Республикæйы юстицийы министр Гаглойты Олегæн пресс-конференци уыд «Спутник – Южная Осетия»-йы пресс-центры.
Министр радзырдта Юстицийы министрады кусджыты пенсион ифтонгады, Нотариалон палатæйы сырæзты, Бинонты Кодексы æмæ журналистты цымыдисгæнæг æндæр фарстаты тыххæй.
Банысан кодта, зæгъгæ, активон куыст цæуы уголовон-æххæстгæнæн системæйы æмæ Тæрхондоны приставты службæйы тыххæй æххæстгæнæн органты пенсион ифтонгадыл.
Йæ ныхæстæм гæсгæ, Президенты Ныс-туаны банысангонд хæслæвæрдмæ гæсгæ, министрад кусы Тæрхондонон приставты службæйы кусджыты пенситæ фæфылдæр кæныныл. Нырма уал кусынц мидпаддзахадон процедурæтыл. Ныфс бавæрдта, зæгъгæ, цыбыр рæстæгмæ аскъуыддзаг кæндзысты фарстатæ æмæ сæ къухтæ æрфысдзысты æмбæлон документыл.
«Уыцы процедурæтæ куы фæуой, уæд пенсионертæ райсдзысты фæфылдæргонд пенситæ. Абон уал цæттæ сты 12 пенсиисæджы хъуыддаджы, иннæты документтыл нырма куыст цæуы», – загъта Гаглойты Олег.
Кусынц ма паддзахадон кусджыты пенсион ифтонгадыл дæр.
Юстицийы министрад йæ уæрæсейаг коллегæтимæ бацæттæ кодтой закъоны проект. Ныртæккæ йыл Финансты министрадимæ иумæ уынаффæ цæуы æмбæлон финансон фæрæзтæ ссарыны тыххæй, цæмæй паддзахадон службæгæнджытæ райсой фæфылдæргонд пенситæ. Паддзахадон æмбæстагон службæйы кусджыты пенсион ифтонгады тыххæй закъон куы райсой, уæд цæрджытæн сæ бон æрдомын уыдзæн æмбæлон пенситæ.
Юстицийы министр радзырдта Бинонты Кодексы тыххæй дæр.
Куыд банысан кодта, афтæмæй ныртæккæ кусынц РХИ-йы Бинонты Кодексыл. Уый уыдзæн Уæрæсейы Бинонты Кодексы æнгæс, фæлæ дзы нæ уыдзæн пункт суррогатон маддзинады тыххæй.
«Уæрæсейы Федерацийы суррогатон маддзинады бар ис, фæлæ уыцы хъуыддаг махмæ тобæгонд у. Фидæны нæ йæ сæр куы бахъæуа, уæд æй бахæсдзыстæм æндæр закъонмæ», – бамбарын кодта министр.
РХИ-йы Бинонты Кодекс Уæрæсейы Кодексæй хицæн кæндзæн тугæй хæстæг къайдзинадæй дæр.
«Уæрæсейы закъонмæ гæсгæ, дыууæ æфсымæры, дыууæ хойы кæнæ хо æмæ æфсымæры зæнæгæн æмкъæйтты бар ис, фæлæ уыцы хъуыддаг дæр махмæ тобæгонд у, хæстæджыты ‘хсæн къайдзинады бар махмæ нæй», – загъта юстицийы министр Гаглойты Олег.
Журналистты цымыдис кодта, парламентон æвзæрстыты хайад цал парти райсдзæн, уый.
Министр куыд банысан кодта, афтæмæй уый нырма бæрæг нæу. Фæбæрæг уыдзæн, æвзæрстыты бон снысан кæныны фæстæ.
Ныртæккæ регистраци æрцыдысты 12 политикон партийы. Закъонмæ гæсгæ, парламентон æвзæрстытæ хъуамæ уаиккой фидæн азы июлы райдайæны, фæлæ, гæнæн ис, æмæ фæивой бон, уыцы нымæцы парламентаритæн сæхи инициативæмæ гæсгæ дæр.
Министр радзырдта Нотариаты закъоны проекты тыххæй дæр. Загъта, зæгъгæ, Юстицийы министрад Парламентмæ барвыста «Нотариаты тыххæй» закъоны ног проект.
«Парламентмæ бахастам «РХИ-йы Нотариаты тыххæй» закъон ног редакцигондæй. Ног закъонмæ гæсгæ, саразæн уыдзæн Нотариалон палатæ», – загъта Гаглойты Олег.
Йæ ныхæстæм гæсгæ, Нотариалон палатæ контроль кæндзæн сæрмагонд нотариустыл.
«Нотариалон палатæ кусдзæн нотариаты системæйы рæзтыл æмæ контроль кæндзæн сæрмагонд нотариусты архайдыл. Мах дæр нæхи нæ сæрибар кæнæм бæрндзинадæй. Ныртæккæ нæм кусы дыууæ сæрмагонд нотариусы, фæлæ тагъд рæстæджы уыдоны нымæц фæфылдæр уыдзæн», – банысан кодта министр.
Гаглойты Олег дзуаппытæ радта журналистты æндæр фарстатæн дæр.
Осиаты Индирæ
