Бындур – алайнаг гимназæн
Ацы азы райдайæны Цæгат Ирыстоны разамынад национ рæзтæн цы программæ скодта “Национально – культурное развитие осетинского народа на 2017 – 2019 годы”, зæгъгæ, уырдæм хаст æрцыд дыууæ дæлпрограммæйы – “Сохранение национально – культурной самобытности осетинского народа” æмæ “Сохранение и развитие осетинского языка”.
Фыццаджыдæр уал, программæйы фæлгæтты бындур æвæрд æрцыд ахуырады ног уагдонæн. Фыццæгæм сентябрæй Дзæуджыхъæуы 1-æм скъолайы бындурыл йæ дуæрттæ бакæндзæн Ирыстоны историйы ирон скъола-интернат “Алайнаг гимнази”. Ног ахуырадон уагдонæн йæ саразджытæ сты республикæйы ахуырад æмæ зонады министрад. Йæ нысан у нæ истори, нæ культурæ, нæ мадæлон æвзагæй арф зонындзинæдтæ райсын. Дыууæ къласы цы 29 ахуырдзауы уа, уыдон цыппæрæм къласмæ ахуыр кæндзысты ирон æвзагыл, ома, стæй уæд сæ ахуыр адарддæр кæндзысты иумæйаг ахуырадон скъолайы. Ахуырад æмæ зонады министрад сын цы сæрмагонд чингуытæ бацæттæ кодта, уыдон экспертизæ рацыдысты республикæйы æмвæзадыл. Ахуыры процессы уæлдай, гимназы ирон æвзагыл кусдзысты сфæлдыстадон, театралон æмæ музыкалон студитæ æмæ декоративон аивад, уагъд цæудзысты алы хиирхæфсæн мадзæлттæ. Гимназмæ ист цæудзысты ирон æвзагыл æнувыд цы сывæллæттæ сты, уыдон. Кусынмæ фæхондзысты скъола “Диалог”-ы хуыздæр ахуыргæнджыты. Гимназы куыстæн ныридæгæн бюджеты æвæрд æрцыд 3 милуан сомы бæрц, фæлæ республикæйы разамынады ныфс ис, йæ иннæ хæрдзтæ йын амалхъомтæ сæхимæ кæй райсдзысты.
Нæ республикæйы Сæргълæууæг Битарты Вячеслав куыд загъта, афтæмæй «нæ тыхтæ арæзт уыдзысты ацы гимназмæ, цæмæй, ирон æвзаг зынаргъ кæмæн у, уыцы рæзгæ фæлтæрæн дзы арæзт уа æппæт фадæттæ зонындзинæдтæ райсынмæ. Ацы скъолайы куыст ахæм æмвæзадыл æвæрд хъуамæ æрцæуа, æмæ уырдæм бахауын æмæ ахуыр кæнын уыдзæн алы сывæллонæн дæр кады хъуыддаг».
Нæ уацх.
Comments are closed, but trackbacks and pingbacks are open.