ФЫССЫНЦ КОНТРОЛОН КУЫСТЫТÆ

Æрвылаз дæр РХИ-йы Ахуырад æмæ зонады министрад уырыссаг æвзаг æмæ математикæйæ цы контролон куыстытæ фæуадзы, уыдон фыссынц хуссарирыстойнаг хистæркъласонтæй сыгъзæрин æмæ æвзист майдантæ райсынмæ чи хъавы, уыдон. Ацы ахуы-ры азы контролон куыстытæ уагъд цæуынц снысангонд æмгъуыдтæй фæстæдæр республикæйы ахуырадон уагдæтты бакæнгæ карантинон мадзæлтты аххосæй. Хуссар Ирыстоны майдантæ райсынмæ чи хъавы, уыдонæй 11-æм къласы ахуырдзауты нымæц у 11, æмæ 10-æм къласы чи ахуыр кæны, уыдоны нымæц та – 49 адæймаджы.

«Сыгъзæрин æмæ æвзист майдантæм кандидаттæ – 10 æмæ 11-æм кълæсты ахуыргæнинæгтæ фыссынц контролон куыстытæ уырыссаг æвзаг æмæ математикæйæ. Каникулты фæстæ уыдон дарддæр дæр фысдзысты контролон куыстытæ дыккаг æмæ æртыккаг ахуыры азы цыппæрæмхайы (четверты) фæстиуджытæм гæсгæ», – загъта РХИ-йы ахуырад æмæ зонады министрады скъолайы агъоммæйы кары, иумиаг æмæ уæлæмхас ахуырады управленийы хистæр Джиоты Нинæ.

Уый куыд банысан кодта, уымæ гæсгæ кæд алкæцы предметы фæстиуджытæм гæсгæ астæуккагарифметикон 3,5 баллæй къаддæр нæ уа, уæд ахуыргæнинаг баззайдзæн æвзист майданмæ претендентæй. Кæд æмæ 4,5 баллæй фылдæр æрæмбырд кæна, уæд та уыдзæн сыгъзæрин майданмæ кандидат. Уымæй дарддæр ма сыгъзæрин майданмæ претенденттæн скъолайы программæйы алкæцы предметæй дæр хъуамæ уа фæндзтæ, æмæ æвзист майдантæм претенденттæн та дыууæ «цыппарæй» фылдæр ма хъуамæ уа. Контролон куыстыты æртыккаг этап уагъд æрцæудзæн 2022 азы райдианы æмæ уæд фæбæрæг уыдзысты медалисттæ дæр.

Ахуыры азы фæудмæ контролон куыстытæ уагъд æрцæуынц æртæ этапы, уыдонæй дыууæ ныффыссынц декабры мæйы. Кæй зæгъын æй хъæуы, контролон куыстыты фæстиуæгæн алкæмæн йæ къухты нæ бафты йæ фæнд сæххæст кæнын æмбæлон баллтæ кæй нæ æрæмбырд кæнынц, уымæ гæсгæ æмæ та иннæ ног ахуыры азы адарддæр кæнынц æвзист æмæ сыгъзæрин майдан райсыны тыххæй контролон куыстытæ. Уæлдæр ахуырадон уагдæттæм фæлварæнтæ дæттыны рæстæджы майдантæ чи райса, уыцы абитуриенттæн баххуыс вæййынц уæлæмхас баллтæ райсынæн.

Нæ уацх.