Æрвылаз дæр Хуссар Ирыстонæй Уæрæсейы Федерацийы Мидхъуыддæгты министрады уæлдæр ахуыргæнæндæттæм арвитынц скъолаты рауагъдонты æмæ милицийы кусджыты. Ацы аз дæр та нæ республикæйæн хицæн æрцыдис 20 бынаты æмæ РХИ-йы Мидхъуыддæгты министрад развæлгъау райдыдтой куырдиæттæ исын. Æдæппæт балæвæрдтой 40 куырдиаты бæрц.
Иннæ азтæм абаргæйæ, ацы аз фæлварæнтæ дæттын райдыдтой раздæр. 19-æм майы ХИПУ-ы бæстыхайы радтой фыццаг фæлварæн уырыссаг æвзагæй. Фæлварæн истой университеты проректор Тедеты Зæлинæ æмæ Хуссар Ирыстоны адæмон ахуыргæнæг Пухаты Аллæ. Сæ хъус ма сæм дардтой Мидхъуыддæгты министрады исæн къамис дæр. Фæлварæнмæ кæсыны бар уыд сæ ныййарджытæн æмæ æввахс хиуæттæн дæр.
Цæмæй фæлварæн объективон рауайа æмæ дзы фарстатæ макæмæ уа («фæсайдтой» кæнæ «иухуызон уавæрты нæ уыдысты абитуриенттæ»), уымæ гæсгæ диктанты текст алы къордæн дæр уыд иу. Æгæрыстæмæй ма текст дæр равзæрстой ныййарджытæ. Стæй ма фæлварæн гæххæттытæ дæр уыдысты мыхуыр æмæ сыл уыд номыртæ, цæмæй сын баивæн ма уа. Афтæмæй ахуыргæнæг дæр нæ фæзоны, кæй куыст раст кæны, уыцы абитуриенты. Развæлгъау ма сын æрæмбырд кодтой сæ телефонтæ дæр.
Фыццаг фæлварæны чи радта, уыдон ма дарддæр бахъæудзæн ноджы 2 фæлварæны радтын – æхсæнадзонынадæй æмæ историйæ. Уымæй дарддæр ма рацæудзысты медицинон ӕмӕ психологон басгӕрст дæр, æмæ равдисдзысты сӕ физикон арӕхстдзинад.
Ныр 12 азы дæргъы Хуссар Ирыстонæй æрвитынц курсанттæ Уæрæсейы уӕлдӕр ахуыргӕнӕндӕттӕм Мидхъуыддæгты министрады хаххыл æмæ фæстæмæ æрыздæхынц цæттæ специалисттæй. Ацы хъуыддагæн саразын бантыст Хуссар Ирыстон ӕмӕ Уӕрӕсейы Федерацийы Мидхъуыддӕгты министрадты ‘хсæн бадзырд бафыссыны руаджы. Ахуыры бынӕттӕ рахицӕн кæнынц Нижегородскы, Волгограды академитæм, Воронежы институтмӕ, Орловы ӕмӕ Ростовы юридикон институттæм.
Ахуырмæ чи ацæуы, уыцы курсантты хицауад алцӕмӕй дӕр сифтонг кӕны ӕмӕ сын ахуыр фӕуыны фӕстӕ та радтынц милицийы лейтенанты ном. Сӕ ахуыры рӕстӕг дæр нымад ӕрцӕуы куысты стажыл ӕмӕ ахуыры фӕстӕ та ӕрцӕуынц Хуссар Ирыстонмӕ æмæ адарддæр кæнынц сæ службæ барадхъахъхъæнæг органты.
Джиоты Александр
Comments are closed, but trackbacks and pingbacks are open.