Республикæмæ æрцыд Цæгат Ирыстон-Аланийы Делегаци, Йæ Сæргъ Хицауады Сæрдар Тускъаты Таймураз Афтæмæй
ФЕМБÆЛД ХИЦАУАДЫ
Республикæ Хуссар Ирыстоны Хицауады Сæрдар Пухаты Эрик йæхимæ райста Республикæ Цæгат Ирыстон-Аланийы Хицауады Сæрдар Тускаты Таймуразы. Уый Цхинвалмæ æрцыд Республикæ Цæгат Ирыстон-Аланийы экспертон æмæ терминологон къамисты скондимæ ирон адæмы национ-культурон райрæзты фарстаты фæдыл.
Пухаты Эрик раарфæ кодта йæ цæгатирыстойнаг коллегæйæн æмæ банысан кодта иумæйаг куысты ахсджиагдæр фарстатæ.
«Махæн тынг æхсызгон у де ‘рцыд нæ республикæмæ æмæ цæттæ стæм æнтысджын куыстмæ. Мах хъæуы куыст срæвдз кæнын æрмæст экономикæйы, культурæйы, хъæууон хæдзарады нæ, фæлæ цардархайды æппæт фадгуыты дæр», -загъта Хицауады сæргълæууæг æмæ банысан кодта, ирон адæмы культурон-национ райрæзт комкоммæ баст кæй у Ирыстоны цæгат æмæ хуссары ‘хсæн цы интеграцион процесстæ цæуы, уыдонæн сæ арфдзинад æмæ сæ интенсивондзинадимæ.
Тускаты Таймураз бузныджы ныхæстæ загъта Пухаты фыртæн кæй йæ райста æмæ банысан кодта национ-культурон бастдзинæдтæ æмæ адæмы иудзинад сфидар кæныны ахсджиаг кæй у, национ æвзаг æмæ бындурон традицитæ бахъахъхъæнын æмæ рæзын кæнынц, ирон æвзаг ахуыр кæныны æмвæзад фæбæрзондæр кæнын, цæмæй цард куыд цæуы, мах дæр йемæ афтæ æмдзу кæнæм.
«Нæ зындгонд ахуыргæндтæ æмæ фыдæлтæ нын ныууагътой стыр хæзна, национ-культурон тыгъдадæн бындур æрæвæрдтой. Махæн нæ хæс у фундаменталон иртасæнты ‘руаджы уыцы бынтæ бахъахъхъæнын æмæ райрæзын кæнын уыцы хæзна, ныррыккон дуджы реалитæ хынцгæйæ»-, банысан кодта Тускаты Таймураз.
Фембæлды рæстæджы ма уынаффæ кодтой Ирыстоны хуссар æмæ цæгат хайы социалон-экономикон интеграцийы фарстатыл.
Пухаты Эрик банысан кодта, æнæмæнгхъæуæг кæй у хуссарирыстойнаг продукции æддагон, уæрæсейаг базармæ ласын.
«Республикæйы кусы фыдызгъæлкуыстгæнæн комбинат «Растдон», минералон донуадзæн завод «Родники Осетии», кæцыйæн йæ продукци ныридæгæн ласт цæуы уæрæсейаг базармæ. Ноджы ма иу инвестицион проект «Ирыстоны дыргъдæттæ» ацы аз фыццаг продукци ратдзæн. Уырны мæ, ацы къабазы махæн кæй ис иумæйаг фарстытæ æмæ сыл иумæ кусдзыстæм. Мæнмæ гæсгæ æнæскъуыддзаг фарстатæ нæй, уыдоныл хъæуы æрмæстдæр кусын», – загъта Хицауады Сæрдар.
Тускаты Таймураз дæр загъта, цæттæ кæй сты иумæйаг куыстмæ социалон-экономикон райрæзтыы фæдыл.
«Мах кусæм социалон-экономикон райрæзты стратегийыл, бæрæг кæнæм ахсджиагдæр здæхтытæ æмæ фдгуытæ, кæцытæн ис куыд æрдзон, афтæ адæймагон ресурстæ. Агурдзыстæм нæ республикæтæн аккаг бынат куысты экономикон, уадзæм продукттæ стыр æфтауæккаг аргъимæ, цæмæй нын нæ бюджет фылдæр кæна æмæ адæмы цард хуыздæр кæна», – банысан кодта Тускаты Таймураз.
ФЕМБÆЛД ПРЕЗИДЕНТИМÆ
Республикæ Хуссар Ирыстоны Президент Бибылты Анатоли фембæлд РЦИ-Аланийы Хицауады Сæрдар Тускъаты Таймуразимæ.
Фембæлды ма хайад райстой РХИ-йы Хицауады Сæрдар Пухаты Эрик.
«Æгас нæм цу, Таймураз Русланы фырт, нæ Ирыстоны хуссар хаймæ. Ирыстон ма хъуамæ цæуа дих хуссар æмæ цæгатыл, кæцы мах банысан кæнæм алыгъуызон æмвæзадтыл», -загъта Президент.
Уый банысан кодта, Ирыстоны хуссар æмæ цæгат хай баиу кæныны тыххæй цы мадзæлттæ æмæ плæнттæ арæзт цæуы, æмæ Цæгат Ирыстоны Сæргълæууæг Битарты Вячеславимæ фемæблды рæстæджы, уынаффæ кæуыл цæуы, уыдон вæййынц æмбæрст æмæ æххæст кæнинаг.
«Иу æвзаг, иу культурæ нын ис æмæ къамис дæр хъуамæ уа иу», – загъта Бибылты Анатоли.
Паддзахады сæргълæууæг банысан кодта, дыууæ республикæйы æвзаг æмæ национ культурæ райрæзын кæныны фæдыл, афтæ ма дыууæ республикæты цардархайды æндæр фадгуыты æмгуыстадæн кæй хъæуы ног импульс радтын.
Йæ рады, Тускъаты Таймураз банысан кодта, тынг æхсызгонæй кæй æрцæуы Хуссар Ирыыстонмæ.
«Абон мах уынаффæ кæндзыстæм национ-культурон традициты фарстатыл, афтæ ма ирон æвзаджы райрæзты æмæ бахъахъхъæныны», – загъта Тускъайы фырт.
Уымæй уæлдай, Тускаты Таймураз радзырдта, нæ размæ чи цардысты, уыдон, сæйраджыдæр, ахуыргæндтæ национ-культурон тыгъдад саразын æмæ ирон æвзаг райрæзын кæныны тыххæй стыр куыст кæй бакодтой, Цæгат æмæ Хуссар Ирыстоны ‘хсæн æмгуыстад кæй цæуы социалон-экономикон æмвæзадыл дæр.
«Мах дарддæр дæр архайдзыстæм, цæмæй нæ республикæтæ рæзой. Æмæ ахуыргæндты æмæ æхсæнадон архайджыты хæс та уый мидæг ис, цæмæй иртасæн куыст уадзой, кæцы нын баххуыс кæндзæн нæ традицитæ бахъахъхъæнынæн. Цы адæмæн йе ‘взаг æмæ йæ традицитæ бахъахъхъæнын сæ бон у, уыцы адæмæн ис стыр фидæн, æмæ йæ хъуамæ фидæны ныфс уа», – загъта Тускъаты Таймураз.
ЭКСПЕРТОН КЪАМИСТЫ ИУМÆЙАГ РАБАДТ
Рабадт бацæуæн ныхасæй байгом кодта Хуссар Ирыстон Паддзахад-Аланийы президент Бибылты Анатоли. Уый раарфæ кодта Цæгат Ирыстоны делегацийæн, рабадты æппæт хайадисджытæн æмæ банысан кодта, зæгъгæ, культурæ æмæ æвзаджы иумæйаг къамистæ арæзт кæй æрцыдис, уый алы ирон æмбæстагæн дæр у æхсызгон. Уымæн æмæ куыд нæ культурæйы, афтæ æвзаджы фарстытæм дæр хъæуы лæмбынæг æркæсын. Анатоли Ильяйы фырт ма равдыста йе ууæнк, Президент банысан кодта къамисты куыстæн æнтыст кæй уыдзæнис тыххæй уымæн æмæ йæ уæнгтæ сты ирон адæмы културæ æмæ æвзагыл æнувыддæр чи у, ахæм ахуыргæндтæ æмæ специалисттæ.
Цæгат Ирыстон-Аланийы Хицауады сæрдар Тускъаты Таймураз дæр банысан кодта, зæгъгæ, абон цы фарстытæ скъуыддзаг кæнæм уыдон нæ адæмæн сты сæ ахсджиæгдæртæ. Нæ адæмы хуыздминæвæрттæ Къоста, Васо, Нафи æмæ æндæртæ бахъахъхъæдтой нæ культурæ, не ‘взаг æмæ йæ мах дæр хъуамæ хъахъхъæнæм. Цæмæй абоны ахсджиаг фарстытæ æнтысгæйæ æххæст цæуой уый тыххæй кусын хъæуы нæ экономикæйы фарстытыл дæр. Йæ хъуыдымæ гæсгæ хъæздыг экономикæимæ ахæм, стыр фарстытæ сты æнцондæр скъуыддзаггæнинæн.
Хуссар Ирыстоны Хицауады сæрдар Пухаты Эрик та банысан кодта,зæгъгæ, абон фыццаг рабадт кæй у, уымæ гæсгæ фылдæр хъусдард здахын хъæуы нæ дарддæры куысты фæдыл, саразæм суагъæтæ æмæ сæ бафидар кæнæм къухæрфыстытæй.
Цæгат Ирыстон-Аланийы Нацитимæ ахастыты фæдыл министр Цуциты Аслан та йæ раныхасы банысан кодта, зæгъгæ, ацæугæ аз декабры мæйы Цæгат Ирыстон-Аланийы райст æрцыдис нæ культурæ æмæ æвзаджы программæ. Мах зонæм, æнтыст нæ уыдзæнис уæд кæд æмæ нын нæ уа æнгом бастдзинæдтæ. Разæнгард никæй кæнын, уымæн æмæ куыд Цæгаты афтæ Хуссар Ирыстоны дæр алы ирон æмбæстаг дæр тырны нæ культурæ æмæ æвзаджы рæзт æмæ размæцыдмæ, зæгъгæ. Уый ныхæстæм гæсгæ афтæ чи дзуры не ‘взаг хъахъхъæнинаг у уыдон не сты раст. Уымæн æмæ хъахъхъæнинаг нæу, фæлæ у хъæуы бакусын йæ райрæзтыл.
Цæгат Ирыстон-Аланийы истори æмæ археологийы институты директор Бзараты Руслан та банысан кодта, зæгъгæ, абон у бындурæвæрæн рабадт, нырмæ дæр культурæ æмæ æвзаджы размæцыды тыххæй арæзтам цыдæртæ, фæлæ мадзæлтты нæмттæй дарддæр ивд ницы цыд. Мæ хъуыдымæ гæсгæ къамистæ арæзт кæй æрцыд уый у ахсджиаг хъуыддаг. Культурæ æмæ æвзаджы фадыджы фæстæмæ цы алæууыд, уыдон хъæуы раразмæ кæнын. Цæгат æмæ Хуссар Ирыстоны информацион тыгъдад саразыныл дзурæм дæсгай азты, фæлæ нын йæ саразын не ‘нтысы.
Хуссар Ирыстоны зонадон-иртасæн институты зонадон нымæрдар Битарты Зоя та банысан кодта, зæгъгæ, абон нæ фæсивæд мæгуырау кæй рæхсынц иронау дзурынмæ уый, сæйраджыдæр, у хистæрты, мах аххос. Уымæн æмæ къорд азты куыд æмбæлд ахæм хъусдард не здæхтам культурæ æмæ æвзаджы рæзт æмæ размæцыдмæ. Дарддæр ма Битарты чызг банысан кодта, зæгъгæ, мæ нырæй фæстæмæ уавæр хъуамæ хъуамæ хуыздæрæрдæм фæива æмæ уæд дидин рафтауын кæндзыстæм нæ культурæ æмæ не взаджы дæр.
«Мæнмæ гæсгæ ахæм рабадтытæ Хуссары уадзæм æви Цæгат Ирыстоны уæддæр дзурын хъæуы ирон æвзагыл. Абон мах уый нæ аразæм», – банысан кодта Цæгат Ирыстоны паддзахадон педагогон институты кафедрæйы гæс Хъамболаты Тамерлан. Цæгат Ирыстон-Аланийы рауагъдад цы чингуытæ рауадзы уыдон нæ фенынц æмæ фæзонынц хуссары. Афтæ ам, Хуссар Ирыстон Паддзахад-Аланийы рауагъдад цы чингутæ рауадзынц уыдон та Цæгаты нæ фенынц æмæ фæзонынц, зæгъгæ.
Хуссар Ирыстоны Паддзахадон университеты ирон литературæйы историйы кафедрæйы сæргълæууæг Плиты Гацыр та банысан кодта, зæгъгæ, рæгъмæ цы аразинаг хъуыддæгтæ рахастæуыд, уыдон нæ абон хъæуынц иуылдæр. Уырны мæ камисты уæнгты фæндон æмæ тырнындзинады фæрцы æххæст дæр кæй æрцæудзысты, уый. Уымæй дарддæр ма Гацыр банысан кодта, зæгъгæ, фæцайдагъ стæм, хуымæтæг æмæ чысыл нысаниуæг кæмæн ис, æвзаджы культурæ къаддæр цы дзырдтæй рæзы ахæм ныхæстæ дзурыныл. Уырны мæ къамисы уæнгтæ ацы фарстмæ дæр кæй æркæсдзысты, уый.
Къамисы рабадты ма хайад райстой æмæ дзы раныхас кодтой Коцты Къоста, Къусраты Анатоли, Бæгъиаты Сослан, Тыбылты Инга, Гаглойты Роберт æмæ æндæртæ.
кæронбæттæны боны фæткы фæдыл суагъæйыл сæ къухтæ æрфыстой Цæгат æмæ Хуссар Ирыстоны хицауады сæрдæрдæ Тускъаты Таймураз æмæ Пухаты Эрик.
ГÆЗЗАТЫ Иван
Comments are closed, but trackbacks and pingbacks are open.