Продуктты цухдзинад. Фарста скъуыддзаг цæуы

17-æм февралы та радон хатт нæ республикæйы амалиуæггæнджытæ æрæмбырд сты  Хицауады раз.

Бæрæг куыд у, афтæмæй азы райдианы амалиуæггæнджытæн фæзынд проблемæтæ Дæллаг Зæрæмæджы таможнæйыл хæлцадон продукттæ Хуссар Ирыстонмæ ласыны рæстæджы.

Ивгъуыд къуыри ацы фарсты фæдыл уыдон ныхас кодтой Хицауады Сæрдары фыццаг хæдивæг Бекъойты Геннади, Сæйраг таможнæйон управленийы сæргълæууæг Цхуырбаты Мурат æмæ Парламенты спикер Тадтаты Аланимæ.

Рацыд цалдæр боны æмæ та амалиуæггæнджытæ æрæмбырд сты, цæмæй байхъусой чиновникты дзуаппытæм.

«Фарст тагъддæр аскъуыддзаг кæныны тыххæй мах ацыдыстæм Мæскуымæ, цæмæй фембæлæм федералон службæтимæ. Цхуырбаты Муратæн та фембæлд уыд Пятигорскы, Цæгат Кавказы Сæйраг таможнæйон управленийы сæргълæууæгимæ. Уыдон куыд зæгъынц, афтæмæй сæ бон ахизын нæу ЕАЭС закъондæттынады сæрты. Мах куыд бамбæрстам, афтæмæй æрмæст таможнæйон органты æмвæзадыл нæ цæудзæн скъуыддзаг ацы фарст. Мах бакусын хъæуы, цæмæй фарст аскъуыддзаг уа алы æмвæзадыл дæр», – банысан кодта Бекъойты Геннади.

Парламенты спикер Тадтаты Алан дæр радзырдта, кæй бацæттæ кодтой фыстæджытæ УФ-йы Паддзахадон Думæ, Федерацийы Севет æмæ Æдасдзинады советы разамонджытæм. Дзуапп, зæгъгæ, хъуамæ райсæм æртæ боны æмгъуыдмæ æмæ уæд ногæй фем­бæлдзыстæм. Парламенты Сæрдар ма куыд загъта, афтæмæй ацы фарст ис РХИ-йы Президенты сæрмагонд хъусдарды бын æмæ уый дæр архайы, цæмæй тагъддæр скъуыддзаг æрцæуа æвæрццагæй.

Фембæлды рæстæджы амалиуæггæнджытæ домдтой, цæмæй фарст скъуыддзаг уа конкретонæй, таможнæйыл хизгæйæ, хынцыд цæуой нæ республикæйы цæрджыты интерестæ.

Цавæр продуктты дефицит фæзынд

нæ горæты магазинты?

Афтæ зæгъæн нæма ис, æмæ нæ горæты магазинты тæрхджытæ бынтон сафтид сты. «Æхсыры продукттæ, æйчытæ æмæ касты алы хуызтæ нæм кæд нырма тæрхджытыл ис, уæддæр не ‘фтауцдон афтид у ныридæгæн», – зæгъы 8-æм уынджы магазины уæйгæнæг.

«Æхсыр, къæдор, æхсырысæртæ хуызтæ нæм ныр дыккаг бон нал ис. Макаронтæ æмæ консервтæй нæма сцух стæм», – зæгъы базарадон центр «Вершина»-йы сæргълæууæг.

Иуæй-иу магазинтæ, уавæрæй пайдагæнгæйæ, схæцыдысты сæ продукцийы æргътыл. Сæхи рæстытæ кодтой, ома, дам, мах продукттæ ТЭК-æй ласæм, уым, дам, фæзынаргъдæр сты продукцийы æргътæ.

Мах бабæрæг кодтам, ТЭК-ы цы базарадон центр ис, нæ горæты магазинтæ, сæйраджыдæр, продукттæй кæцæй ифтонг цæуынц. Ам дæр тæрхджытæн сæ фылдæр сты афтид. Зæгъынц, зæгъгæ, ныр къуырийы бæрц нал æрластой продукттæ.

«Тынг сцух стæм продукттæй, иугæйттæ ма нæм баззад. Памперстæ æмæ нæм æхсыры продукттæ дæр фæуд кæнынц. Нæ ассортименты сывæллæттæн цы алыгъуызон хæринæгтæ уыд, уыдоны бирæ бæрцтæй æлхæнынц ноггуырд сабиты ныййарджытæ, ома, ацы кризис бирæ куы ахæсса, уæд ма стыхсæм», – зæгъы магазин «Малыш»-ы уæйгæнæг.

Дыргътæ æмæ халсæрттæ цы магазинты уæй кæнынц, уыдон дæр сцух сты. Зын бамбарæн нæу, ногласт кæй не сты халсæрттæ.

Афтекты ис æви нæ, хостæ?

Хæлцадон продукты цухдзинад кæд ис иуæй-иу магазинты, уæддæр афтектæм бахизгæйæ, мах дисы бафтыдта, алы хос дæр сæм кæй ис, уыцы цау. Зæгъынц, зæгъгæ, æфтауцдоны дæр ис, дыууæ къуырийы бæрц цæмæй архайой, уыйбæрц препараттæ.

Сывæллæтты рæвдауæндæтты ис продуктты цухдзинад?

Зонад æмæ ахуырады министрады бæрнон кусæг Джиоты Нинæ куыд зæгъы, афтæмæй сабиты рæвдауæндæттæ æмæ иумæйаг ахуыргæнæндæтты продуктты цухдзинад нæма ис, дæс боны фаг продукттæ фæсауæрцты ис. «Немæ цы амалиуæггæнджытæ кусы æмæ нæ хæлцадон продукттæй чи ифтонг кæны, уыдон ныфс дæттынц тагъд фарст скъуыддзаг кæй æрцæудзæнис æмæ нæ фæтыхсын кæй нæ бауадздзысты», – загъта Джиоты Нинæ.

Нæ уацхæссæг