Ног азы æрбалæудмæ алчи дæр фенхъæлмæ кæсы зæрдиагæй, фæбæллы, цæмæй йын æрхæсса царды бирæ хæрзиуджытæ. Нæ фыдæлтæм Ногбон стыр бæрæгбоныл нымад цыд æмæ йыл æмбæлдысты цины æнкъарæнтимæ, хъæлдзæг зæрдæйы равгимæ. Ногбонты ирæттæм бирæ раппæлинаг æгъдæуттæ уыд æмæ сæ æххæст кодтой хъæлдзæг æмæ хорз зæрдæйы уагимæ. Уыдонæй сæ иу уыд, хорз зæрдæ æмæ къах кæмæн хуыдтой, ахæм нæлгоймаджы Ногбон райсомæй хæдзармæ фæуазæг кæнын. Уымæн-иу раздæр фехъусын кодтой, цæмæй сæм æнæмæнг фæзына æмæ сын фæарфæтæ кæна. Уыцы æгъдау Ирыстоны абоны бон дæр ис бирæ рæтты. Уæдæ зæрдиаг куывдтытæ чи кæны, цæстуарзон арфæтæ кæнынмæ чи арæхсы, уыдонæн сæ фæндаг уæрæх у ирон хæдзæрттæм, стæй æмткæй сæ иубæстон адæмæн цæстуарзон арфæйы фæндиæгтæ зæгъынмæ дæр разы вæййынц. Ахæм æмбæстæгтæй цух нæу Цхинвалы районы Къос-тайыхъæу дæр. Уыдонæй сæ иу- Тегкаты Левамæ мах бахатыдыстæм, цæмæй зæгъа арфæйы ныхæстæ йе ‘мбæстæгтæн.
– Мæ зынаргъ æмбæстæгтæн мæ фыццаджыдæр фæнды, цæмæй се ‘ппæт дæр Ног азыл сæмбæлой хъæлдзæг, æнæниз æмæ æнæмастæй. Ацæугæ аз бирæ зындзинæдтæ æмæ мæстытæ бавзæрста Хуссар Ирыстон дæр æмæ уыдон æгъгъæд фæуæд, Ног аз та республикæйы æппæт фæллойгæнджытæн æрхæссæд ног хорздзи-нæдтæ, амонд æмæ фæрныгад. Алы хæдзары бинонтæ дæр скувынц æмæ сæхи бафæдзæхсынц, цæмæй азы дæргъы сæ цард уа амондджын, бæркадджын, фыдбылызтæй та – хызт. Гъе, æмæ алкæй куывд дæр хорзæй æрцæуæд. Махæн, хистæр фæлтæрæн, не скаст у кæстæртæм, рæзинаг хуртæм æмæ хъомыл кæнæд æнæниз æмæ æнæмастæй, уæнт ныфсы гуырдтæ канд сæ ныййарджытæн нæ, фæлæ алкæмæн дæр. Ис сын ахуыр æмæ царды æндæр къабæзты дæр сæхи хорзæй равдисыны гæнæнтæ æмæ сæм цæуæд ныфсджынæй. Хистæртæ царды фæлтæрд сты æмæ кæстæрты уæлхъус кæддæриддæр цы лæууой, раст фæндагыл сæ цы æфтауой, уыцы тых æмæ хъару сæм ноджыдæр уæнт.
Алкæй цард дæр амондджын рæстæгæй цух куыд никуы уа, уыцы хорздзинад мæ бафæнддзæн алы æмбæстагæн дæр. Ирыстоны арæхдæр цы уа чындзæхсæвтæ, куывдтæ, циндзинад, ахæм арфæ сын уарзы мæ цæст. Ноджы ма мæ зæгъын фæнды уый, æмæ нæ республикæйы разамонджытæ кæй кусынц æмæ архайынц, цæмæй нæ цæрджыты цардуагон уавæртæ хуыздæр кæной æмæ уыдонæн æвдисæн стæм нæхæдæг дæр. Куыд нæ горæт, афтæ хъæууон цæрæн бынæттæ дæр хорзæрдæм ивынц сæ хуыз. Фæлæ уый фаг нæу, нырма аразинæгтæ дæр дзæвгар ис æмæ нæ уырны, уыдон сæххæст кæныныл дæр кæй куыс-тæуыдзæн.
Æрбалæууыд Ног аз æмæ уæ алкæй дæр йæ хорзæх уæнт, мæ зынаргъ æмбæстæгтæ!
Хуыбиаты Никъала
Comments are closed, but trackbacks and pingbacks are open.