Информаци æмæ мыхуыры паддзахадон пресс-центры хыгъдон пресс-конференци уыд Юстицийы министр Лалыты Зæлинæйæн.
Уый банысан кодта, йæ дæлбар ведомство 2019 азы цы бакуыста æмæ сæм фидæн аз цы плæнттæ ис, уыдоны тыххæй.
Юстицийы министрад бирæпрофилон у. Йæ дæлбар сты нотариат, адвокатурæ, æфхæрд æххæстгæнæн управлени, ЗАГС, уымæй дарддæр ма регистраци кæны сæрмагонд исад, уыцы исадимæ аразгæ хъуыддæгтæ, кадастрон хыгъд. Йæ бæрны сты закъондæттæн архайд, барадон, антикоррупцион экспертизæты, æххæстгæнæг хицауиуæгады нормативон-барадон актты регистраци кæныны функцитæ.
Министрад барадон антикоррупцион экспертизæтæ сарæзта 394 нормативон-барадон актæн, уыдонæй 40 уыдысты закъоны проекттæ, 114 бæрц – Хицауады уынаффæтæ, 9 – барамынды, 200 фылдæр æххæстгæнæн хицауиуæгады органты нормативон-барадон акттæ, кæцытæн уыд ведомствойон характер.
Кæд раздæр министрады нормативон-барадон акттæ мыхуыры нæ цыдысты газетты фæрстыл, бирæ кæй уыдысты æмæ сын газетон фæзуат кæй нæ фаг кодта, уый фæстиуæгæн, уæд ныр дыууæ азы Юстицийы министрад уадзы Бюллетень.
Дарддæр Лалыты Зæлинæ радзырдта, ацы аз министрад кæй срегистраци кодта 175 æхсæнадон организацийы, уыдонæй 8 сты политикон партитæ, 35 – хæрзаудæн фондтæ æ.а.д. министрады регистрацигонд сты 75 политикон организацийы.
«Хæрзаудæн фондтæй активон куыст кæнынц фонд «Подари крылья», «Хæсты рæстæджы чи фæцæф æмæ сахъатдзинад чи райста, уыдонæн æххуысы» фонд æмæ «Единая Алания», – банысан кодта министр.
Ведомствойы сæргълæууæг радзырдта, 2018 азы барадон, уголовон-æххæстгæнæн æмæ паддзахадон регистраци, кадастр æмæ картографийы службæты цы стыр реформæтæ ауагъдæуыд, уыдоны тыххæй дæр.
Йæ ныхæстæм гæсгæ, уыцы приоритетон реформæты реализаци фæахъаз уыдзæн паддзахады барадон бындуртæ саразынæн, паддзахадон хицауиуæгады органты авторитет фæбæрзонддæр кæнынæн.
Ведомствойы сæргълæууæг радзырдта тæрхондоны приставты службæйы куысты тыххæй дæр. Йæ ныхæстæм гæсгæ, Тæрхондоны приставты службæмæ балæвæрдæуыд 3106 хъуыддаджы, фаронимæ абаргæйæ, уый у 300 хъуыддаджы фылдæр. Ацы хъуыддаг 11 мæймæ æххæст æрцыд 80 процентæй.
Лалион æнæхъусдард нæ ныууагъта, республикæйы цы 6 паддзахадон æмæ дыууæ сæрмагонд нотариусы ис, уыдоны куыст дæр. 2019 азы январæй фæстæмæ планмæ гæсгæ бабæрæг кодтой паддзахадон нотариалон конторæтæй цыппары профессионалон архайд.
Лалыты Зæлинæ куыд загъта, афтæмæй фидæн аз Юстицийы министрад фæнд кæны йæ кусджыты УФ-мæ арвитын сæ квалификаци фæбæрзонддæр кæныны нысанæн.
Уый фæстæ министр дзуаппытæ радта журналистты фарстатæн.
Бæрæг куыд у, афтæмæй фæззæджы Цхинвалы ахæстоны ахæсттæ расидтысты æххормагдзинад, ахæстоны уавæртæй райгонд кæй нæ уыдысты, уый тыххæй æмæ раразмæ кодтой иу къорд домындзинæдтæ. Уый фæстæ соцхызæджы фæзынд видео, кæцы, ома, систæуыд Цхинвалы рарастгæнæн колонийы ахæстты «нæмыны» рæстæджы. Ацы видео æхсæ-нады ‘рдыгæй расайдта уæрæх резонанс. Фæлæ, Лалыты Зæлинæйы ныхæстæм гæсгæ, уыцы видео ист не ‘рцыд Цхинвалы Æфхæрд æххæстгæнæн управленийы, ома, нæ дæр колонийы, нæ дæр слестгæнæн изоляторы.
«Ацы видео кæцæй фæзынд, уый тыххæй мæ бон ницы у зæгъын», – бахахх кодта Юстицийы министр.
Министры ныхæстæм гæсгæ, видео соцхызæджы куы фæзынд, уæд æхсæнады парахат цыд дам-думтæ, ома, дам, ахæсттæ комайы ныххаудтой, кæй сæ фæнадтой, уый аххосæй.
«Афтæ кæй дзырдтой, зæгъгæ, ахæсттæ уадзгуытæй рынчындонмæ бахаудысты, уыдон мæнг ныхæстæ сты. Æгæрыстæмæй уыцы уæззау бонты дæр мах закъоны фæлгæттæй нæ ахызтыстæм. Мах цалдæр хатты ныхас кодтам ахæсттимæ, семæ уагътам профилактикон беседæтæ, фæлæ уыдон уæддæр нæ састысты, сæхион кодтой», – банысан кодта Лалыты Зæлинæ.
Министр радзырдта, 2018 азы Æфхæрд æххæстгæнæн управленийы цы реформæ ауагъдæуыд, уый тыххæй, жур-налисттæн равдыста, уæды онг æмæ уый фæстæйы ист ахæстоны къамтæ.
Ацы къамтæй бæрæг у, реформæйы руаджы колонийы уавæртæ куыд фæхуыздæр сты, уый. Сæ хуыз скалдтой слестгæнæн изолятор, хинайæн хатæн, тезгъогæнæн бынат, хæ-рæндон. Къамтæй бæрæг у, реформæйы размæ ахæсттæ æвзæр уавæрты кæй уыдысты, уый дæр. Фæлæ «мах сахуыр кодтам, уыцы проблемæ æмæ цы хъуыд саразын, уый Президентæн фехъусын кодтам æмæ уый фæстæ паддзахады сæргълæууæджы руаджы ауагъдæуыд реформæ». Реформæйы руаджы ахицæнгонд æрцыд карз æмæ иумиаг режимы ахæстты, фæ-зынд слестгæнæн изолятор, кæцы нæ уыд уымæй размæ. Æппæт дæр арæзт æрцыд, цæмæй ахæсттæ нормалон уавæрты уой, уый тыххæй.
«Абоны бон нæ ахæстоны уавæртæ æввахс лæуынц уголовон-рарастгæнæн кодексы нормæтæм, бон сын æртæ хатты хæрын кæнынц æмæ исынц æмбæлон æмвæзады медицинон æххуыс», – банысан кодта ведомствойы сæргълæууæг æмæ ма йæ ныхасмæ бафтыдта, зæгъгæ, ракæнгæ фыдракæндтæм нæ кæсгæйæ, абон комфортон уавæрты сты ахæсттæ се ‘ппæт дæр.
Уый куыд радзырдта, афтæмæй Æфхæрд æххæстгæнæн управленийы кусæгæн, закъонмæ гæсгæ, йæ бон у иунæгæй кæнæ æмбæлон уагдоны дæлхæйтты æххуысæй спайда кæна тыхæй, Æфхæрд æххæстгæнæн системæйы кусджыты закъонон домæнтæ чи не ‘ххæст кæны кæнæ сæм чи нæ хъусы, уыдоны ныхмæ.
Йæ ныхæстæм гæсгæ, Уголовон-æххæстгæнæн кодексы æмæ ахæстоны мидæггагон фæтк фехалыны фæстиуæгæн, Æфхæрд æххæстгæнæн управленийы хистæр аскъуыддзаг кодта Мидхъуыддæгты министрадмæ фыстæг арвитын, цæмæй сын баххуыс кæна физикон æгъдауæй, æнæштатон уавæрты чи баххуыс кæна, сæрмагонд нысаниуæджы ахæм къорд ахæстоны кæй нæй, уый тыххæй.
«Æххуысмæ сæм æрбацыд ОМОН. Физикон тыхыл куы дзурæм, уæд уый уыд спецконтингентыл физикон æгъдауæй бандавын. Æрмæстдæр æртæ ахæсты ныхмæ спайда чындæуыд физикон тыхæй, ахæстоны кусджыты ныхмæ кæй фæлæууыдысты, æрмæстдæр уый тыххæй. Фæлæ та уæддæр закъоны фæлгæттæй нæ ахызтыстæм», – банысан кодта Лалыты Зæлинæ.
Уый куыд радзырдта, афтæмæй æрвитæггæгтæ æмæ фембæлдтытæ æр-кодтой уголовон-æххæстгæнæн кодексы нормæмæ: карз режимы ахæсттæн бар ис закъонмæ гæсгæ афæдз цыппар хатты æрвитæггæгтæ райсын, иумиаг режимы ахæсттæн та – 6 хатты. «Ахæсттæм дæр æнæразыдзинад уыцы хъуыддаг сæвзæрын кодта», – бахахх кодта Лалыты Зæлинæ.
Министр радзырдта, йæ хъус кæй дары ахæстты уавæртæм æмæ кæй бабæрæг кæны колонийы.
«Колонийы кусджытæ фæдис кæнынц, райсом раджы мæ ахæстоны куы фенынц, уæд. Æз бацæуын хæрæндонмæ, администрацимæ, цæмæй фенон, куыд кусынц æмæ ахæсттæ цы уавæры сты, уый», – радзырдта Юстицийы министр.
Лалыты Зæлинæ журналисттæн радзырдта Æфхæрд æххæстгæнæн управленийы кусджыты пенсион ифтонгады тыххæй дæр.
«Мах тырнæм, цæмæй 2020 азы фæхуыздæр кæнæм æфхæрд æххæстгæнæн системæ дæр. Кæд Æфхæрд æххæстгæнæн управленийы ахæстты уавæртæ бирæбæрцæй фæхуыздæр сты, уæддæр мах фæнды ноджы сæ фæхуыздæр кæнын, нырыккон уавæртæ сын саразын. 2020 азы уыцы здæхты фæнд кæнæм нæ уæрæсейаг коллегæтимæ бакусын», – дарддæр дзырдта Лалыты Зæлинæ.
Ведомствойы сæргълæууæг куыд фехъусын кодта, афтæмæй уголовон-æххæстгæнæн системæйы кусджытæй æмæ тæрхоны приставтæй бирæ рæстæг системæйы чи фæкуыста æмæ æмбæлон кары уæвгæйæ, пенсийы чи ацыд, фæлæ абоны онг дæр пенси чи нæма райста, уыдоны пенсион ифтонгады фарсты тыххæй уый ныхас кодта Уæрæсейы Юстицийы министр Александр Коноваловимæ сæ фембæлды рæстæджы æмæ бадзырдты рæстæджы цы фарстатыл цыд ныхас, уыдон иууылдæр скъуыддзаг æрцыдысты.
«Бадзырдты фæлгæтты ног азы мах кусдзыстæм уыцы здæхты. Бацæттæ кæндзыстæм нормативон-барадон акттæ æмæ нæ къухы бафтдзæн бæллиццаг фæстиуæг», – бахахх кодта Юстицийы министр.
ОСИАТЫ Индирæ
Comments are closed, but trackbacks and pingbacks are open.