Æнтысгæ ахуыр-хъомыладон куыстæн æрмæст ахуыргæнджыты æрвылбонон æнувыд архайд нæ ахъаз кæны, фæлæ ма сæ фарсмæ æдзухдæр хъуамæ лæууой ныййарджытæ æмæ æхсæнад. Уæд къухты æнæмæнгдæр æфтдзæн раппæлинаг фæстиуджытæ æмæ уыцы иузæрдион куыстæй райгонд æмæ сæрыстыр уыдзысты æрмæст хъомылгæнинæгтæ нæ, фæлæ æмткæй скъолайы коллектив дæр. Цхинвалы районы ахуыргæнæн уагдæттæн дæр ацы фæдыздæхты нæ вæййы мæгуырау фæстиуджытæ, æмæ астæуккаг ахуырад райсыны фæстæ сæ ахуыр адарддæр кæнынц уæлдæр æмæ астæуккаг специалон ахуыргæнæндæтты. Фæлæ зæгъын хъæуы, цард куыд размæ цæуы, афтæ ахуыргæнæн уагдæттæй ноджы тынгдæр домдæуы ахуыры гъæд фæхуыздæр кæнын, сомбоны цæмæй суой аккаг цардаразджытæ.
Рæзгæ фæлтæры ахуыр-хъомыладон куыст ноджы бæрзонддæр æмвæзадмæ сисыны тыххæй æрæджы Цхинвалы районы адæмон ахуырады хайады ног сæргълæууæгæй нысан æрцыд Козаты Олег. Козайы фырт ацы бынаты размæ дæр ахуыр-хъомыладон куыст кодта æвзонг фæлтæримæ, уыимæ иумæ къласæн æмæ скъола-йæн æддейæ алыгъуызон культурон æмæ хиирхæфсæн мадзæлттæ уадзыны цырынгæнæг уыд. Дызæрдыггæнæн нæй, ног бынаты дæр йæхи кæй равдисдзæн хорз æмæ районы ахуырады къабазы кусджытæн сæ къухты кæй æфтдзæн раппæлинаг фæстиуджытæ. Кæй зæгъын æй хъæуы, ахуыры процесс цæмæй æнтысгæйæ цæуа, уый тыххæй уагдæттæ æмæ ахуыргæнджытæ дæр хъуамæ ифтонг уой æппæтварсонæй. Ахуырады хайады сæргълæууæг батыхст скъолаты хъармгæнæн агрегаттæ æмбæлон уагмæ æркæныныл. Уый фæстиуæгæн Дменис, Сатихъар, Рустау æмæ Арцеуы скъолаты дæр хъæрмадон системæтæ кусынц æнæкъуылымпыйæ.Ног разамонæгæн ацы бонты фыццаг фембæлд уыд йæ дæлбар кусджытимæ, уыдон зæрдиагæй рахæцыдысты сæ хистæры фарс, æнæмæнгдæр скъоладзаутимæ кæй хъæуы фылдæр кусын. Уымæ гæсгæ æппæт дæр сараздзысты, цæмæй ахуырдзау фæсивæд ахуыры æмæ æхсæнадон царды дæр уой раззагдæрты рæнхъыты. Бирæ ивындзинæдтæ цæуы ахуыры ныры домæнтæм гæсгæ æмæ сæ ныфс ис, уыдон æххæст кæнын сæ къухты кæй æфтдзæн, уымæй. Скъолатæ се ‘ппæт дæр ифтонг сты, йæ куыст бирæ чи уарзы æмæ йæ зæрдиагæй чи æххæст кæны, ахæм ахуыргæнджытæй, афтæ ма ахуыргæнæн чингуытæ æмæ цæстуынгæ æрмæджытæй, ис сæм компьютертæ. Фæлæ дарддæр дæр куыст цæудзæн, цæмæй ноджыдæр баххæст æрцæуой ахуыргæнæн уагдæттæ. Зæгъын хъæуы, æрмæст разамонæгæн йæ къухты уый бæрц æнтыст нæ бафтдзæн. Фæлæ Козайы фырт куыд зæгъы, уымæ гæсгæ йе ‘нцой хъуамæ бæлæууой, цы коллективæн разамынд кæны, уыдон се ‘ппæт дæр æмæ йæ ныфс ис, афтæ дæр кæй уыдзæн.
Козайы фырт райгондæй банысан кодта, районы сæргълæууæг Мамытаты Вахтанг ахуырады хайады куыстмæ уæлдай тынгдæр хъусдард кæй здахы, фæнды йæ, цæмæй скъоладзауты ахуырфæразондзинад уа зæрдæйы фæндиаг.
Алы скъолайы дæр уыдзæн ногазон назбæлас æмæ сæ бæрæгбон арвитдзысты хъæлдзæгæй, фыццаг къласæй фæндзæм кълæсты ахуыргæнинæгтæн бакæндзыстæм ногазон лæвæрттæ. Фæлæ Мамытайы фырты фæндон у, цæмæй скъолаты æппæт ахуыргæнинæгтæ дæр райсой ногазон лæвæрттæ æмæ сын уыцы хъуыддаджы йе ‘ххуысы хай бакæндзæн Мамытайы фырт йæхæдæг. Йæхи рады адæмон ахуырады хайады сæргълæууæг арфæ ракодта Ног азы сæраппонд æппæт ахуыргæнæн уагдæттæ æмæ Ирыстоны цæрæг адæмæн, бафæндыд æй уыдонæн æнæниздзинад æмæ хисæрмагонд царды æнтыстытæ.
Хуыбиаты Никъала
Comments are closed, but trackbacks and pingbacks are open.