сын ӕвдисой концерттӕ. Цӕвиттон, Дменисы Культурӕйы хӕдзары аивадон коллектив ӕрӕджы уыд Къостайыхъӕуы ӕмӕ сӕ зӕрдӕмӕ-дзӕугӕ ралӕудтытӕй райгондӕй баззадысты бынӕттон аивадуарзджытӕ. Хицӕн ӕмӕ хицӕн аивадон коллективтӕ ма ахӕм концерттӕ равдисдзысты Дменис, Зар, Гром ӕмӕ ӕндӕр хъӕуты фӕллойгӕнджытӕн. Фӕстӕ нӕ фӕлӕудзӕн «Амонд»-ы коллектив дӕр ӕмӕ уый дӕр йӕ цымыдисон концерттӕй барухс кæндзæн бынӕттон аивадуарзджыты зæрдæтæ. Зӕгъын хъӕуы уый, ӕмӕ ацы коллективтӕ концерттӕ цӕрджытӕн кӕй ӕвдисынц лӕвар.
Гаглойы фырт ма куыд банысан кодта, афтӕмӕй уый фӕстӕ та баныхас кӕндзысты республикӕйы иннӕ районты Культурӕйы сӕргълӕуджытимӕ ӕмӕ уӕд уымы цӕрӕг адæмæн та ахӕм цымыдисон концерттӕ равдисдзысты аргъыл.
Хуыбиаты Никъала
Comments are closed, but trackbacks and pingbacks are open.