Мæскуыйы Уæрæсейы фæсарæйнаг хъуыддæгты министры хæдивæг Михаил Галузин фембæлд Фæскавказы æдасдзинад æмæ стабилондзинады фæдыл Женевæйаг æхсæнадæмон дискусситы Абхаз æмæ Хуссар Ирыстоны делегациты сæргълæуджытимæ.
Уæрæсейы Федерацийы Фæсарæйнаг хъуыддæгты министрад куыд хъусын кæны, афтæмæй фембæлды хайад райстой Абхазы фæсарæйнаг хъуыддæгты министры хæдивæг Иракли Тужба æмæ Хуссар Ирыстоны Президенты паддзахадон уынаффæгæнæг Коцты Константин, кæцытæ сты Фæскавказы æдасдзинад æмæ стабилондзинады фæдыл Женевæйаг æхсæнадæмон дискусситы национ делегациты сæргълæуджытæ.
«Кæрæдзийæн нæ хъуыдытæ загътам цалдæр боны фæстæ байгомуæвæг Æхсæнадæмон женевæйаг дискусситы радон раундмæ цæттæ кæныны контексты женевæйаг форматы боны фæткы актуалон темæты фæдыл», – дзырдæуы УФ-йы æддагполитикон ведомствойы хъусынгæнинаджы.
УФ-йы Фæсарæйнаг хъуыддæгты министрады ма куыд загътой, афтæмæй дыууæ фарсы дæр бафидар кодтой, цæттæ кæй сты æнгом æмархайд дарддæр кæнынмæ, иумæйаг приориттеттæ размæ кæныны нысанæн, Абхаз æмæ Хуссар Ирыстоны фидар æдасдзинад сифтонг кæнынимæ баст фарстаты комплекс дæр сæм бафтаугæйæ.
