Уæрæсейы Федерацийы Хъахъхъæнынады министрады радиацион, химикон æмæ биологон хъахъхъæнынады æфсæддонтæ специалон автомашинæтыл æрæвнæлдтой горæты уынгтæ дезинфекци кæнынмæ. Цалдæр автомашинæйæ пырх кæнынц специалон тæнгъæд, кæцы мары коронавирусон инфекцийы æмæ ма æндæр зианхæссæг бактериты. Фæндагон змæлды æдасдзинады инспектортæ развæлгъау æруромынц автомашинæты змæлд, цæмæй эпидемиологтæ æнæкъуылымпыйæ бакæной сæ куыст. Фыццаг уал азилдзысты горæты сæйраг уынгтыл, уый фæстæ та каннæгдæр уынгтыл, парктыл æмæ адæм бирæ цы бынæтты змæлы, ахæм рæтты. Дезинфекцигонд æрцæудзысты республикæйы районон центртæ, медицинон бæстыхæйттæ æмæ æндæр паддзахадон уагдæттæ.
Уæрæсейаг æфсæддонтæ Хуссар Ирыстонмæ æрцыдысты 28 октябры æмæ цыбыр рæстæгмæ Цхуырбаты Гурамы номыл республикон стадионы айтыгътой бирæпрофилон æфсæддон-быдырон госпиталь. Йе сконды сты 130 æфсæддоны бæрц æмæ 37 иуæджы та – специалон техникæ. Стадионы алыварс æхсæнадон фæтк хъахъхъæнынц милицийы кусджытæ.
Ацы госпиталь стационарон хуызы хос кæндзæн коронавирусæй рынчынтæн æмæ ма зæрдæхсайгæ рынчынтæн араздзысты æнæмæнгхъæуæг процедурæтæ. Æфсæддонтæн сæ фылдæр хай сты дохтыртæ, кæцытæ ныры онг дæр тох кодтой коронавирусы низы ныхмæ Уæрæсейы алы регионты æмæ, зæгъæн ис, кæй сты фæлтæрд. Стæй ма ифтонг сты алыгъуызон специалон техникон ифтонггæрзтæй, уавæртæ сын ис тынг бирæ анализты хуызтæ саразынæн. Госпиталь конд у цалдæр хайæ, – рынчынты исæн бынат, госпиталь, инфекцион æмæ санитарон-эпидемиологон хайад, æмæ реанимаци. Бахъуыды рæстæджы сæ бон у рынчыны баиу кæной рæуджыты вентиляцийы аппаратмæ, ис ма сæм рентгены аппарат дæр, тугæй анализ сисынæн специалон ифтонгад, ультразæлы бæлвырдгæнæн æмæ ПЦР-ы диагностикæ аразыны гæрзтæ.
Эпидемиологон уавæр нæм фæстаг бонты кæй февзæрдæр, уый алчидæр зоны. Фæлæ та нæ ныр ныфс бацыдис, æввахс рæстæджыты уæрæсейаг æфсæддонты фæрцы кæй фæхуыздæр уыдзæн уавæр æмæ та кæй рахиздзыстæм нæ раздæры сабыр цардмæ.
Джиоты Александр
Comments are closed, but trackbacks and pingbacks are open.