Сентябры мæйы нæ дуканиты тæрхджытыл фæзындзæн минералон дон «Дзимыр». Диабетæй рынчынтæн пайдайы дон æй хонынц.
Ацы дон раздæр уагъд цыд компани «Апиуотрес»-ы базарадон маркæйы бын. Йæ уадзыны функцитæ та йын æххæст кодта «Бæгъиат»-ы суаруадзæн завод. Суар йæхæдæг ист цыдис Ленингоры районы Дзимыргомы.
Хъæздыг сты Ленингоры хъæутæ суадæттæй. Сæ иу ис Науисхъæуæй Лалисмæ бахизæны. Хонынц æй газджын суар. Дыккаг – Хъелы доны фарсмæ Цгъойтæ æмæ Бетъреты астæу цы ком ис, уый ныхмæ. Æртыккаг – Хететы хъæуы ныхмæ – урс-урсид дарынц дуртæ. Æввахс æм бацæугæйæ, уайтагъд фындзы хуынчъытæ бамбарынц сондоны тæф. Суар зын нуазæн у, фæлæ адæм куыд дзурынц, афтæмæй тынг æххуыс кæны, ахсæны низтæй чи хъæрзы, ахæмтæн. Комы ноджыдæр мидæмæ куы бацæуай, Берцъихы комрæбынмæ, уæд та дардмæ фендзынæ сырх-сырхид дуртæ. Хонынц æй Тогойты суар. Ацы суары ад тынг зæрдæмæдзæугæ у. Йæ цурты цæуы Хъелдон, сыгъдæгæй. Дарддæр бахæццæ уыдзынæ Берцъихы хъæуæй Баджины хъæумæ. Раст ацы суар нымад у Дзимыргомы хуыздæр суарыл.
Суармæ автомобилон фæндаг бæргæ уыд, фæлæ ивгъуыд аз Ленингоры районы цы стыр къæвдатæ æруарыд, уыдон фæластой суадонмæ фæндаг. Компани «Апиуотрес»-ы автоцистернæтæ суары цурмæ нал цыдысты æмæ уый аххосæй «Дзимыр»-ы дон дæр нæ дуканиты тæрхджытæй æрбайсæфт. Суары донмæ фæндаг аразыныл ивгъуыд аз архайдтой Ленингоры цæрæнуатон-коммуналон хæдзарады кусджытæ, Администрацийы сæргълæууæг Гæджиты Илларионы сæргълæудæй. Уæд сын бантыст, Дзимыры коммæ цы фæндаг цæуы, уымæй 4-километры бæрц айгæрдын, фæлæ сæ бульдозер фехæлд. «Дзимыр»-ы суармæ ма хъуыд фондз километры бæрц бацæуын, суар йæхæдæг дæр фæцис цъыфы зæйы бын.
Ацы аз фæндаджы арæзтадон куыстытæ кæронмæ бакодтой, суармæ цы фæндаг цæуы, уый дæр бадзæбæхтæ кодтой.
«Апиуотерс»-ы компанийы базарадон менеджер Годжыцаты Таймураз зæгъы: «Нæ доны маркæ аккаг бынат бацахста адæмы ‘хсæн. Нæ продукци уагътам авг æмæ пластикон мигæнæнты, æрвыстам æй Уæрæсейы Федерацимæ дæр. Регистрацигонд æрцыд код «Чистый знак»-ы уæрæсейаг националон системæйы Ростесты. Бардæттæг гæххæтты фæрцы махæн нæ бон у æндæр паддзахадтимæ дæр кусын. 2021 азы Мæскуыйы цы экономикон армукъæ – «Продэкспо» уагъд цыд, уым нæ минералон дон райста сыгъзæрин майдан æмæ нымад æрцыд «Лучший продукт»-ыл. Уый та нысан кæны, таможнæйон цæдисы цы бæстæтæ сты, уырдæм ласæн кæй ис ацы товарæн. Советон рæстæджы дæр Дзимыры суар бастой «Ессентуки»-йы суæрттимæ».
Уый ма дзырдта, гастроэнтерологтæ, дам, куыд амонынц, афтæмæй «Дзимыр»-ы суар пайда кæй у сæкæрниз, ахсæн, гастрит æмæ мисындзæджы низтæн. Фидар ма кæны адæймаджы иммунитет, хуылфы цы токсинтæ æрæмбырд вæййынц, уыдоны иуварс кæнынæн дæр у ахъаз. Цалынмæ «Дзимыр»-ы дон мигæнæнтæм нæ рауадзынц, уæдмæ «Бæгъиат»-ы суаруадзæн заводы цы бæрзондтехнологон кондадон ифтонггæрзтæ ис, уыдоны руаджы фильтраци æрцæуы, цæмæй асыгъдæг уа бактеритæй. Фæлæ донæн нæ фесæфынц йæ пайдайаг микроэлементтæ, нæ фесæфы йæ ад дæр.
УАЗÆГТЫ Марфæ
