Хицауады Сæрдар Пухаты Эрик раарфæ кодта Стыр Фыдыбæстæйон хæсты ветеран Коцты Верæйæн йæ 95 азы юбилейы цытæн.
«Зынаргъ Верæ Ермолы чызг, бар мын ратт, цæмæй дын раарфæ кæнон дæ юбилейон боны цытæн, æмæ дын зæгъон фидар æнæниздзинад, уæнгрогдзинад, бирæ рухс æмæ цинæйдзаг цæрæнбонты фæндиæгфтæ! Уадз æмæ кæддæриддæр дæ зæрдæ рухс уа дæ кæстæртæй! – Загъта йын Хицауады Сæрдар, цытджын ветеранимæ ныхасгæнгæйæ. – Мах нæ зæрдыл дарæм нæ цытджын ветеранты, йæ цардыл нæ ауæрдгæйæ, Стыр Фыдыбæс-тæйон хæсты быдыры æмæ фæсчъылдым нæ уæлахизыл чи тох кодта, æппæт уыдоны. Уе сгухтдзинадæн аргъ уыдзæн æнустæм, махæн та нæ бон у бузныг уæ уæм æмæ нæ бон куыд у, афтæ уæм нæ хъус дарæм».
Фидар æнæниздзинады фæндиæгтæ бахæлар кодта юбилярæн Ветеранты советы сæрдар Бесаты Вячеслав дæр.
Хъыгагæн, Верæ Ермолы чызджы æнæниздзинад фæцудыдта, æмæ йæ бон нæ уыд Уæлахизы боны цытæн мадзæлтты хайад райсын, фæлæ, йæхæдæг куыд зæгъы, афтæмæй ацы бæрæгбон у йæ зæрдæйæн æппæты зынаргъдæр.
Йемæ ныхасгæнгæйæ, Пухаты Эрик бацымыдис кодта, йе ‘нæниздзинад куыд у, уымæ, фарста йын йæ хиуæтты, фаг ын ис хостæ, æви нæ, æмæ банысан кодта, зæгъгæ, куы бахъæуа, уæд ын хицауад цæттæ у баххуыс кæнынмæ.
Йæ юбилейон боны цытæн Пухаты Эрик æмæ Бесаты Вячеслав ветеранæн бакодтой зæрдылдарæн лæвар. Верæ Ермолы чызг бузынг загъта цытджын уазджытæн, æмæ сын сæ рацыды агъоммæ рагон ирон æгъдаумæ гæсгæ, арфæ ракодта: «Уадз æмæ уæ фæндæгтæ кæддæриддæр уæнт рухс æмæ цинæйдзаг, уæ сæрмæ арв та уæд ирд æмæ йыл макуы бамынæг уæд хур!»
Comments are closed, but trackbacks and pingbacks are open.