Нижний Новгороды мидхъуыддæгты министрады академийы экономикон факультеты ахуыргæнинæгтæ Хъуылымбегты Зæринæ æмæ Хуыгаты Амандæ активон хайад райстой Адæмты хæлардзинады боны цытæн бæрæгбонон концерт бацæттæ кæныны.
Æхсæнадон хъуыддагмæ ахæм хайбавæрд кæй бахастой, уымæн аккаг аргъ скодта уæлдæр ахуыргæнæндоны къухдариуæгад æмæ зæрдиаг арфæ ракодта хуссарирыстойнаг курсанттæн.
«Фыццаджы уал равзæрстам концерты формат. Уый фæстæ сарæзтам, концертон программæйы хайад чи иста, уыцы ахуыргæнинæгты райгуырæн бæстæты тыххæй видеорæнхъытæ. Ссардтам националон колоритимæ зарджытæ æмæ æмдзæвгæтæ, сæвæрдтам сын кæфтытæ», – зæгъы Зæринæ.
Сæ арæхстдзинад концерты равдыстой Уæрæсейы, Хуссар Ирыстоны, Казахстаны, Монголийы æмæ Абхазы минæвæрттæ. Хуссар Ирыстонæй дзы хайад райстой экономикон æмæ национ æдасдзинады факультеты 1-4 курсты ахуыргæнинæгтæ. Концертмæ æрбацæуджыты базонгæ кодтой ирон адæмы культурæ æмæ традицитимæ, национ зарджыты æмæ кæфтыты рæсугъддзинад æмæ хъæздыгдзинадимæ. Сæххæст кодтой «Хонгæ», «Симд» æмæ «Зилгæ». Равдыстой фæндыр æмæ гуымсæгимæ номыр, азарыдысты ирон зарджытæ æмæ радзырдтой мадæлон æвзагыл æмдзæвгæтæ.
Ахæм диссаджы концертæй адæм райстой æхцондзинад, æмдзæгъд сын кодтой æмæ сын стæй раарфæ кодтой сæ диссаджы арæхстдзинады тыххæй.
ДЖИОТЫ Алыксандр
