Знауыры районы Нагутнийы хъæумæ хæстæг цы дон цæуы, уымæн йæ хосгæнæн хийæдтæ адæм раджы фæхатыдысты æмæ йæм хос кæнынмæ цыдысты канд Хуссар Ирыстоны цæрджытæ нæ, фæлæ ма Гуырдзыстоны алы къуымтæй дæр. Уыцы рæстæджы транспорт афтæ арæх кæм уыд æмæ æввахс бынæттæй цыдысты фистæгæй, иутæ та сæ рынчынты ластой галуæрдæттыл. Иугæр ацы донæй ваннæтæ райста зæгъгæ, уæд-иу цыбыр рæстæгмæ рынчыны æнæниздзинадыл бандæвта хорзæрдæм æмæ фæстæмæ здæхт райгондæй.
Советон хицауады рæстæджы æмбæлон органтæ хуыздæр хъусдард аздæхтой ацы бынатмæ æмæ дзы сырæзт хосгæнæн уагдон, рынчынтæ дæр æм фылдæр цыдис. Цæдис куы фехæлд, уæд æм нал уыд æмбæлон хъусдард æмæ куыдфæстагмæ æрлæууыд йæ кусынæй дæр. Цыд рæстæг, рынчынты та æнæмæнг хъуыд йæ сæр. Æмæ не ‘хсæн разынд, адæмы тыхстдзинадмæ куыдфæндыйы цæстæй чи нæ кæсы, сæ уавæр фæрог кæныныл сын зæрдиагæй чи батыхст, ахæм адæймаг. Уый у ацы комбæсты уарзон адæймаг Челехсаты Владимир æмæ сфæнд кодта йæхи фæрæзтæй хосгæнæн бынат сæндидзын кæнын. Æнцон нæ уыд уыцы хъуыддаг срæвдз кæнын, кæд йæ разы бирæ цæлхдуртæ æвзæрд, уæддæр ын бантыст, цы хæрзиуæгон куыстмæ бавнæлдта, уый сæххæст кæнын. Уый уыд 2002 азы æмæ уæдæй фæстæмæ «Нагутни»-йы хосгæнæн уагдон цæстуарзонæй лæггад кæны, йе нæниздзинадæй чи фæтыхсы, уыцы æмбæстæгтæн. Зæгъын хъæуы ацы донæн, йæ хосгæ-нæн миниуджытæ дзæвгар кæй сты, сæйраджыдæр та ахъаз у æрхджыты, цармы æмæ æндæр низтæн, куы дзы нуазай, уæд сыгъдæг кæны адæймаджы орга-низм. Хос кæнынмæ чи цæуы, уый хъуамæ раздæр басгара дохтыр, хъуамæ йæм дохтырæй уа стационарон- курортон картæ.
Челæхсайы фырт куыд радзырдта, афтæмæй хосгæнæн сезон байгом вæййы июны мæйы æмæ дзы баулæфы 200 адæймаджы бæрц. Ардæм се ‘нæниздзинад банывыл кæнынмæ æрцæуынц Волгоград, Санкт-Петербург æмæ Уæрæсейы æндæр горæттæй дæр. Цæвиттон, фарон аз дзы баулæфыд зынгæ режиссер Гергиты Валерийы оркестры æвзонг нæлгоймаг музыкант æмæ фæстæмæ аздæхт цины æнкъарæнтимæ. Йе нæниздзинадыл ацы дон афтæ хорз бандæвта, æмæ загъта, ног сезоны дæр та сæм кæй æрцæудзæн.
Зæгъын хъæуы, азæй азмæ кæй хуыздæр кæнынц улæфджыты уавæртæ. Нырмæ рухсæй пайда кодтой дизелы фæрцы, фæлæ йæм æрæджы æрбауагътой электрохахх. Улæфджытæн фадат ис телевизормæ бакæсынæн, фæхъазынц бильярдæй, ис дзы спортивон тренажертæ, шахмæттæ, шашкитæ. Ис сын теннисæй хъазыны фадат дæр. Цы торне дзы ис, уым улæфæг сылгоймæгтæ скæнынц дзултæ. Улæфджытæ райгонд сты, ам сын цы хæрзад хæринæгтæ æрæвæрынц сæ разы бон æртæ хатты, уыдонæй. Æгæрыстæмæй сын раттынц сæлдæг дæр. Челæхсаты Владимир ма куыд загъта, афтæмæй улæфджыты нымæц рæстæджы цыдимæ кæны фылдæр æмæ хорз уаид, фидæны дзы куы сырæзид дыууæуæладзыгон корпус.
ХУЫБИАТЫ Никъала
Comments are closed, but trackbacks and pingbacks are open.