Минералон донуадзæн компани «Алтей» æрæджы райдыдта суары дон фондзлитруат пластикон мигæнæнты уадзын. Ацы компани хорз зындгонд у бынæттон адæмæн. 2018 азы та уæрæсейаг экономикон армукъа «Продэкспро»-йы нымад æрцыд хуыздæр продукттæй сæ иуыл æмæ райста сыгъзæрин майдан. Дон ист цæуы Згъуыбиры донгуырæнæй, ахъаз у бирæ низтæ хос кæнынæн. Цæуы Кавказы хохрагъæй æмæ йæм æндæр дæттæ нæ хæццæ кæнынц. Пятигорскы курортологийы зонад-иртасæн институты хатдзæгмæ гæсгæ дон ахъаз у цармы низтæн, игæр æмæ уыргтæн. Ваннæттæ дзы куы исай, уæд та артроз, артрит æмæ варикозæн.
Донуадзæн компани «Алтей»-ы сæргълæууæг Босыкты Владимир афтæ радзырдта:: «Мах дон уадздзыстæм 5 æмæ 1,5 литруат мигæнæнты æнæ газæй. Нæ суары дон хорз зындгонд у, канд нæхимæ нæ, фæлæ ма Уæрæсейы Федерацийы бирæ горæтты дæр. Завод саразын дæр уымæн сфæнд кодтон ацы минералон доны бындурыл. Згъуыбиры ма цы иугай ацæргæ адæймæгтæ ис, уыдон мын куыд радзырдтой, афтæмæй советон дуджы дæр Згъуыбирмæ хæстæг Гуырдзыстоны къухдариуæгад хъавыд егъау завод саразын, фæлæ рацарæзты дуджы бакъуылымпы сты».
Амалиуæггæнæг ма загъта, зæгъгæ, завод сарæзта, Хицауадæй цы æххуысы кредит райста, уый фæрцы. Ныртæккæ завод фæивта йæ юридикон адрес, Згъуыбирæй хаст æрцыд горæтмæ. Куыстуат ныр та ис БАМ-ы районы, фæлæ йæм дон ласынц Згъуыбирæй. Бынаты йæм бафтауынц газ æмæ йæ ныккæнынц 1,5 пластикон мигæнæнты. Суаруадзæн завод цы дон уадзы, уый цæуы «Аландон» маркæйы бын. Дон уæй цæуы заводæн йæхицæй дæр æмæ сын бадзырд арæзт цы магазинтимæ ис, уыдоны дæр. «Фондз литруат пластикон мигæнæнты æнæ газæй дон уадзын райдыдтам адæмы куырдиатмæ гæсгæ. Алчи газджын дон нæ уарзы. Дон та фылдæр агурынц йæ хосгæнæн миниуджыты нысанæн. Нæ горæты цæрджытæй дзы бирæтæ æвæрынц компресстæ сæ уæрджытыл. Дыууæ азы размæ нæ республикæйы цы пандеми фæзынд, уый аххосæй фæкъуылымпы ис нæ куыст. Фæлæ, уæддæр Уæрæсе æмæ Сомихстонимæ цы бадзырдтæ сарæзтам, уыдон сæ тыхы баззадысты. Уымæ гæсгæ нæ продукцийы иу хай — экспорт цæудзæн уырдæм», — загъта Владимир.
Босыкты Владимир ма нын куыд загъта, афтæмæй сæ бон у мæйы мидæг 500 мин 5 литруат мигæнæны уадзын. Ныртæккæ бадзырдтæ аразынц æфсымæрон республикæ Абхазимæ. Уый тыххæй сæ къухы ис сертификаттæ, кæцытæ бар дæттынц ахæм бадзырдтæ аразынæн. Сæ зæрды ис суары донæй лимонад уадзын дæр. Лимонад уадздзысты дыууæ хуызы — «Аландон-Тархун» æмæ «Аландон-Груша». Лимонадуадзæн сæрмагонд ифтонгадтæ ныридæгæн сты заводы территорийыл. Уыдон монтажгонд æрцæудзысты æмæ уæд 0,5 литруат авгæй мигæнæнты сахаты мидæг уагъд цæудзæн 1 500 иуæджы. Уый та бар дæтдзæн бадзырдтæ саразын ноджы цалдæр бæстæтимæ. Беларус, Казахстан æмæ сæм Киргизийæ æрцыд базарадон фыстæджытæ. Куыддæр компанийы юрист уыдон сахуыр кæна, афтæ уадзын райдайдзысты лимонад дæр.
Куыд зонæм, афтæмæй «Алан-дон» заводы бынаты раздæр уыд завод «Родник Осетии», кæцы уагъта «Осетинская» маркæйы минералон дон. Уыдон та цы фесты, зæгъгæ, фарстайæн Босыкты Владимир ахæм дзуапп радта: «Цалдæр азы размæ нæ республикæмæ хуынд æрцыд Владимиры областæй инвестор. Уый æрбынат кодта, ныртæккæ мах кæм стæм, уым.
Суаруадзæн завод хуынд „Родник Осетии“. Йæ дон уагъта авг æмæ пластикон 0,5 литруат мигæнæнты. Дон та ист цыд Бæгъиаты 9-æм донгуырæнæй. Заводмæ йæ ластой сæрмагонд цистернæты. Инвестор Павел Аитов йæ продукци реализаци кодта, куыд бынаты, афтæ УФ-йы территорийыл дæр. Фæстæдæр сæвæрдтой дыккаг лини дæр. Уырдæм та дон ластой Згъуыбирæй. Заводы территори уæрæх у æмæ дзуапп дæтты куысты уавæртæн. Бынæттон журналисттæ-иу йемæ куы фембæлдысты, уæд-иу интервьютæ дæтгæйæ „Родник Осетии“-йы къухдариуæгад æрвылхатт дæр райгонд уыд йæ куыстæй. Дзырдта-иу, зæгъгæ, Владимиры областы иттæг популярон у дон „Осетинская“. Нæ къухдариуæгад дæр ын ницы цæлхдуртæ æвæрдта йæ разы. Фæлæ, уæддæр бæрцæй цалдæр азы бакуыста завод. Бизнесæн йæхи фæткойтæ ис, фæстиуæг тагъд нæ ратты. Æрлæууыд йæ куыст, цы 35 адæймаджы дзы куыста, уыдон дæр æгуыстæй баззадысты. Афæдзæй фылдæр завод æхгæд уыд. Уыцы рæстæджы махæн Згъуыбиры цы мини завод уыд, уый хъуыдис сцалцæг кæнын, мах бахатыдыстæм Хицауадмæ, цæмæй нæ компани „Алтей“ æрбынат кæна ацы заводы, æмæ нын сразы сты. Уæдмæ, Владимиры областы инвестор йæ ифтонггæрзтæ аласта, ныр уым мах смонтаж кодтам нæхи хахх», — бамбарын нын кодта Босыкты Владимир.
УАЗÆГТЫ Марфа
