Президент æрсидт максималон бæрндзинадмæ

Уыд РХИ-йы Хицауады рабадт. Президент Бибылты Анатолийы сæрдариуæгадæй министрты кабинет æрæмбырд видеобастдзинады режимы.

Рабадты райдианы паддзахады сæргълæууæг йæ бузныгдзинад равдыста Уæрæсейы Федерацийæн быдырон госпиталь равæрыны фæдыл се ‘ххуысы тыххæй. «Фæнды мæ Уæрæсейы Федерацийæн, Президент Владимир Путинæн, Хъахъхъæнынады министр Сергей Шойгуйæн бузныджы ныхæстæ зæгъын  пандемийы ныхмæ тох кæныны  се ‘ххуысы тыххæй. Фæнды мæ банысан кæнын уый дæр, æмæ нæ куырдиатæн сæ дзуапп  кæй уыд оперативон, ныридæгæн госпиталь равæрд æрцыд. Уый уыдзæн серьезон æххуыс КОВИД-19 ныхмæ тох кæныны. Арфæ кæнын æппæт уыцы æфсæддон службæгæнджытæн дæр, кæцытæ абон сты Хуссар Ирыстоны æмæ тох кæндзысты вирусы ныхмæ», – загъта Бибылты Анатоли.

Уый бахæс кодта Хъахъхъæнынады æмæ Æнæниздзинад хъахъхъæныны æмæ соци-алон рæзты министрадтæн, цæмæй сифтонг кæной æмархайд госпиталы къухдариуæгадимæ. «Æппæт организацион фарстытæ дæр хъуамæ скъуыддзаг цæуой æвæстиатæй, госпиталы службæгæнджыты домæнтæн дзуапп хъуамæ уа оперативон, уыдонæн хъуамæ арæзт æрцæуой æппæт уавæртæ дæр», – банысан кодта паддзахады сæргълæууæг.

Республикæйы вирус кæй апарахат, уыцы уавæр Президент схуыдта уæззау æмæ æрхаста, чи фæрынчын, уыдоны тыххæй бæрæггæнæнтæ.

«Уавæр у уæззау. 580 адæймаджы фæрынчын сты КОВИД-19, карантин ист куы æр-цыд, уæдæй фæстæмæ. 31 адæймаджы сæнæниз сты. Фæрынчынуæвджытæй уæззау уавæры сты 7 адæймаджы, астæуккаг уæззаудзинады уавæры – 150 адæймаджы. Ис тенденци, низ кæуыл бахæца, уыдоны нымæц кæй фæфылдæр уыдзæн, уый тыххæй. Фæлæ Уæрæсейы Федерацийы æххуысы  фæрцы мах тох кæндзыстæм вирусы ныхмæ», – загъта Бибылты Анатоли.

Хицауады уæнгтæ ма ивындзинæдтæ бахастой «Республикæ Хуссар Ирыстоны паддзахадон организациты чи ахуыр кæны, уыдонæн хæлцады фæдыл æхцайы фæрæзты хæрдзты нормæтæ сфидар кæныны тых-хæй» Уынаффæмæ. Хицауады уынаффæмæ гæсгæ хæлцæй ифтонг æрцæудзысты æппæт хъæууон скъолатæ æмæ аивæдты паддзахадон лицей.

Ахуырад æмæ зонады министры хæстæ æххæстгæнæг Гасситы Натали куыд банысан кодта, афтæмæй Аивæдты лицей у ахуыры æххæст бонимæ ахуырадон уагдон æмæ хъæууон скъолаты ахуырдзаутæн та æнæмæнгхъæуæг у уæлæмхас социалон æххуыс.

Рабадты кæрон Бибылты Анатоли ноджы иу хатт æрсидт Хуссар Ирыстоны цæрджытæм, цæмæй максималон бæрнон ахаст равдисой коронавирусон инфекци парахат кæныны уавæрмæ, æххæст кæной дохтырты рекомендацитæ æмæ райсой æппæт мадзæлттæ дæр, цæмæй сыл низ ма бахæца.