Республикæ Хуссар Ирыстоны Хицауады Сæрдар Пухаты Эрик хайад райста Ахуырад æмæ зонады министрады хыгъдон коллегийы куысты, кæцыйы сæйраг докладимæ раныхас кодта министрады сæргълæууæг Гасситы Натали.
«Ныры этапы ахуырады модернизаци æнгом баст у ахуыры гъæдыл контроль кæныны тыххæй ног, эффективондæр хуызтæ ссарынимæ. Бонæй бонмæ актуалондæр кæны йæ ныры уавæрыл æмæ ахуырадон процессы фæстиуджытыл дæр аналитикон контроль», – банысан кодта уый.
Министры информацимæ гæсгæ, Хуссар Ирыстоны скъолаты ахуыр кæнынц 6526 ахуырдзауы, уыдонæй хъæууон скъолаты – 1260 ахуырдзауы, æнæпаддзахадон скъолаты – 444. Сабидæтты та хъомыл кæнынц 3134 сывæллоны.
Ахуырады системæйы архайды сæйраг бæрæггæнæнтæ, Гасситы Наталийы ны-хæстæм гæсгæ, сты ахуырдзауты ахуыр-фæразондзинады æмвæзад æмæ ахуырады гъæд.
«Аивгъуыйгæ ахуыры азы фæстиуджытæм гæсгæ, ахуырфæразондзинады процент у 99, 5 проценты. 9 рауагъдоны хорзæхджын æрцыдысты «Иттæг хорз ахуыр æмæ уагахасты тыххæй» майдантæй (4 – сыгъзæрин, 5 – æвзист майдантæй). Бирæнымæц дипломтæ, сертификаттæ, грамотæтæ, кæцытæ нæ ахуырдзаутæ æрхастой зонад-практикон конференцитæ, предметон олимпиадæтæ, конкурстæ, фестивалтæй, сты ахуырады фадыджы куысты æвæрццаг фæстиуджытæ æрмæст нæ республикæйы территорийыл нæ, фæлæ йæ арæнтæн æддейæ дæр», – банысан кодта министр.
Хыгъдон æмгъуыды стыр куыст бачындæуыд ног ахуырадон стандарттæм рахизын, афтæ ма национ æвзаджы рæзты тыххæй дæр. «Ахуырадон процессы фæлгæтты скъолайы агъоммæйы уагдæтты уагъд æрцыд гом уроктæ «Малусæг»-ы программæмæ гæсгæ. Хуыздæр методикон куыстытæ ирон æвзаг æмæ литературæйæ мыхуыр æрцыдысты, Ахуырады министрад цы методикон журнал «Æххуыс ахуыргæнæгæн» уадзы, уым. Сног кодтой 1-4 къласмæ ирон æвзаг æмæ кæсынæй бындурæвæрæн программæтæ. Сног кодтой ахуырадон программæтæ 5-6 кълæстæн, куыстæуы 1-9 кълæстæн та ирон æвзаг æмæ литературæйæ ахуыргæнæн чингуыты комплект сног кæнын æмæ Ирыстоны географийы ахуыргæнæн чиныг дæр», – банысан кодта министр.
Хыгъдон рæстæджы ма дарддæр куыст цыд «Рæзгæ фæлтæры монон-хæрзæгъдауон хъомылады» фæдыл 2017-2019 азты паддзахадон программæйы мадзæлттæ сæххæст кæныныл.
Гасситы Наталийы ныхæстæм гæсгæ, программæйы фæлгæтты цы мадзæлттæ план æрцыд, уыдонæн сæ фылдæр хай æххæст æрцыдысты.
«Ныртæккæ РХИ-йы Ахуырад æмæ зонады министрад кусы ног программæ аразыныл Президенты бахæсмæ гæсгæ», – банысан кодта министр.
Фарон егъау куыст бакодтой уæлæмхас ахуырады организацитæ. Гасситы Наталийы ныхæс-тæм гæсгæ, Сывæллæтты сфæлдыстады галуаны ахуыр кæнынц 900 скъоладзауы, 118 ахуырадон къорды 45 модификацигонд ахуырадон программæмæ гæсгæ.
РХИ-йы Хицауады Сæрдар Пухаты Эрик куыд банысан кодта, афтæмæй скъолайы æнæмæнгхъæуæг у рæзгæ фæлтæры хъомыладмæ лæмбынæг хъусдард аздахын.
«Кæй зæгъын æй хъæуы, сывæллæтты зонындзинæдты æмвæзад тынг ахсджиаг у. Фæлæ нырыккон реалитæ хынцгæйæ, хъæуы уæлдай хъусдард здахын хъомыладон аспектмæ, уыцы куыстмæ здахын хъæуы ный-йарджыты дæр. Ахуырады фадыджы нырма хъæуы бирæ саразын. Егъау куыст бакæнын хъæуы материалон-техникон базæ фæхуыздæр кæныны, ахуырадон-хъомыладон процессæн оптималон уавæртæ саразыны фæдыл æмæ фæд-фæдылонæй мах уыцы фарстытæ скъуыддзаг кæндзыстæм», – загъта Пухаты Эрик.
Банысанчындæуыд, зæгъгæ, УФ-йы ахуырады министрады сыл къух æрфыссыны сæраппонд æрбавдыст æрцыд модернизацийы дыккаг этапы план æруынаффæ йыл кæ-нынмæ. Уырдæм хаст сты ахæм мадзæлттæ, куыд ахуырадон уагдæттæ Интернетмæ баиу кæнын, ахуырадон уагдæтты æдасдзинад сифтонг кæнын, горæт Цхинвалы №3 скъолайы æмæ ЦАРЗ-ы микрорайоны ног сабидоны арæзтад, республикæйы территорийыл сывæл-лæтты улæфæн лагерь саразын.
Хыгъдон коллегийы куысты хайад райстой профилон парламентон комитеты сæрдар Гæбæраты Юри, горæты æмæ районты администрациты минæвæрттæ.
Comments are closed, but trackbacks and pingbacks are open.