6-æм июлы йæ дуæрттæ байгом кæндзæн Знауыры районы Нагутнийы хъæумæ хæстæг хосгæнæндон «Ныфс». Фыццаг къорды номхыгъдмæ бахаудысты куыд Стыр Фыдыбæстæйон хæсты архайджытæ, фыццаг къорды инвалидтæ, Хуссар Ирыстоны хæстон ар-хайдтыты рæстæджы чи фæсахъат ис, райгуырдæй фæстæмæ инвалид сывæллæттæ æмæ ма Хуссар Ирыстоны пенсиисджытæ, кæцытыл цæуы 75 азæй фылдæр. Ацы категоритæ се ‘ппæт дæр æрвыст æрцыдысты Æнæниздзинад æмæ социалон рæзты нывæзтмæ гæсгæ. Уымæй размæ министрад фехъусын кодта уæлдæр ранымад категориты æмбæстæгтæй номхыгъд арæзт кæй цæуы, æмæ кæй фæнды, уыдон документтæ бацæттæ кæнын кæй хъæуы.
Æнæниздзинад æмæ социалон рæзты министры хæдивæг Сиукъаты Наирæ куыд зæгъы, афтæмæй ацы категоритæй хосгæнæн санатори «Ныфс»-ы баулæфын кæй фæнды, уыдонæй сырæзт къорд æмæ сæ 6-æм июлы афæндараст уыдзысты Нагутнимæ. Бæлццæтты хæрдзтæ иууылдæр бамбæрздзæнис министрад.
Улæфæн сезонмæ коттедж-тæ рцыдысты цалцæг, фæндаг дæр алæгъз кодтой. Хосгæнæндонмæ цæуджыты нымæц ацы аз бæрæг фылдæр уыдзæн, уымæн æмæ паддзахады æххуысæй кæцыдæр категорийы æмбæстæгтæ кæд лæвар баулæфдзысты, уæд Профцæдисты советы хаххыл та уыдзæн баулæфæн æрдæг аргъыл. Стæй ма коронавирусы аххосæй Уæрæсемæ фæндæгтæ æхгæд кæй сты, уый дæр тынг бакъуылымпы кодта фæсарæнтæм санаторион-курортон хоскæнынмæ арвитыны фарст. Ацы фарсты фæдыл министрады куыд зæгъынц, афтæмæй, арæны баконды фæстæ цард йæ гаччы куы сбада, уæд скъуыддзаг æрцæудзæнис уый дæр.
Æрвылаз дæр Знауыры районы Нагутнийы улæфæндоны баулæфынц 100 адæймагмæ æввахс. 10 боны баулæфыны аргъ у 12 мин æмæ 500 сомы. Уырдæм хауынц ваннæтæ, хæлц æмæ цæрыны хæрдзтæ. Ам цæрæн бæстыхæйттæй дарддæр ис хæрæндон, донæй ваннæтæисæн хатæн, сæрдыгон улæфæн мæнгагъуыст, кæцы ис цæугæдоны сæрмæ, медпункт, фонтан, библиотекæ. Улæфæндоны ис музыкалон инструменттæ, бильярд æмæ æндæр хиирхæфсæн мадзæлттæ.
Санаторийы ис цалдæр хосгæнæн доны. Ис дзы цъыфæй хосгæнæн дæр. Фылдæрбæрцæй ардæм фæцæуынц, стæгниз цы адæмы тыхсын кæны, уыдон. Уæлфæндоны цы коттеджтæ ис, уыдоны иу рæс-тæджы сæ бон у 40 адæймагæн се ‘нæниздзинад банывыл кæнын. Ам цы сатæг уæлдæф ис, уый хорз æндавы йæ нуæрттæ кæмæн риссынц, ахæм адæмыл дæр. «Ныфс»-ы территорийыл телефонон бастдзинад нæй, фæлæ чысыл бæрзонддæр ранмæ ссæугæйæ дæ бон у мобилон телефонæй аныхас кæнын.
Хосгæнæндоны диссаджы æууæлты кой айхъуыст 1972 азы æмæ ардæм ваннæтæ исынмæ цæуынц канд республикæйы цæрджытæ нæ, фæлæ ма æндæр рæттæйдæр дæр. Советон цæдис куы ныппырх, уæд ам цы чысыл хатæн уыд, уый дæр æдзæллаг уавæрмæ æрхауд, хосгæнæндонмæ фæндаг дæр нал уыд. 2002-2003 азты Знауыры районы цæрæг Чилæхсаты Владимир сфæнд кодта ам хосгæнæндон саразын. Фæндаг дæр æм кæй нæ уыд, уый тыххæй стыр фыдæбæтты бахауд амалиуæггæнæг. Сарæзта йæ æмæ уæдæй нырмæ æрвылаз дæр ам цы адæм баулæфы, уыдон баззайынц райгондæй. Чилæхсаты Владимир куыд зæгъы, афтæмæй уый паддзахадæй алы аз дæр фæдомы, цæмæй йын улæфыны сезонмæ баххуыс кæной æмæ Нагутнийы хъæуæй санаторимæ уагъд æрцæуа электроны рухс. Ацы фарст хæсгонд æрцæуы «Электросеть»-æн, фæлæ уыдонæн æрвыл аз дæр ис иунæг дзуапп – фаг фæрæзтæ, нæм нæй, зæгъгæ.
Уазæгты Марфа
Comments are closed, but trackbacks and pingbacks are open.