Цалцæггæнæн æмæ арæзтадон куыстытæ сæ тæмæны сты Дзауы районы скъола-интернаты.
Санахъоты Гришикы номыл Дзауы астæуккаг скъола-интернаты 25-æм майы фæстаг дзæнгæрæджы цытджын бон куы нысан кодтой æмæ рауагъдонтæм арфæйы ныхасимæ нæ республикæйы Дунеон ахыгъдон банчы къухдариуæггæнæг Вадим Шадян куы рахызт, уæд фехъусын кодта, зæгъгæ, коммерцион банчы къухдариуæгады фæндонмæ гæсгæ скъолайæн лæвары хуызы хъуамæ саразой æхгæд спортивон зал. Йæ раныхасы Вадим Шадян банысан кодта, зæгъгæ, сывæллæттæн зымæгон уазæлтты æмæ къæвда бонты дæр сæ бон уыдзæн се ‘нæниздзинад фидар кæнын. Кæй зæгъын æй хъæуы, ацы ног хабарыл ахуыргæнинæгтæ æмæ педколлектив сæмбæлдысты стыр цины æнкъарæнтимæ æмæ йæ равдыстой тыхджын къухæмдзæгъдæй, загътой йын стыр бузныджы ныхæстæ лæмбынæг хъусдард сæм кæй здахы, уый тыххæй. Вадим Шадян скъола-интернатæн арæх хæрзиуæгон æххуыстæ кæй бакæны æмæ сæ фарсмæ кæй æрбалæууы, уымæ гæсгæ ацы æнæнхъæлæджы лæвары сырæзтыл дызæрдыг дæр нæ бакодтой. Коммерцион банчы къухдариуæггæнæг скъола-интернатæн кæй баныфсæвæрдта, уыцы æхгæд спортивон залы арæзтадмæ æрæвнæлдтой июлы мæйы райдианты. Ацы арæзтадон объекты ныридæгæн кусынц фондз кусæджы. Цæмæй спортивон залы конструкци æмбæлонæй, нырыккон стандарттæм гæсгæ саразой, уый тыххæй уал дыууæ специалисты æрхуыдтой Уæрæсейæ. Ныртæккæ спортивон залæн арæзт цæуы йæ бындур, кусджытæ дзы ныккалдтой хуыр æмæ йæ слæгъз кодтой. Ныр æнхъæлмæ кæсынц арæзтадон æрмæджытæм æмæ та кусджытæ æрбалæудзысты æмæ адарддæр кæндзысты сæ куыст. Æхгæд спортивон зал арæзт цæуы скъолайы бæстыхайы уæллаг фарс. Цы бынат ын рахицæн кодтой, уый у стыр.
Кæд скъолайы бæстыхай ногарæзт у, уæддæр дзы мидæгæй бæрæгæй разынд цы дзы ис саразинаг, уыдæттæ. Капиталон цалцæггæнæн куыстытæм та аразджытæ æрæвнæлдтой июны мæйы æмæ ныр сты фæуынхъус. Ацы ран цалцæггæнæн куыстытæн дзуапп чи дæтты, уыцы хистæр Джиоты Славик куыд зæгъы, уымæ гæсгæ уыдон скъола-интернаты сæ куыст райдыдтой 2-æм июнæй æмæ йæ рæхджы фæуыдзысты.
«Мах цыппарæй цалцæггæнæн куыстытæ кæнæм ацы скъолайы. Махмæ бахатыдис Хуссар Ирыстоны Дунеон ахыгъдон банчы къухдариуæггæнæг Вадим Шадян æмæ июны райдианæй æрæвнæлдтам нæ куыстмæ. Фыццаг уал бавдæлдыстæм æмæ сцалцæг кодтам дыккаг уæладзыг æнæхъæнæй. Байсæрстам ын йæ цар æмæ йæ къултæ. Кæцыдæр кълæсты раивтам ламинат æмæ дзы ног сæвæрдтам. Куыд нæ федтат, афтæмæй ныр та кусæм фыццаг уæладзыджы. Ам дæр æнгæс куыстытæ кæнæм кълæсты. Фыццаг уæладзыджы кълæстæй уæлдай ис къæбиц æмæ хинайæн хатæнтæ. Уыцы рæтты хъуыдис сантехникты куыст æмæ сæ бакуыстой. Мах æмткæй ламинат сæвæрдтам 300 квадратон метры бæрц. Уыдис дзы ахæм кълæстæ, кæцытæн бамбыдысты сæ пъолтæ æмæ сæ хъуыдис раивын. Хæрæндон арæзт уыдис пластикæй æмæ ныцъцъæлтæ ис. Ракалдтам æй бынтондæр æмæ йæ ныр сарæзтам, сывæллæттæн куыд хуыздæр у, афтæ. Ам мидæггагон куыстытæ куы – фæуæм, афтæ рахиздзыстæм бæстыхайы фасад сцалцæг кæнынмæ. Кæмдæрты разгъæлдис, ракæлдтытæ кодта æмæ сыл ногæй азилдзыстæм. Нæ куыстытæ ма аххæсдзысты иууыл фылдæр – дыууæ къуырийы бæрц æмæ йæ уый фæстæ радтдзыстæм цæттæйæ. Кусджытæн ам, бынаты аразынц хæринаг æмæ сæ куыстмызд та райсынц афоныл. Уымæй дарддæр ма нын Цхинвалæй Дзаумæ фидынц нæ фæндаггæгтæ дæр. Иудзырдæй, райгонд стæм нæ куысты хъуыддагæй», – зæгъы Джиойы фырт.
Кæд нырма ног ахуыры азмæ бирæ рæстæг ис, уæддæр хорз у æмæ рæстæгыл кæй фæуыдзæнис арæзт ацы æхгæд спортивон зал æмæ йыл скъоладзау фæсивæд, педколлектив æмæ ныййарджытæ стыр æхсызгонæй кæй фæцин кæндзысты ахуыры райдианы, уымæн æмæ йæ арæзтад уыдис æнæмæнгхъæуæг.
Цхуырбаты Лариса
Comments are closed, but trackbacks and pingbacks are open.