Мыхуыры хæдзары пресс-центры РХИ-йы Информаци æмæ мыхуыры комитет 2018-æм азы сæ бакæнгæ куысты фæдыл – ауагъта хыгъдон æмбырд.

Комитеты сæрдар Хъотайты Мария йæ раныхасы цыбыртæй радзырдта ивгъуыд аз комитеты куысты цы ивындзинæдтæ æмæ ногдзинæдтæ  фæзынд, уыдæттыл. Загъта, зæгъгæ, комитеты дæлбар цы дæс уагдоны ис, уыдонæн сæ куыстæн æнæхъæн азы дæргъы кæй уыдис хорз фæстиуджытæ. Уый фæстæ афæдзон хыгъд бакаст комитеты республикæйы дзыллон информацийы фæрæзтæ, полиграфи æмæ рауагъдады куысты фæдыл хайады сæргълæууæг Гæбæраты Аленæ. Уый куыд банысан кодта, афтæмæй 2018-æм азы комитет сæйраджыдæр куыста нырыккон, оперативондæр информацион системæ саразыныл æмæ дзыллон информацийы паддзахадон фæрæзты материалон-техникон базæ хуыздæр кæныныл. Ахсджиаг нысаниуæг лæвæрд цыдис республикæйы æддагон информацион политикæйæн, фыццаг рады Хуссар Ирыстоны æвæрццаг имидж аразынæн.

Хыгъдон рæстæджы Информаци æмæ мыхуыры комитет бынæттон журналисттæн сорганизаци кодта тренингтæ. Профессионалон журналист Гусаты Линæйы руаджы уагъд æрцыдысты мастер-класстæ журналистикæйы ахæм темæтыл, куыд «Жанровая палитра», «Политический пиар», «Юридическая культура журналиста». Тренингты сæйраг нысан уыдис –  республикон дзыллон информацийы фæрæзты куыст, ома, информаци адæттыны метод фæсарæйнаг стандарттæм гæсгæ ракæнын, уымæн æмæ уы-дон нырмæ ахуыр уыдысты советон дуджы методæй кусыныл. Уымæй дарддæр ма 2018-æм азы апрелы мæйы радио «Ир-фм»-ы уагъд æрцыдысты Цæгат Ирыстон-Аланийы адæмон артист, диктор Мамсыраты Тасолтаны, мастер-класстæ, цæмæй радиойæн бацæттæ кодтаиккой резервон кадртæ. Тренингтæ ма бынæттон журналисттæн ауагъта дунеон информацион агентад «Россия сегодня»-йы ахуыргæнæн программæты къухдариуæггæнæг Олег Щедров. Уый журналистикæйы фадыджы 30 азы архайды куысты фæлтæрддзинад цæстуарзонæй дих кодта уыдонæн. РХИ-йы Информаци æмæ мыхуыры комитет æмæ информацион агентад «Спутник»-ы æхсæн Сразыдзинад бафыссыны фæлгæтты, комитет хуссарирыстойнаг журналистты сæ квалификаци фæбæрзонддæр кæныны тыххæй арвыста РИА-Новостимæ.

Хыгъдон рæстæджы Информаци æмæ мыхуыры комитеты æддагон информацион æмæ æхсæнадон бастдзинæдты фæдыл хайады аккредитацигонд рацыдысты Уæрæсейы Федераци æмæ фæсарæйнаг бæстæты дзыллон информацион фæрæзты 156 минæвары. Уыдонæй Интерфакс, ТАСС æмæ Осетия-Ньюсрайстой æдзухон аккредитаци. Уæлдæр банысангонд хайад æрвылмæй дæр журналисттæн цæттæ кодтой информацион плæнттæ, кæцытæ уагъд цыдысты комитеты руаджы. Уыдон уыдысты пресс-конференцитæ, брифингтæ, презентацитæ æмæ пресс-туртæ. Ацы куысты плæнтты руаджы бæрæг фæфылдæр сты закъондæттынадон æмæ æххæстгæнæг хицауиуæгады тыххæй публикациты нымæц.

Ивгъуыд 2018-æм азы иумиагæй сис-гæйæ паддзахадон комитет ауагъта 25 пресс-конференцийы, 22 брифингы, 5 тымбыл фынджы, 3 пресс-туры, чингуыты 3 презентацийы. Æнæхъæн аз паддзахадон дзыллон информацийы фæрæзты мадзæлтты фæстиуджытæм гæсгæ мыхуыргонд æрцы-дис 351 æрмæджы æмæ 68 репортажы та –  телеуынынады.

2018-æм азы майы кæрон Цæгат Ирыстон-Аланийы дзыллон информацийы фæрæзты журналисттæн организацигонд æрцыдис пресс-тур. Пресс-туры рæстæджы журналисттæ Хуссар Ирыстоны бацыдысты   æндæр æмæ æндæр куыстуæттæ æмæ уагдæттæм. Пресс-туры кæрон дыууæ æфсымæрон республикæйы журналисттæ тымбыл фынгы ныхас кодтой РЦИ-Алани æмæ Республикæ Хуссар Ирыстоны иууон информацион тыгъдад аразыны тыххæй. Йæ фæстиуджытæм гæсгæ цæгатирыстойнаг дзыллон информацийы фæрæзты мыхуыргонд æрцыдис 13 æрмæджы æмæ 3 репортажы та – телеуынынады. Фыццаг хатт, ома, ахæм æнгæс мадзал арæзт æрцыдис хуссарирыстойнаг журналисттæн дæр горæт Дзæуджыхъæуы. Уæд дыууæ комитеты сæрдæрттæ – Хъотайты Мария æмæ Фидараты Юри сæ къухтæ бафыстой æмгуысткæнынады тыххæй Сразыдзинадыл.

Ивгъуыд аз ма майы мæйы райдианæй суанг августы кæронмæ паддзахадон комитеты кусджытæ Уæрæсейы æмæ фæсарæйнаг дзыллон информациты фæрæзты минæвæрттæн æххуыс кодтой сæ куысты. Журналисттæ бацæттæ кодтой репортажтæ, документалон фильмтæ гуырдзиаг-ирон хæстыл дæс азы сæххæсты боны цытæн.

Хуссар Ирыстоны хæдбардзинад банымайыныл дæс азы сæххæсты бæрæгбоны цытæн комитеты аккредитаци æрцыдысты 95 уæрæсейаг æмæ фæсарæйнаг дзыллон информациты фæрæзтæ.

Докладгæнæг ма куыд банысан кодта, афтæмæй уыдон контроль кодтой бынæттон дзыллон информацийы фæрæзты куыст æмæ мониторинг куыд сбæрæг кодта, уымæ гæсгæ газеттæ «Южная Осетия» æмæ «Хурзæрин»-ы æнæмæнг фæфылдæр кæнын хъæуы аналитикон æмæ актуалон авторон æрмæджытæ.

Æрвылбон социалон хызæгты ног кодта комитеты фарс, цыран бæрæг фæфылдæр ис йæ кæсджыты нымæц. Куыд банысанчындæуыд, уымæ гæсгæ хъæуы саразын, цæмæй куыст цæуа системон æгъдауæй. Уымæн æмæ социалон хызæгтæ сты информаци парахат кæныны хъуыддаджы иууыл перспективондæр фæдыздæхæн.

Информаци æмæ мыхуыры паддзахадон комитет ивгъуыд аз срегистраци кодтой дыууæ газеты – «Фарн» æмæ «Боевое содружество». Æхгæд та æрцыдысты 4 партион газеты: «Единство», «Единство народа», «Новая Осетия», «Аланы». Газеттæ æхгæд æрцыдысты сæ бындурæвæрджыты куырдиæттæм гæсгæ.

«Мыхуыры хæдзар»-ы куыстыл дзургæйæ, Гæбæраты Аленæ банысан кодта, зæгъгæ, 2018 азы планмæ гæсгæ ацы уагдон рауагъта 9 чиныджы, кæцытыл бахардз 2 милуан æмæ 654 мин сомы бæрц. Уыдон уыдысты нысаниуæгджын –  се ‘хсæн Хъуылымбегты Роберт æмæ Хъоцыты Андрейы чингуытæ «Южная Осетия. Год за годом» (500 экземплярæй), «Южная Осетия. Страна Солнца» (1000 экземплярæй) уагъд æрцыдысты, куыд лæвæрттæ уазджытæн, афтæ.

2018-æм азы Паддзахадон телерадиокомпани «Ир»-ы æрвылбонон ног хабæрттæй дарддæр бакуыста æндæр ног алæвæрдтыл æмæ пректтыл. Куыд, зæгъæм, ногазон программæ «Фарны изæр». Уымæй дарддæр ма сидзæр æмæ рынчын сывæллæтты номыл организаци æрцыд ногазон хæрзаудæн акци «Фонтан желаний».Бацæттæ кодтой аналитикон алæвæрд «Постскриптум», документалон фильм «Торез» æмæ æндæр ахсджиаг алæвæрдтæ.

Информацион агентад «Рес»-ы куыстыл дзургæйæ, докладгæнæг банысан кодта, бирæ æвæрццаг æууæлтæ кæй ис йæ куысты, зæгъгæ, иу бакастæй дæр бæрæг у, сайт хорзæрдæм кæй фæивта, кæй фæмидисджындæр. Уæрæхæй дзы æвдыст цæуынц нæ бæстæйы социалон-экономикон фарстытæ, политикæ, культурæ æмæ спорты фадыджы. Фæзындис дзы ног рубрикæтæ æмæ аналитикон æрмæджытæ. «Рес»-ы уацхæсджытæ ма сæ квалификаци фæбæрзонддæр кæныны тыххæй курсытæ рацыдысты горæт Дзæуджыхъæуы. Æввахс рæстæджы та фæнд кæнынц бакусын сайты ног версийыл æмæ социалон хызæгты сæ куыст уæрæхдæрæй цæуыны хъуыддагыл.

Паддзахадон комитеты дæлбар агентад «Югосетпечать»-ы сæйраг куыст баст у бынæттон æмæ уæрæсейаг рауагъдады продукци рафыссынимæ. Уыдон рæстæгыл бакодтой сæ куыст. Банысангонд æрцыдис, зæгъгæ, 2017 азимæ абаргæйæ, ивгъуыд аз кæй фæкъаддæр ис бынæттон газеттæ рафыссыны хъуыддаг.

Газет «Республикæ»-йыл дзургæйæ ныхасгæнæг банысан кодта, журналистты куыст фылдæр здæхт у æрцæугæ цаутæн анализ аразынмæ. Газеты фæрстыл уæрæхæй æвдыст цæуы бæстæйы æхсæнадон цард, республикæйы алыварсон архайд, культурон цаутæ, экономикæ, æндидзынад, спорт, тематикон интервьютæ. Стыр хъусдард здæхт цæуы истори, культурæ æмæ нæ адæмы царды уагмæ. Æнæхъæн азы дæргъы газет уагъта сæрмагонд фæрстæ сывæллæттæн æмæ спортуарзджытæн. Газетæн ис йæхи сайт дæр, кæцыйы руаджы ирон адæм республикæйæн æддейæ зонгæ кæнынц йæ æрмæджытимæ.

Газет «Хурзæрин»-ыл дзургæйæ, ныхасгæнæг банысан кодта, Президент Бибылты Анатолийы руаджы газетæн материалон æххуыс кæй цæуы. Газет рæстæгыл æмæ регулярон æгъдауæй æвдисы Хуссар Ирыстоны паддзахадон органты куыст. Уацхæсджытæ æдзух архайынц календарон æмæ æндæр нысаниуæгджын паддзахадон цаутæ, республикæйы цæуæг позитивон ивындзинæдтæ газеты фæрстыл æвдисыныл. Стыр хъусдард здæхт цæуы газеты фæрстыл националон, культурон, ирон традицитæ æмæ æгъдæуттæ пропагандæ кæнынмæ, ахуырады æмæ рæзгæ фæлтæры хъомылады фарстытæм. Фæстаг рæстæджы газеты фæрстыл фæзынд ног рубрикæтæ, куыд «Горæты цардæй», «Дæ цæст ахæсс дунейыл», «Бакæс, базон, дæхи аифхæрс». Рæстæгæй рæстæгмæ-иу газеты уацхæсджытæ ацыдысты республикæйы районтæм дæр æрмæджыты фæдыл. Коллектив архайдта, цæмæй газеты æддаг хуыз æмæ йæ мидис уыдаид цымыдисондæр.

Журнал «Фидиуæг»-ыл дзургæйæ, банысанчындæуыд,2018-æм аз сын æнтыстджын кæй уыдис, уый. Журналæн финансон æххуыс кæны нæ бæстæйы сæргълæууæг æрыгон фысджыты фарсмæ æрбалæууыны сæраппонд. Журналы тираж у 800 экземпляры. Мыхуыры органы сæйраг хæс уыд æмæ у литературон уацмыстæ мыхуыр кæнын. Коллектив сæ куысты хæстæ æххæст кодтой куыд æмбæлы, афтæ, фæлæ сын штаттæ кæй нæ фаг кæны, уый тыххæй-иу йæ номыртæ рацыдысты бафæстиатимæ. Журналы но-мыртæ уыдысты мидисджын æндæр æмæ æндæр рубрикæтимæ, нысан кæнынц ирон фысджыты юбилейтæ. Йæ коллектив архайы журналы мидис фæхуыздæр кæныныл.

Газет «Южная Осетия»-йы куысты тыххæй дæр банысангонд æрцыдис, рæстæгыл æмæ регуляронæй кæй æвдисынц нæ республикæйы паддзахадон органты куыст, уый. Уацхæсджытæ æдзух архайынц календарон æмæ æндæр нысаниуæгджын паддзахадон цаутæ, республикæйы цæуæг позитивон ивындзинæдтæ газеты фæрстыл æвдисыныл. Газеты уацхæсджытæ хайад истой комитеты бацæттæгонд мадзæлтты. Газеты алкæцы хайад дæр сфидар кодта куысты тематикон плæнттæ 2019 азы фыццаг кварталæн. Газетæн ма Абхазы республикæйы ис йæхи сæрмагонд уацхæссæг æмæ ныридæгæн аккредитацигонд рацыдис.

Уымæй дарддæр ма, цæмæй журналистты профессионалондзинад фæбæрзонддæр уа, уый тыххæй рацыдысты мастер-класстæ, кæцыты сорганизаци кодта комитет. 2018 азы кæрон газеты журналисттæ хайад райстой горæт Дзæуджыхъæуы уагъдцæуæг медиа-форум «Алания-Медия». Журналисттæ ма хайад истой комитеты бацæттæгонд конкурсты. Ивгъуыд азы кæрон арæзт æрцыдис газеты сайты ног верси. Азы кæрон ма газет «Южная Осетия» æмæ уæрæсейаг компани «Медиология»-имæ арæзт æрцыдис сразыдзинад партнерондзинады тыххæй.

Дарддæр ма дзырд цыдис полиграфион-кондадон баиугæнды куыстыл дæр. Куысты гъæдæн аргъ кæнгæйæ, банысангонд æрцыдис рауагъдады æвæрццаг динамикæ.

Цхуырбаты Ларисæ

 

Comments are closed, but trackbacks and pingbacks are open.