Кæсæг-Балхъары Республикæйы Ероккойы хъæуы скъолайæн лæвæрд æрцыд авиацийы инæлар-майор Бедойты Руслан Александры фырты ном. Бедойы фырт уыд ацы республикæйы кадджын æмбæстаг.
Авиацийы инæлар-майор Бедойты Руслан райгуырд 1947 азы 12-æм апрелы Цæгат Ирыстоны Сунжæйы хъæуы. 1965 азы скъола æнтыстджынæй каст фæуыны фæстæ ахуыр кæнынмæ бацыд Ейскы тæхджыты уæлдæр æфсæддон авиацион ахуыргæнæндонмæ. Æфсæддон-уæлдæфон тыхты службæ кодта 30 азы дæргъы. Курсантæй схызт Прикарпатийы æфсæддон зылды авиацийы хистæры онг. Бедойы фырт дыууæ хатты æххæст кодта интернационалон хæс, Египет æмæ Йемены арв хъахъхъæнгæйæ, равдыста стыр æхсардзинад, тæхæджы иттæг хорз дæсныйад æмæ курдиат. Йæ хæстон æмæ æфсæддон лæггæдты тыххæй хорзæхджын æрцыд «За службу Родине в Вооруженных Силах»-ы 3-аг къæпхæны орденæй æмæ бирæ майдантæй.
1993 азы Бедойты Руслан æрцыд йæ райгуырæн Ирыстонмæ æмæ кусын райдыдта уæлвæткон уавæрты министры хæдивæгæй. 2000 азы Цæгат Ирыстоны æмæ РОСТО-йы Централон советы бавдыстмæ гæсгæ æнæрадон пленумы æмхъæлæсæй æвзæрст æрцыд хъахъхъæнынадон организацийы цæгатирыстойнаг республикон советы сæрдарæй.
Авиацийы инæлар-майор ма хорзæхджын æрцыд хъахъхъæнынадон æхсæнады уæлдæр хорзæхæй – «Первый трижды герой Советского Союза А.И.Пок-рышкин»-ы майданæй, «75 лет Осоавиахим ДОСААФ Росто»-йы майданæй æмæ сыгъзæрин «Почетный знак РОСТО»-йæ. Бедойы фырт уыд Уæрæсейы Федерацийы ДОСААФ-ы централон советы президиумы уæнг. 2014 азæй Бедойты Руслан куыста Цæгат Ирыстоны ветеранты советы сæрдары хæдивæгæй. Йæ тырнындзинæдты фæрцы стыр патриотон куыст цыд республикæйы фæсивæды ‘хсæн.
Бедойты Руслан цардæй ахицæн 2020 азы 12-æм майы.
Comments are closed, but trackbacks and pingbacks are open.