ХЪЕСАТЫ ИРИНÆ – УÆРÆСЕЙЫ СГУЫХТ ДОХТЫР

Уæрæсейы Президент Владимир Путины  Барамындæй «УФ-йы сгуыхт дохтыр»-ы кадджын ном лæвæрд æрцыд Хъесаты Иринæйæн. Ирон сылгоймаг бирæ азты дæргъы хи-рургæй кусы Санкт-Петербурджы хæстыты ветеранты госпиталы.

«УФ-йы сгуыхт дохтыры ном мын лæвæрд кæй æрцыд, уый æз мæхицæн нымайын стыр кадыл. Дохтырæй кусын 40 азы. Ныртæккæйы уавæры кусæм уæлдай фæтыхджындæргонд режимы, æххуыс кæнæм ног коронавирусон инфекцийæ рынчынтæн. 40 азы дæргъы æз иу хатт дæр фæсмон никуы фæкодтон, дохтыры професси кæй равзæрстон, уый тыххæй. Нæ бинонты æртæ фæлтæры сты дохтыртæ. Мæнæн мæ иууыл стырдæр хорзæх у, нæ уæззау куыстмæ æнæкæсгæйæ, мæ чызг дæр дохтыр-хирург кæй ссис, уый», – банысан кодта Хъесаты Иринæ.

Хъесаты чызг æнтыстджынæй каст фæцис Ленинграды педиатрион медицинон институт.

ЦЪЫККАТЫ АЛАН – КАЛУГÆЙЫ ОБЛАСТЫ ÆНÆНИЗДЗИНАД ХЪАХЪХЪÆНЫНЫ МИНИСТРЫ ХÆСТÆ ÆХХÆСТГÆНÆГ

Цæгат Ирыстонæй рацæугæ, уæлдæр квалификацион категорийы хирург Цъыккаты Алан нысан æрцыд Калугæйы областы æнæниздзинад хъахъхъæныны министры хæстæ æххæстгæнæгæй. Уый тыххæй 28-æм апрелы фехъусын кодта регионы губернатор Владислав Шапша.

«Æнæниздзинад хъахъхъæныны министры хæстæ ног æххæстгæнæджы фыццаградон хæс у Калугæйы областы министрады æмæ  æнæниздзинад хъахъхъæныны системæйы куыст æрнывыл кæнын ног коронавирусон инфекци парахат кæныны вазыгджын уавæрты», – банысан кодта Владислав Шапша.

Цъыккаты Алан – Цæгат Ирыстоны паддзахадон медицинон академийы рауагъдон у медицинон зонæдты кандидат, доцент. Уый размæ куыста Калугæйы областы тагъд медицинон æххуысы клиникон рынчындоны сæйраг дохтырæй. УФ-йы Президент Владимир Путины Барамындмæ гæсгæ Цъыккаты Аланæн лæвæрд æрцыд «Уæрæсейы Федерацийы сгуыхт дохтыр»-ы кадджын ном.

Comments are closed, but trackbacks and pingbacks are open.