Хӕрзад ӕмӕ гъӕдджын сты Ирыстоны суадӕттӕ. Уый банысан кӕнынц нӕ бӕстӕмӕ ӕрцӕуӕг уазджытӕ дӕр. Фӕлӕ уӕддӕр Хуссар Ирыстоны æмбæстæгты фæрныгад æмæ фæлхасгæнджыты бартæ хъахъхъæныны фадыгмæ хъусдард здахыны фæдыл комитет рӕстӕгӕй рӕстӕгмӕ аразы иртасæн куыстытæ нуазыны доны сконд бӕлвырд кæныны тыххæй.
Уый фæдыл дзырдта республикӕйы сӕйраг санитарон дохтыр Коцты Маринӕ, «Спутник-Хуссар Ирыстон»-ы цы пресс-конференци организаци ӕрцыд, уым. Йӕ ныхӕстӕм гӕсгӕ, раздӕры иртасӕнтимӕ абаргӕйӕ ацы аз августы мӕйӕ фӕстӕмӕ бӕрӕг фӕхуыздӕр, Едысы хъӕуӕй горӕтмӕ цы нуазыны дон цӕуы, уый гъӕд. Абарст куы саразӕм, уӕд июлы мӕйы онг доны бактериологон бӕрӕггӕнӕнтӕ уыдысты бӕрзонд. Уымӕ гӕсгӕ санитарон уагдон административон мадзӕлтты руаджы бандӕвта, ацы фарстæн чи дзуапп кӕны, уыцы уагдоныл. Хъуыддагмӕ ӕмбаргӕ ахаст равдисыны руаджы бӕрӕг хуыздӕр у доны гъӕд, æмæ нӕ ныфс ис, ӕппӕтдӕр кӕй араздзысты, цӕмӕй исӕм гарантигонд ӕмӕ гъӕдджын нуазыны дон.
Сӕйраг санитарон дохтыр куыд банысан кодта, уымӕ гӕсгӕ къуыри дыууӕ хатты аразынц бӕрӕггӕнӕнтӕ горӕты территорийыл нуазыны дӕттӕй. Нуазыны донӕн химион иртасӕнтӕй дарддӕр арӕзт цӕуы паразитологон ӕмӕ вирусологон иртасӕнтӕ дӕр. Абоны бонмӕ уыцы бӕрӕггӕнӕнтӕ сты нормӕмӕ гӕсгӕ. Уыцы куыст уагъд цӕудзӕн 2024 азы дæр.
Ног лабораторийы куысты тыххӕй
Хуссар Ирыстоны Югосетпотребнадзоры архайын райдыдта ног лаборатори (атомон-абсорбцион спектометр), кӕцы бӕрӕг кӕны доны, сыджыты, уӕлдӕфы æмӕ хӕлцадон продуктты сконды цас ис уӕззау згъæртæ, уый. Коцты Маринӕйы ныхӕстӕм гӕсгӕ, ныртӕккӕ уый бӕрӕг кӕнын актуалон у.
«Санитарон службӕйы куысты иу хай баст у лабораторон архайдимӕ. Азӕй азмӕ хуыздæр кӕнӕм нӕ лабораторийы материалон-техникон базӕ. 2006 азӕй фӕфылдӕр кодтам æрмæст нӕ иртасæнты гуырахст нӕ, фӕлӕ ма лабораториты нымӕц дӕр.
Хӕрзӕрӕджы пайда кæнын райдыдтам, нуазыны доны паразитологийы фӕдыл иртасӕнтӕй, дарддӕр та нын планы ис мæры сконд бӕрӕг кӕныны фæдыл куыст», – дзырдта уый.
Йӕ ныхӕстӕм гӕсгӕ, нӕ республикӕйы архайын райдыдтой ног кондадтӕ ӕмӕ комитет йӕ архайды фӕлгӕтты цӕттӕ хъуамӕ уа контролон мадзӕлттӕ уадзынмӕ. Уӕззау згъæртæ уӕвынц цӕугӕдӕтты, хӕдтулгӕтӕ цы хъӕстӕ газтӕ ӕппарынц уӕлдӕфмӕ, уыдоны. Ӕнӕмӕнгдӕр, зӕгъгӕ, хъӕуы бӕрӕг кӕнын, ӕндӕр республикӕтӕй цы продукттӕ ласынц нӕ бӕстӕмӕ, уыдон дӕр. Ацы иртасӕнты руаджы хъусдард здӕхт цӕудзӕн нӕ алфӕмблай уавӕрмӕ ӕмӕ ӕмбӕстӕгты ӕнӕниздзинадмӕ. Ныфс бавӕрдта, ӕрбалӕугӕ аз кӕй райдайдзысты аразын ӕндӕр иртасӕнтӕ дӕр.
Грипп ӕмӕ ОРВИ-йӕ рынчынты нымӕц фӕкъаддӕр
Уый банысан кодта Коцты Маринӕ пресс-конференцийы рӕстӕджы. Уымӕй размӕ хынцыд цыд сезонон рынчынты нымӕц бӕрӕг кӕй фӕфылдӕр. Уыцы рынчынтӕ, сӕйраджыдӕр, уыдысты грипп ӕмӕ ОРВИ-йӕ. Ивгъуыд азы бӕрӕггӕнӕнтӕм абаргӕйӕ, уӕд рынчынты фылдӕр хай уыдысты коронавирусон инфекцийӕ рынчынтӕ.
Хъихъгӕнаг хуыфӕг фӕзынд Хуссар Ирыстоны
Республикӕйы сӕйраг санитарон дохтыры ныхӕстӕм гӕсгӕ, республикæйы хынцыд ӕрцыд хъихъгӕнаг хуыфӕгӕй фæрынчын уæвыны 60 цауӕй фылдӕр. Банысан хъӕуы уый, ӕмӕ ацы низ рагӕй нӕ уыд нӕ республикӕйы. Ахæм низӕй рынчынты нымӕц бӕрӕг фӕфылдӕр Уӕрӕсейы территорийыл дӕр. Ӕнӕниз-дзинад хъахъхъӕныны дунеон организацийы бӕрӕггӕнӕнтӕм гӕсгӕ низы ныхмӕ вакцинаци ӕрвылаз дӕр ирвӕзын кӕны дифтери, джихниз, хъихъгӕнаг хуыфӕг ӕмӕ фадынӕгӕй рынчынты дыууӕ-ӕртӕ милуан амӕлӕты цауæй. Фӕлӕ бӕрӕг куыд у, уымӕ гӕсгӕ фӕстаг азты вакцинацийы хъуыддаг бӕрӕг къаддӕр у.
«Ацы аз махмӕ хынцыд ӕрцыд хъихъгӕнаг хуыфӕгӕй 62 рынчыны. Рынчынты нымӕц бӕрӕг фӕфылдӕр сентябры мӕйы, уӕдӕй фӕстӕмӕ фæкъаддӕр сты», – дзырдта уый.
Низы апарахаты хъуыддаг уый бабаста, сӕрдыгон улӕфтыты фӕстӕ сывӕллӕттӕ скъолатæ ӕмӕ сывӕллӕтты цӕхӕрадӕттæн кӕй бацыдысты, уыимæ. Низ та тагъд парахатгӕнаг у, ӕмӕ уымӕ гӕсгӕ рынчынтӕ фылдӕр кодтой. Уымӕ гӕсгӕ Коцты чызг сиды ӕмбӕстӕгтӕм, цӕмӕй ӕмбӕлон прививкӕтæ аразой, ӕмӕ низы авналӕнтӕ къуындæгдæр кæной.
Коронавирусы инфекци нӕ фесӕфт не ‘хсӕнӕй
Коцты Маринӕйы ныхӕстӕм гӕсгӕ, ӕртӕ азы дӕргъы нӕ республикӕ ӕндӕр бӕстӕтау тох кодта коронавирусы инфекцийы ныхмӕ. Ныфс бавӕрдта, бӕстӕйы Ӕнӕниздзинад хъахъхъӕныны министрад ӕмбӕлон ӕгъдауӕй кӕй ӕрӕвналдзӕн ацы фарст скъуыддзаг кӕнынмӕ. Фарст та бӕстон ӕрцӕудзӕн, вакцинаци ӕмбӕлон ӕмвӕзадыл уагъд куы ӕрцӕуа, уæд. Дӕнцӕгӕн ӕрхаста Къуайса ӕмӕ Цхинвалы районы. Ацы бынæтты вакцинаци уагъд ӕрцыд иттӕг хорз. Горӕт Цхинвалы та вакцинацийы процент у 64.
«Коронавирусы инфекци не ‘хсӕнӕй нӕ ма фесӕфт – фӕстаг дӕс мӕйы дӕргъы уагдон рабӕрӕг кодта фæрынчын уæвыны 205 цауы», – фехъусын кодта уый.
Къæбулты Марина
