Ахуырады министрады хайады сæргълæууæг Плиты Азæ куыд фехъусын кодта, афтæмæй ацы аз не скъолаты рауагъдонты нымæц у 509. «Нæ республикæмæ лимиттæ æрвыст æрцæуынц куыд Ахуырады министрады, афтæ Россотрудничествойы хаххыл дæр. Кæй зæгъын æй хъæуы, бадзырд арæзт æрцæуы нæ Ахуырады министрад Уæрæсейы Федерацийы æмгуыст цы уæлдæр ахуыргæнæндæттимæ кæны, уыдонимæ. Уыдон сæ рады нæ республикæйæн радтынц лимиттæ. Дæсныйæдтæ сæрмагондæй æвзæрст æрцæ-уынц нæ республикæйы Хицауады паддзахадон закъазмæ гæсгæ. Ацы аз Россотрудничествойы хаххыл рахицæн æрцыд 18 бынаты, уымæй дарддæр ма Цæгат Ирыстоны Аграрон Университет бюджетон бындурыл исы не ‘мбæстæгты, кæцытæн ис уæрæсейаг æмбæстагдзинад. Афтæ ма Цæгат Кавказы Хæххон металлургион институты дæр нæ ра-уагъдонтæн лæвæрд æрцыд 59 бынаты. Уымæй дарддæр нæ æмбæстæгтæ, куыд фæсарæйнаг æмбæстæгтæ,сæ бон у сæхи тыхтæй ахуыр кæнынмæ бацæуой уæрæсейаг ахуыргæнæндæттæм», – фехъусын кодта Плиты Азæ.
Куыд зонæм, афтæмæй нæ республикæйы Мидхъуыддæгты министрад дæр цалдæр азы дæргъы нæ республикæйы рауагъдонты ифтонг кæны лимиттæй профилон уæлдæр ахуыргæнæндæттæм.
Мидхъуыддæгты министрады хайады гæс Джиоты Созыр куыд загъта, афтæмæй нæ рауагъдонтæй иу хай райстой фæдысгарæдты дæсныйад. Уымæ гæсгæ уыцы рауагъдонты зындæр у куысты бынæттæй сифтонг кæнын, штатон хыгъды уыйбæрц бынæттæ кæй нæй, уый фæстиуæгæн уыдонæн куысты бынæттæ ссардæуы нæ Мидхъуыддæгты министрады æндæр бынæтты. Иунæг рауагъдон дæр æгуыстæй нæ баззайы, се ‘хсæн ис ахæмтæ дæр, кæцытæ ссарынц куыст æндæр дæсныйады фæдыл. Джиоты Созыр куыд загъта, афтæмæй Уæрæсейы Федерацийы Мидхъуыддæгты министрад ацы аз иннæ азимæ абаргæйæ радта ног професситы квотæтæ. Зæгъæм, Воронежы Мидхъуыддæгты министрады институт радта квотæтæ ахæм ног факультеттæм куыд «Компьютерон æдасдзинад», «Информацион æмæ телекоммуникацион системæты æдасдзинад», «Спе-циалон радиотехникон системæтæ», Нижний Новгороды Мидхъуыддæгты академи та квотæ радта «Экономикон æдасдзинад»-ы факультетмæ. Ацы ног профилон здæхтытæ махæн лæвæрд æрцыдысты фыццаг хатт. Нæ республикæйы Мидхъуыддæгты министрады минæвар куыд банысан кодта, афтæмæй министрадæн ацы аз лæвæрд æрцыд 22 квотæйы, 35 рауагъдоны та балæвæрдтой исæн къамисмæ куырдиæттæ. Уыдонæй конкурсы фæлгæтты æвзæрст æрцыдысты 22 иууыл хуыздæр рауагъдоны æмæ ахуыр кæн-дзысты Уæрæсейы уæлдæр ахуыргæнæндæтты. Кæй зæгъын æй хъæуы, нæ рауагъдонты ‘хсæн разыны ахæмтæ, кæцытæ тынг зынтæй сфæразынц ахуыры процесс. Уыдон сæ ахуыр ныууадзынц æмæ фæстæмæ æрыздæхынц нæ республикæмæ. Фæлæ ахæм цаутæ иугæйттæ вæййынц. Æмткæй сисгæйæ, нæ рауагъдонтæй баззайынц райгондæй. Уыдон сæ ахуыры фæстæ æрыздæхынц цæттæйæ. Æмæ ахæм цæттæ кадрты фæрцы та министрады бирæ здæхтытæ фæхуыздæр сты.
Нæ республикæйы рауагъдонтæ фæстаг цалдæр азы се ‘фсæддон цæттæдзинад фæхуыздæр кæныны тыххæй ацæуынц Уæрæ-сейы Федерацийы Хъахъхъæнынады минист-рады ахуыргæнæндæттæм æфсæддон дæсныйæдтæ райсыны тыххæй. Министрады ны-мæрдар Сиукъаты Вадим куыд фехъусын кодта, афтæмæй ацы аз министрадæн лæвæрд æрцыд 91 лимиты. Уыцы лимиттæм гæс-гæ рауагъдонтæ æрвыст æрцæудзысты алы æмæ алыгъуызон æфсæддон ахуыргæнæ-ндæттæм. Ацы аз фыццаг хатт нæ респуб-ликæйы Хъахъхъæнынады министрад райста 2 бынаты «Æфсæддон дирижер»-ы дæсны-йадмæ.
«91 бынатмæ цæуынц 105 рауагъдоны, уыдоны ‘хсæн сты чызджытæ дæр, кæцытæ бирæ хуыздæр дæттынц нормативтæ. Æф-сæддон ахуыргæнæндонæй дарддæр ма æр-витæм ахуыр кæнынмæ Æфсæддон ака-демимæ дæр. Алы аз дæр уырдæм æрвитæм 4 рауагъдоны. Кæй зæгъын æй хъæуы, æнæ проблемæ нæ вæййæм, уæлдайдæр та фыц-цаг курсы, цалынмæ не ‘рцахуыр вæййынц, уæдмæ. Уыцы проблемæтæ дæр аскъуыддзаг кæнæм æмæ куыдфæстагмæ райгондæй баззайæм нæ рауагъдонтæй. Уыдон ахуыры рæстæджы равдисынц тынг хорз æнтыстытæ, кæй зæгъын æй хъæуы, уый махæн вæййы æхсызгон»,- банысан кодта Сиукъаты Вадим. Не ‘мбæстæгтæй æфсæддон ахуыргæнæндæтты рауагъдонтæ чи свæййы, уыдон райсынц лейтенанты ном æмæ службæ кæнынмæ бацæуынц республикæйы Хъахъхъæнынады органтæм. Уый ма куыд загъта, афтæмæй иунæг æфсæддон ахуыргæнæндоны рауагъ-дон дæр æгуыстæй нæ баззайы. Афтæ ма 30 афицеры, кæцытæ систы Уæрæсейы Уæлдæр æфсæддон ахуыргæнæндоны рауагъдонтæ, бацыдысты нæ республикæйы уæвæг 4 æфсæддон базæмæ афицерты бынæтæм.
ТАНДЕЛАТЫ Виленæ
Comments are closed, but trackbacks and pingbacks are open.