Цæгат Ирыстоны фæбæрæг сты регионы Бæстæйы Сæргълæууæджы æрвылазон премийы уæлахиздзаутæ.
Дзыллон информацийы фæрæзты минæвæрттæн сæ профессионалон бæрæгбоны – уæрæсейаг мыхуыры боны фæдыл раарфæ кодта республикæйы разамонæг Битарты Вячеслав. «Дзыллон информацийы фæрæзты минæвæрттæ сты хицауад æмæ æхсæнад бæттæг цæг. Адæммæ информаци сымах фæхæццæ кæнут, æргом кæнут адæмы царды иууыл риссагдæр фарстатæ. Уæ ныхасæн стыр ахадындзинад ис. 2020 азы дуне ног коронавирусон инфекцийы пандемийы азары куы бахауд, уæд дзыллон информацийы фæрæзты раз æвæрд æрцыд сæрмагонд нысан – цауты æппæтвæрсыгæй æмæ объективонæй равдисын. Уæ æмзæрдæ æмæ зæрдæргъæвд куысты руаджы республикæйы цæрджытæм хæццæ кæны уырнинаг информаци. Стыр бузныг уын зæгъын ахæм ахсджиаг æмæ хъæугæ куысты тыххæй», – бахахх кодта Битарты Вячеслав.
Республикæйы сæргълæууæджы премийы лауреатты хыгъды ис «15-æм Регион»-ы уацхæссæг Бæззаты Алинæ, уый фæуæлахиз «Кад æмæ намыс»-ы номинацийы йæ куыст «Сæрыстырæй дохтырты тыххæй. Дойаты Денис – йæ куыст тагъд æххуысы клиникон рынчындоны «Чъизи зонæ»-йы тыххæй. Амынд номинацийы ма хорзæхджын æрцыдысты дзыллон информацийы фæрæзты цыппар минæвары. Номинаци «Афæдзы темæ Уæрæсейы – мысæнуаты æмæ кады аз»-ы хорзæх республикæйы сæргълæууæджы къухтæй райстой цыппар журналисты, номинаци «Иудзинад»-ы хорзæх та – Хуссар Ирыстоны фӕсивӕдон газет «Республика» -йы журналист Цхуырбаты Мӕдинӕ, йæ куыст «Север-Юг Алании. Единство судеб сквозь столетия»-йы тыххӕй.
«Тынг ӕхсызгон мын у, ацы хорзӕхы аккаг мӕ кӕй скодтой. Стыр бузныг мӕ загъын фӕнды сӕрмагондӕй мӕ редактор Хъоцыты Андрейӕн. Стӕй ма Цӕгат Иры разамонӕг Битарты Вячеславӕн, ӕнӕхъусдард кӕй нӕ уадзы Хуссары журналистты, уый тыххӕй», – загъта премийы лауреат Цхуырбаты Мӕдинӕ.
Дыууæ журналисты рамбылдтой номинаци “Фидæны траектори/ Фидæн”-ы, номинаци “Сисы афæлвæрд”-ы та бæрæггонд æрцыд иу лауреат. Уымæй уæлдай, Цæгат Ирыстоны Сæргълæууæджы арфæйы ныхасæй Цæгат Ирыстоны пайдайæн куысты тыххæй æмæ ре-гионалон журналистикæйы райрæзтмæ егъау æвæрæн бахæссыны тыххæй райстой «15-æм Регион»-ы уадзæг редактор Бигъуылаты Аннæ æмæ порталы уацхæссæг Коцты Альбинæ.
Хорзӕх кӕныны церемони ацыд Дзӕуджыхъӕуы Национ музейы бӕстыхайы ӕмӕ йӕ ӕрӕмных кодтой Уӕрӕсейы дзыллон информацийы бонмӕ, кӕцы нысан цӕуы 13 январы.
Преми лӕвӕрд цӕуы ныр ӕртыккаг аз, уымӕй размӕ азты премийы хицау баисты журналисттӕ газеттӕ «Республика» ӕмӕ «Южная Осетия»-йæ.
ДРИАТЫ Лейла
Comments are closed, but trackbacks and pingbacks are open.