Информаци æмæ мыхуыры паддзахадон комитеты пресс-центры Республикæ Хуссар Ирыстоны Мидхъуыддæгты министрады æхсæнадон фæтк хъахъхъæныны управленийы хистæр Гаглойты Маирбег фембæлд дзыллон информацион фæрæзты минæвæрттимæ æмæ сæ базонгæ кодта, Уæрæсейы Федерацийы æрдыгæй Хуссар Ирыстоны хæдбардзинад банымайыныл 10 азы сæххæсты боны цытæн бæрæгбонон мадзæлттæ ауадзыны рæстæджы республикæйы æдасдзинад æмæ æхсæнадон фæтк куыд ифтонг цыд, уыимæ.
Гаглойты Маирбег куыд радзырдта, афтæмæй æхсæнадон фæтк хъахъæдтой Мидхъуыддæгты министрады 500 кусæджы. Йæ ныхæстæм гæсгæ, бæрæгбонмæ цы уазджытæ цæуынц, уыдоны æдасдзинады тыххæй Ручъы тъунелæй суанг горæтмæ фæндаг бæрæг кодтой сапертæ, сгæрстой фæсвæндæгты дæр.
Уый куыд загъта, афтæмæй басгæрстæуыд горæты 5-æм астæуккаг скъолайы кæрты цы мемориалон уæлмæрд ис, уый дæр, уымæн æмæ бæрæгбонмæ цы уазджытæ æрцæуынц, уыдон фыццаг бацæуынц уырдæм æмæ дидинджытæ сæвæрынц фæмардуæвæг хъахъхъæнджыты мемориалон цыртыл. Уый фæстæ ацæуынц, бæрæгбонон программæмæ гæсгæ цы мадзæлттæ уагъд цæуы, уырдæм – Театралон фæзуат æмæ горæты стадионмæ.
Гаглойты Маирбеджы ныхæстæм гæсгæ, бæрæгбонон мадзæлттæ уадзыны бонты радгæсты хайадмæ иунæг хатт дæр нæ фехъусын чындæуыд барвæтк халыны цауы тыххæй.
Бæрæгбоны хæдразмæ цы зынгсивæрзтытæ уыд, уый тыххæй та Мидхъуыддæгты министрады минæвар загъта, зæгъгæ, уыцы цаутæн криминалон кæнæ диверсион бындур нæй.
«Бæрæгбоны хæдразмæ – 24 августы изæры горæты бирæфатерон бæстыхайы æмæ 25 августы изæры электродæлстанцы зынгсирвæзты тыххæй мæм цы информаци ис, уыдонæн нæй диверсион характер. Барæй сæ исчи ссыгъта, ууыл дзурынæн ницы бындур ис, ам аххосджын у адæймагон фактор, уымæн æмæ хъахъхъæд не ‘рцыдысты зынгсирвæзтæй æдасдзинады фæткойтæ.
Гаглойты Маирбег ма банысан кодта уый дæр, æмæ ацы цауты фæдыл цæуы фæдагурæн куыстытæ, кæцыты фæрцы рабæрæг уыдзысты зынгсирвæзтыты аххосæгтæ.
Осиаты Индирæ
Comments are closed, but trackbacks and pingbacks are open.