Ацы бонты паддзахадон-унитарон куыстуат «Энергоресурс» хицæн райдыдта электроэнергийы хызæгæй ахæм абонентты, кæцытæ афоныл нæ фидынц сæ фиддонтæ æмæ сын систы æртæ мин сомæй фылдæр. Фæлæ, уый æнæнхъæлæджы нæу абонентæн, уымæн æмæ цалынмæ ацы службæйы кусджытæ электроэнерги нæ ахицæн кæнынц, уæдмæ контролер бафæдзæхсы хæдзары хицæутты сæ фиддонтæ æгæр кæй сбирæ сты. Уый фæстæ сæм бацæуы официалон гæххæтт дæр. Дæс бон куы рацæуы, уæд «Энергоресурс»-ы кусджытæн бар ис абонентæн йæ электроэнерги ахицæн кæнын.

Хъыгагæн, абонентæн æрмæстдæр сæ газ æмæ рухс куы æрцæуынц хицæн, уæд райдайынц исын мадзæлттæ, цæмæй бафидой сæ фиддонтæ. Иууыл хъыгаг та у ацы службæйы кусджытæ иу кæнæ иннæ абоненты куы ахицæн кæнынц, уæд сæм лæбурынтæ æмæ æртхъирæнтæ кæй фæкæнынц. Уымæ гæсгæ уыдон электроэнергийы хицæн кæныны сæр куы бахъæуы, уæд семæ акæнынц барадхъахъхъæнæг органты кусджыты, цæмæй уыдоны фæрцы конфликт иуварс æрцæуа. «Æрвылбон дæр мах бахъæуы дыууæ-æртæ дебиторы ахицæн кæнын. Хуыздæр уаид æмæ цæрджытæ цалынмæ хицæн не ‘рцæуынц иумæйаг хызæгæй, уæдмæ куы фидиккой сæ фиддонтæ. Науæд уый фæстæ инструкци куыд амоны, уымæ гæсгæ ногæй коммуникацитæм куы иу кæной абоненты, уæд хъуамæ бафидой уæлæмхас суммæ», – зæгъы уæлдæр загъд службæйы бæрнон кусæг Хуыгаты Алан.

«Энергоресурс», цæрджыты уавæры цæугæйæ, бар дæтты, цæмæй абонент цадæггай фида йæ хæстæ, кæд æмæ бахардзгонд суммæ æмткæй йæ бон бафидын нæу, уæддæр. Хъыгагæн, ацы фæдзæхстытæ бирæ абоненттæ мурмæ дæр нæ дарынц. Ахæм абоненты хъуыддаг бахъæуы тæрхондонмæ адæттын, уым сæ куы фæивар кæнынц, æрмæстдæр уæд бафидынц сæ хæс. Цæрджытæ фиддонтæ кæй нæ фидынц афоныл, уыцы хъуыддаг негативонæй æндавы «Энергоресурс»-ы куыстыл. Хъуамæ ма рох кæнæм, цалдæр азы размæ дæр ма ацы лæггæдтæй цух куы уыдыстæм, уæд цы зонындзинæдтæ æвзæрстам. Кæддæрты æнæнхъæлæджы рухс куы ахуыссы, кæннод аваритæ куы æрцæуы, уæд адæм катайы бахауынц. Ахæм бæстæ нæй, æмæ ацы фиддонтæ кæм нæ фидынц. Куы сæ пайда кæной, уæд фиддонты дæр хъæуы рæстæгыл фидын. Ныртæккæ Уæрæсейы Федерацийы руаджы мах æнæкъуылымпыйæ ифтонг цæуæм газæй  дæр æмæ электроэнергийæ дæр. Фæлæ ис рухс æмæ газ давыны цаутæ дæр. Уыдон сты куыд цæрджытæ, афтæ юридикон цæсгæмттæ дæр.

Куыд зонæм, афтæмæй ивгъуыд аз газ æмæ электроэнергийæ тарифтæ фæфылдæр сты. Фæлæ уый аххосаг у, Уæрæсейы оптон базары сæ æргътæ кæй схызтысты. Уыимæ иумæ адæм хъуамæ зоной, тарифты фæзынаргъдæр кæныны 50 проценты хæрдзтæ бафидын йæхимæ паддзахад кæй райста. Уый размæ та паддзахад кæй архайдта, цæмæй æнæбындуронæй ма фæзынаргъ уой тарифтæ. Фæлæ махæн нæ бон нæу УФ службæтыл бандавын. Паддзахадон унитарон куыстуат «Энергоресурс»-ы ма нын куыд загътой, афтæмæй газификацийы фарстатыл куыст æрцыд ивгъуыд аз бæрзонд æмвæзадыл. УФ акционерон æхсæнад «Газпром» сарæзта газификацийы программæ, кæцымæ гæсгæ Хуссар Ирыстоны регионтæ æмæ дæрддзæф хъæутæ се ‘ппæт дæр æрцæудзысты газификаци. Ацы фарст скъуыддзаг куы æрцæуа, республикæйы газотранспортон инфраструктурæ куы скуса, уæд уый ахъаз уыдзæн экономикæйы рæзтæн.

УАЗÆГТЫ Марфа

Comments are closed, but trackbacks and pingbacks are open.