Къуезерты Петры хорз зонынц нæ газеткæсджытæ æмæ нæ адæмæн сæ фыл-дæр. Уымæн йæ дзырдбыдтæ арæх ныммыхуыр кæны нæ газет. Стыр куыст кæны Петр зæрдылдарæн бонты чиныг-къæлиндартæ аразыныл. Хъæды хæдзарады специалист уæвгæйæ Къуезеры фырт Хуссар Ирыстоны хъæдты тыххæй дæр рауагъта цыппар чиныджы, кæцытæ хорз фæахъаз сты хъæд фылдæр, рæсугъддæр æмæ æнæниздæр кæныны хъуыддагæн. Цы чингуытæ рауагъта, уыдон нымæц у 25. Уыдонæй сæ иу «Ученые Южной Осетии» Хуссар Ирыстоны «Мыхуыры хæдзар» рауагъта æрæджы, октябры мæйы.
Чиныгмæ хаст æрцыдис, Ирыстон æмæ ирон адæм буц æмæ сæрыстыр кæмæй сты, уыдонæй 72 ахуыргонды къамтæ æмæ биографион бæрæггæнæнтæ. Се ‘хсæн сты алы ирон æмбæстагæн зонгæ ахуыргæндтæ: Уанеты Захар, Гаглойты Юри, Техты Баграт, Цыбырты Людвиг, Битарты Зоя, Гæбæраты Никъала, Дзабиты Зарбег, Джусойты Нафи, Плиты Гацыр, Къæбысты Рутен, Козаты Аксенти, Тедеты Заирæ æмæ æндæртæ. Уыдонæй алкæцы дæр стыр куыст бакодта, куыд зонад æмæ ахуырады, афтæ ма цы къабæзты архайдтой, уым.
Петр ныртæккæ та кусы чингуытæ «Ирыстоны кадджын сылгоймæгтæ» æмæ «Хетæгкаты Къостайы номыл Паддзахадон премиты лауреаттæ» чингуытæ аразыныл. Чингуытæ рацæудзысты уырыссаг æвзагыл.
ГÆЗЗАТЫ Иван
