Хуссар Ирыстоны зонад-иртасæн институты дарддæр реализаци цæуы проект «Популярная наука», зæгъгæ. Йæ сæйраг нысан у ахуырдзауты цымыдисдзинад зонад æмæ зонадон зонындзинæдтæм фæфылдæр кæнын. Проекты фæлгæтты каст цæуы лекцитæ скъоладзаутæн æмæ зонадмæ чи цымыдис кæны, уыдонæн. Зонад-иртасæн институты актон залы сын лекцитæ бакæсынц алы æмæ алы къабæзты ахуыргæндтæ. Ацы аз майы мæйы уагъд æрцыд фыццаг мадзал, кæцыйы рæстæджы профессор Дзугаты Къоста нæ горæты цалдæр скъолайы ахуырдзаутæ æмæ сæ ахуыргæнджытæн радзырдта Стыр Фыдыбæстæйон хæсты стыр Уæлахизы нысаниуæджы тыххæй.
15 ноябры Цхинвалы 6-æм астæуккаг скъолайы ахуыргæинæгтæ сæ директор Гæззаты Юринæ, историйы ахуыргæнджытæ Хъæцмæзты Мая æмæ Гоцъиты Алинæимæ æрбацыдысты зонад-иртасæнинституты библиотекæмæ.
Институты директор Гаглойты Роберт раарфæ кодта сæ уазджытæн æмæ сын балæвар кодта уагдоны зонадон кусджыты зонадон уацтæ. Институты директоры хæдивæг Къæбысты Мария сывæллæттæн радзырдта нæ республикæйы иунæг зонадон уагдоны историйы тыххæй æмæ банысан кодта, зæгъгæ, 100 азы дæргъы институты куыстой бирæ аккаг адæймæгтæ, ахуыргæндтæ, кæцытæ зындгонд сты Хуссар Ирыстонæн æддейæ дæр: Джусойты Нафи, Гæбæраты Никъала, Гæбæраты Сослан, Тъехты Баграт, Гаглойты Зинæ æмæ æндæртæ. Къæбысты чызджы ныфс ис, зæгъгæ, гъæдджын ахуыры фæрцы фæсивæдæй бирæтæ сæ цард кæй снывонд кæндзысты зонадæн. Уымæн æмæ, зæгъ, æрмæстдæр зонадæн у йæ бон мах траекторийы рæзтмæ ракæнынæн.
Библиотекæйы сæргълæууæг Джиоты Ларисæ радзырдта дунейы библиотекæты æмæ, сæрмагондæй зонадон библиотекæйы рæзты историйы тыххæй. Хистæркъласонтæ базыдтой зонадон архайды бындурты, информаци куыд агурын æмæ йемæ куыд кусын хъæуы, уыдæтты тыххæй. Ахуырдзаутæ хъуыстой лæмбынæгæй, афтæ цымыдисон сын уыд информаци. Æмæ сæ къухтæм антикварон чингуытæ куы райстой, кæцыты сæм æфснайæндонæй рахаста библиотекæйы сæргълæууæг, уæд сæ цæсгæмттыл фæзынд дисдзинады æнкъарæнтæ.
Дыккаг бон, 16-æм ноябры та 6-æм астæуккаг скъолайы хистæркъласонтæн урок ауагъта археолог, историон зонæдты доктор, профессор Дзаттиаты Руслан. Йæ бирæ азты зонадон архайды фæрцы къухты бафтыд археологон къахæггæгты зынгæ хай ног фæлтæртæн бахъахъхъæнын, кæцытæ фæхъæздыгдæр кодтой национ культурæйы хæзнадон. Дзаттиайы фырт ахуырдзаутæн радзырдта Хуссар Ирыстоны археологон къахæггæгты тыххæй.
6-æм астæуккаг скъолайы директор Гæззаты Юринæ бузныджы ныхæстæ загъта зонад-иртасæн институты кусджытæ æмæ дирекцийæн. Банысан кодта, зæгъгæ, йæ ныфс ис дарддæры æмгуыстадæй.
ДЖИОТЫ Екатерина
