Ныртæккæ цард размæ уыййас ацыдис, ног технологитæ афтæ тагъд рæзынц æмæ йемæ æмдзу куынæ кæнай, æдзух дæхиуыл куынæ кусай, уæд фæстейæ баззайдзынæ. Уый хауы дзыллон-информацийы фæрæзтæм дæр. Фæстаг азты дзы уыййас ногдзинæдтæ фæзынд æмæ, знон цы системæйæ куыстам, уый абоны домæнтæн дзуапп нал дæтты.
Æппæт уыдæттæ, стæй иумæйагæй Ирыстоны дзыллон хабархæссæг фæрæзты куысты уавæр адæмы размæ рахæссыны фæнд скодтой дыууæ Ирыстоны журналисттæ сæ иумæйаг дунеон зонадон конференци “Медиа Цæгат – Хуссар. Цæгат æмæ Хуссар Ирыстоны медиатыгъдады архитектоникæ: журналистикæ, сфæлдыстад, системæ”. Арæзт æрцыд Цæгат Ирыстоны Национ ахастдзинæдты æмæ Мыхуыры æмæ дзыллон коммуникациты комитеты хъæппæрисæй. Ахæм иумæйаг мадзæлттæ арæхæй-арæхдæр кæй кæнынц, уымæн ма стыр ахъаз фæцис ивгъуыд аз дыууæ республикæйы Информаци æмæ дзыллон коммуникациты паддзахадон комитетты ‘хсæн æмгуыстады бадзырд бафыссын дæр.
Конференцийы архайдтой Цæгат Ирыстоны дзыллон информацийы фæрæзтæ, мыхуыры комитеты хицау Фидараты Юрийы разамындæй, республикæ Беларусы Журналистты цæдисы сæрдар Андрей Кривошеев, Хуссар Ирыстоны мыхуыры фæрæзты стыр делегаци, йæ сæргъы газет “Хурзæрин”-ы сæйраг редактор Гæбæраты Юри, стæй Дзæуджыхæуы æмæ республикæйы районты æппæт журналтæ, газеттæ, телеуынынад, интернет, радиойы дзыллон хабархæссæг фæрæзты минæвæрттæ. Фембæлды нысан уыд Цæгат æмæ Хуссар Ирыстоны дзыллон хабархæссæг фæрæзты ‘хсæн ноджы æнгомдæр бастдзинæдтæ аразын, кæрæдзи фæлтæрддзинадыл ахуыр кæнын, æмгуыстад фидар кæнын, ног инновацион технологитæ æмæ национ мыхуыры проблемæтыл æрдзурын.
Мадзал байгом кодта æмæ йæ амонæг уыди ЦИПУ-йы журналистикæйы факультеты декан Хæбæлаты Фатимæ. Уый куыд банысан кодта, афтæмæй Цæгат æмæ Хуссар Ирыстонæн иумæйаг у сæ истори, сæ культурæ, æвзаг, æгъдæуттæ. Уый та у æмгуыстады сæйраг бындур. Дарддæр дæр мыхуыры фæрæзтæн цавæр бастдзинæдтæ уыдзæн, уый у нæхицæй аразгæ.
Фидараты Юри арфæ ракодта конференцийы архайджытæн. Уый куыд бафиппайдта, афтæмæй дыууæ республикæйы журналистикæйы куыст бæрзонд æмвæзадыл æвæрд куы уа, уæд, канд æмгуыст нæ, фæлæ уыдон æнæкъуылымпыйæ дунейæн хъусын кæндзысты Ирыстонæн йæ цин, йæ хъыг, йæ бæллицтæ, йæ лыггæнинаг фарстатæ. Уый та у бæрнон хъуыддаг æмæ йын ис стыр нысаниуæг.
Хуссар Ирыстоны делегацийы разамонæг Гæбæраты Юри куыд загъта, афтæмæй махæн стыр Уæрæсе куынæ уа, уæд фесæфдзыстæм, уымæн æмæ армы дзаг йедтæмæ не стæм. “Фæлæ уæддæр сæйрагдæр у нæ кæрæдзи уарзын. Дыууæ Ирыстоны сты хордзены бастау. Сæ иу куы ‘рхауа, уæд иннæмæн дæр æнæ ‘рхаугæ нæй. Иумæйаг хъуамæ уа нæ цин дæр æмæ нæ хъыг дæр. Мæнæн æхсызгон у, абон ацы мадзалы бирæ фæсивæд кæй ис, уый. Уый нысан кæны Ирыстоны журналистикæйæн фидæн кæй ис æмæ размæ æнтыстджынæй кæй цæуы”.
Газет “Рæстдзинад”-ы сæйраг редактор Хозиты Барис бæлвырддæр æрлæууыд Ирыстоны национ мыхуыры историйыл: “Раздæр азты газет куыд зын уадзæн уыди, уый журналистты хистæр фæлтæр хорз зонынц. Фæлæ абоны ног технологитæ бирæ фенцондæр кодтой газеты куыст. Компьютер аивта газеты цæсгом, интернет стыр ахъаз у журналистты куыстæн. Дзыллон хабархæссæг фæрæзты хæс та у сæ нацийы цæсгом равдисын, нæ культурæ æмæ традицитæ адæммæ рæсугъдæй хæццæ кæнын. Кæй зæгъын æй хъæуы, бирæ цæлхдуртæ ис нæ размæ, уыдон иумæйаг сты дыууæ Ирыстонæн: национ мыхуыры фæрæзтæ æвзарынц зындзинæдтæ, уацхæсджытæ цæттæ кæныны дæр ис къуылымпыдзинæдтæ, æбæрæг у мыхуыры фидæн, фæлæ уал абон мах хъуамæ кæрæдзийæн æххуысгæнгæйæ архайæм Ирыстоны журналистикæйы фидæныл æмæ уæд нæ къухы æнæмæнг бафтдзæн æнтыстытæ” .Хозиты Барис ма йæ ныхасмæ куыд бафтыдта, афтæмæй ЦИПУ-йы журналистикæйы факультет цæттæ кæны дыууæтомон чиныг “История осетинской журналистики”, зæгъгæ, æмæ рæхджы мыхуыры рацæудзæн.
Ирон æхсæнады дзыллон хабархæссæг фæрæзты нысаниуæджы, Хуссар Ирыстоны информацион политикæйы, социалон-экономикон æдасдзинады, Хуссар Ирыстоны журналистикæйы рæзты, Цæгат æмæ Хуссар Ирыстоны ‘хсæн медиатыгъдады уавæры тыххæй мидисджын ныхас ракодтой Хуссар Ирыстоны делегацийы уæнгтæ: Парламенты Национ политикæ, культурæ æмæ дины комитеты сæрдар Диакъонты Амиран, газет “Южная Осетия”-йы сæйраг редакторы хæдивæг Тыбылты Инал, агентад Спутникы разамонæг Виталий Раднаев æмæ паддзахадон университеты телеуынынады уацхæссæг Кокойты Анна.
Газеты æвзаджы сыгъдæгдзинады фарстатæ конференцийы архайджыты размæ рахаста газет “Северная Осетия”-йы сæйраг редактор Битарты Маринæ, æрыгæттæн газетимæ цавæр æнгом бастдзинæдтæ ис, уый фæдыл загъта фæсивæды газет “Слово”-йы сæйраг редактор Олисаты Альбинæ, районты газетты уавæры тыххæй радзырдта Кировы районы газет “Размæ”-йы сæйраг редактор Басаты Иринæ, литературон журналтæ нырыккон технологиты дуджы цы зындзинæдтæ æвзарынц, уый фæдыл уыд йæ раныхас журнал “Дарьял”-ы сæйраг редактор Цхуырбаты Аланæн, дзыллон хабархæссæг фæрæзтæ экстремизмы ныхмæ куыд архайынц, уый фæдыл доклад скодта Цæгат Кавказы хæххон металлургион институты истори æмæ барады кафедрæйы хистæр ахуыргæнæг Золойты Зæринæ æмæ æндæртæ.
Регионалон журналистикæйы уавæр æмæ йæ фидæныл мидисджын уыд йæ доклад беларусаг уазæг Андрей Кривошеевæн дæр.
Конференцийы æппæт архайджытæн сæ ныхасы темæ кæд алыхуызон уыд, уæддæр здæхт уыд иу нысанмæ: фæстаг азты мыхуыры фæрæзты “аныхъуырдта” интернет. Традицион журналистикæ фаг никæмæ уал кæсы, алкæй дæр хъæуы ногæй-ногмæ диссæгтæ. Дзыллон коммуникациты фæрæзтæ хæсджын сты, цæмæй бæрнондæрæй бахъахъхъæной журналистикæйы традицитæ ног информацион технологитыл æнцой кæнгæйæ, стæй Цæгат æмæ Хуссар Ирыстоны ‘хсæн æмгуыстадон бастдзинæдтæ фидар кæной.
Конференцийы куысты, хъыгагæн, бæлвырд ныхас нæ уыд мыхуыры фæрæзтæ рафыссыныл. Уый та журналистикæйы куысты сæйраг рахæцæн кæй у, уый рох кæнын нæ хъæуы. Дзырд дæр ыл нæй, ног информацион технологитæ хорз сты, фæлæ газетты тираж уыдоны, стæй бæрзонд æргъты аххосæй кæй хауы, нæ дзуринаг тынгдæр уыдоны тыххæй хъуамæ уыдаид. Газет рафыссæг куынæ уал уа, уæд сæ кæмæн уадзæм? Ацы конференцийы архайджытæ сидт куы бацæттæ кодтаиккой Уæрæсейы постмæ, уæд мадзалы куыст рауадаид ахадгæдæр. Кæрæдзийæн нæ ныхæстæ фæкæнæм æмæ та уымæй нæ куыст фæвæййæм…
Джусойты Нинæ
Comments are closed, but trackbacks and pingbacks are open.