Цы у, цы нысан кæны фыдæнхъæл? Фыдæнхъæл у, истæмæ, искæмæ, исты хъуыддаг æрцæуынмæ, сырæзынмæ, ма сырæзынмæ (æмæ а.д.) тынг куы æнхъæлмæ кæсай æмæ де ‘нхъæлмæкаст æнæхъуаджы куы фæуа…
Æниу, зын бауырнæн у, æмæ дзырд кæуыл цæуы, уыдон фыдæнхъæл фæуыдаиккой, ома, развæлгъау æй ма зыдтаиккой æмæ æмбæрстаиккой, афтæ кæй уыдзæн, уый… Кæд афтæ у, уæд та – дыккаг мардæрцыд!.. Адæймаг исты куынæ æмбара, политикæ цæимæ нуазгæ кæнæ хæргæ у, уымæн куы ницы зона, йæ цæрæнбонты иу газет, иу чиныг куынæ бафæрса, уæд дзы цы домыс – мæгуыры тæригъæд ма знагæн дæр куы бакæнынц… Фæлæ куы зона, фыдбылыз кæй къахы, афтæмæй йæ куы къаха, уый у тæссаг, æмæ-иу нæ Хуыцау уæддæр куы бахизид ахæм тæссаг хъуыддæгтæй!
Бæстæ сæ сæрыл сисгæйæ, фæдис чи ныхъæр кодта, Хуссар Ирыстоны адæмы диктатурæ цæгъдæн кæны, зæгъгæ, уыдонæн уал сæ фæдис-хъæр æнæхъуаджы кæй фæцис, уымæй уал сын «ацъæл» – диктатурæ кæм вæййы, уым къухдариуæгады ныхмæ иу хъыпп-сыпп скæныны тыххæй дæр ахсгæ кæнынц, махмæ та сæ бæрнон бынæтты, сæрдæрттæ, хæдивджытæй уромынц, хорзæхтæ, премитæ сын дæттынц…
Значытт, диктатурæ – капутт…
Стæй… Куыд фæзæгъынц, кæмæндæрты сæ «ахтибар» Сергей Назаровы ‘рцыдæй бынтон асаст. Уымæн æмæ уартæ кæдæй нырмæ сæ тыбыртæ цæгъдынц, куыд сæхи дам-думтæй, афтæ сæ иузæрдион æмцæдисон æмæ æххуысгæнæг Гукемуховы гуырдзиаг «эхо»-йы фæрцы дæр, цыма Уæрæсейы Федерацийы къухдариуæгад тынг æнæразы у Хуссар Ирыстоны абоны къухдариуæгадæй, цыма тынг «агъшпотебули» сты Бибиловы митæй, цыма сын, йæ къух ын райсой, уымæн дæр нал бæззы, цыма Инвестпрограммæ ныллæууыд удисыны къахыл æмæ уый æнæтугæргæвст кæны Уæрæсейы къухдариуæгады, се знæгты цæсты сæ æфтауы æмæ афтæ дарддæр…
Уæдмæ фæкæс, æмæ Назаров Хуссар Ирыстонмæ æрхæццæ. Назаров та у Уæрæсейы Федерацийы Экономикон рæзты Министры хæдивæг, кæцы дзуапп дæтты Уæрæсейы Федераци æмæ Республикæ Хуссар Ирыстоны ‘хсæн экономикон фадыджы æмгуыстадæн, номхуындæй – Инвестпрограммæйы реализацийæн. Уæрæсейы къухдариуæгад Бибылты Анатолимæ, кæйдæрты куыдфæнды, ахæм æнæуынон ахаст куы дарид, уæд Назаров ардæм не ‘рцыдаид, æмæ кæд æрцыдаид, уæд та дур дурыл дæр нал ныууагътаид, алцы дæр критикæйы бын фæкодтаид. Стæй Бибылты Анатолийы разæй фембæлдаид, Уæрæсейы Федерацимæ фыстæг чи ныффыста, ома, финансон æххуыс нын мауал кæнут, уымæн æмæ нæ хицауад æнæлегитимон у, зæгъгæ, уыдонимæ, æмæ уымæй бамбарын кодтаид, Бибылты Анатоли, куыд Хуссар Ирыстоны разамонæг, афтæ Уæрæсейы кæй нал «устраивать» кæны… Назаров та фембæлд Бибылты Анатолиимæ дæр æмæ «йæ æнæлегитимон хицауадимæ» дæр, æмæ бæрзонд аргъ скодта Инвестпрограммæ куыд æххæст цæуы, уымæн дæр æмæ æмгуыстады æндæр къабæзты фæстиуджытæн дæр.
Æмæ куыд федтам, афтæмæй йæ хъуыдыйы кæрон дæр нæ уыд, Хуссар Ирыстоны абоны уавæр зыгъуыммæгондæй, кæрцвæлдæхтæй равдисынмæ чи хъавы æмæ уымæй нæ хæдбардзинад дызæрдыджы чи æппары, уыдонимæ фембæлын. Æгæрыстæмæй, кой дæр не скодта сæ дæрæнгæнæг «тамакойы контрабандæйы» темæйы тыххæй. Афтæ дæр сæ нæ бафарста, алæ-ма фенын мын кæнут, уæ контрабандон тамакоимæ уæзласæн наутæ кæм равдæлон кæнут, уыцы денджызон порттæ, кæм уын сты – «Цъунары цады» æви «Чъребайы озеройы…».
Æрцыд, алцы дæр федта йæхи цæстæй, саргъ кодта алцæмæн дæр, йæ позици бамбарын кодта, йæ коллегæтимæ дарддæры хæстæ æмæ аразинæгтыл æруынаффæ кодта æмæ ацыд. Йæхæдæг куыд загъта, афтæмæй – райгондæй, зæрдæрухсæй. Æмæ йæ ахæм ацыдæй йæ фæстæ ныууагъта æнæзæрдæхцон, удмарæг фыдæнхъæл. Кæй зæгъын æй хъæуы, алкæмæн нæ – кæмæндæрты.
Уæддæр диссаг у… Ирон уæвгæйæ, дæ куыд хъуамæ бафæнда дæ фыдыбæстæ æвзæрæй, дзырдтагæй, дæлдзиныгæй равдисын? Цæмæн, цæй тыххæй?.. Дыууæ дуры кæрæдзийы уæлæ чи никуы æрæвæрдта, ахæм адæймаг цы цæсгомæй хъуамæ æвæра ныхдуртæ, кусгæ, аразгæ чи кæны, ахæмтæн? Афтæ æгъатыр æмæ æнауæрдонæй куыд хъуамæ дзурай искæй ныхмæ, куыд æй хъуамæ аххосджын кæнай, знон дæхæдæг дæ хъусты онг сагъд кæм уыдтæ, ахæм хъуыддæгты? Куыд хъуамæ кæнай, знон куырм цæстæй кæмæ кастæ, дæ къæхтæ кæуыл сæрфтай, ахæм рæстдзинады кой?..
Цæмæн, уымæн æрмæстдæр иу аххосаг ис: æрæввахс кæнынц æвзæрстытæ æмæ цæмæй æвзæрстыты рæстæджы адæм ма скæной, æцæгæй чи уыд, уыцы диктатурæйы кой – иу æнæразыйы ныхасы тыххæй дæр адæймагмæ цы æнхъæлмæ каст, уыдæтты кой… Цæмæй адæм ма æрымысой, Уæрæсе нын раздæр фылдæр æхца кæй æрвыста, фæлæ астæумæ цъыфы сагъдæй кæй баззадыстæм, уый… Цæмæй адæмы зæрдыл ма æрлæууой, дæргъæй-дæргъмæ «шаландатыл» гуырдзыимæ контрабандон тамакойæ æцæгæй куыд базар кодтой, уыдæттæ…
Уыдонæн се ‘мбисонд – сæхи. Кæмæндæрты сæхи хъуыддæгтæ, сæхи интерестæ ис, фæлæ махæн та цы нæ уæлфад гал лæууы, хорз адæм, цы ‘рсырдтам, цæмæн æмæ кæдмæ хъуамæ кафæм искæй къæхты хъæрмæ?
Comments are closed, but trackbacks and pingbacks are open.