Хуссар Ирыстоны скъолаты ахуырадон четверть фæуыдзæн дистанцион ахуыры хуызы. Уый тыххæй фехъусын кодта республикæйы ахуырады министры хæдивæг Лолаты Аслан.
Республикæйы æппæт иумæйагахуырадон скъолатæ æмæ ахуырадон уагдæттæ æхгæд сты карантины 21 октябрæй коронавирусæй рынчынты нымæц кæй фæфылдæр, уый тыххæй.
Лолайы фырт куыд банысан кодта, афтæмæй æнæмæнгхъæуæг уынаффæ райстой ахуырдон уагдæтты къухдариуæггæнджытæ.
«Ахуырадон процесс скъолаты фæуыдзæн дистанцион ахуыры хуызы, уымæн æмæ карантины фæстæ цæуынц улæфтытæ. Ахæм уынаффæ рахаста Ахуырады министрад, æмæ ацы уынаффæ æрвыст æрцыд ахуырадон уагдæтты къухдариуæггæнджыты онг», – загъта Лолайы фырт.
Лолайы фырт куыд банысан кодта, афтæмæй дистанцион ахуыры уый размæйы фæлтæрддзинады уыдис цухдзинæдтæ. Йæ ныхæстæм гæсгæ, уыдис дзы ахæмтæ, кæцытæ куыстой æнувыдæй, фæлæ дзы уыд ахæмтæ дæр, кæцытæ ахуыры ахæм хуызмæ раст хъусдард нæ дардтой. Лолайы фырты ныхæстæм гæсгæ, ныр Ахуырады министрад йæ хъус дардзæн, ахуыр куыд цæудзæн, уымæ.
«Æмбарынгæнæн куыст мах ауагътам. Фæлæ æмбарæм, бирæтæ дзы аххосæгтæ æмæ аргументтæ кæй ссардзысты, цæмæй ма ахуыр кæной. Ахуырады министрад уаддзæн æнæпланон басгæрстытæ, цæмæй сæ хъус дарой, куыд цæудзæн дистанцион ахуыр, уымæ», – банысан кодта министры хæдивæг.
Comments are closed, but trackbacks and pingbacks are open.