«Митын дада» -Дменисы рæвдауæндоны

Ногазон бæрæгбонон мадзал хъæлдзæг æмæ цины æнкъарæнтимæ банысан кодтой Цхинвалы районы Дменисы хъæуы рæвдауæндоны сабитæ. Ногазон мадзал цæмæй зæрдæйыфæндиаг рауадаид, уый тыххæй хорз бацархайдтой рæвдауæндоны сæргълæууæг Джиоты Мананæ, методист Джиголаты Валентинæ, рæвдауæндоны хъомылгæнджытæ Цæлыккаты Лаурæ, Габойты Фатимæ, Куымæридтаты Виолетæ, Кокойты Зæринæ æмæ музыкæйы ахуыргæнæг Икъаты Ануси.

Бæрæгбонон мадзалмæ æрбацыдысты сывæллæтты ныййарджытæ æмæ стыр æхцон æнкъарæнтимæ кастысты, сывæллæттæ сæ ногазон бæрæгбон куыд нысан кодтой, уымæ.

Ногазимæ баст уыдысты, сывæллæттæ цы æмдзæвгæтæ бакастысты, æмæ цы зарджытæ сæххæст кодтой, уыдон. «Чызджыты кафт», «Хонгæ», «Ангелочек» æмæ æндæр кæфтытæ. Митын Дада æмæ Митын Чызг рахызтысты аив фæлыстæй Назбæласы цурмæ. Уыдон та уыдысты рæвдауæндоны кусджытæ Цæлыккаты Лаурæ æмæ Пухаты Лаурæ.

Зæрдæбын арфæтæ ракæныны фæстæ, акафыдысты сабитимæ Назбæласы алыварс æмæ хайад райстой чысыл инсценировкæты.

Сывæллæттæн зæрдæбын арфæтæ ракодта рæвдауæндоны сæргълæууæг Джиоты Мананæ.

«Æрбалæууыд Ног аз. Махæй алчидæр зæрдиагæй фенхъæлмæ кæсы ацы рæсугъд бæрæгбонмæ æмæ фæбæллæм, цæмæй Ног азы нæ бæллицтæ иууылдæр сæххæст уой, æрхæсса нын бирæ хæрзиуджытæ, æнæниздзинад æмæ сабыр цард. Ацы диссаджы бæрæгбоныл уæлдай цин фæкæнынц нæ чысыл хуртæ, уыдон фенхъæлмæ кæсынц алыгъуызон лæвæрттæм. Тынг фæцин  кæнынц  ногазон  Назбæласыл,  Митын Дада æмæ Митын Чызгыл. Куыд æрвылаз, афтæ та нæ рæвдауæндоны Митын Дада уыдис ацы хъæуы цæрæг, арæзтадон организаци «Бадо»-йы сæргълæууæг Уалыты Владислав. Æмæ йын нæ цæст уарзы æнæниздзинад, ног æнтыстытæ, амонд æмæ фæрныгад бинонты царды», – загъта Джиоты чызг.

Зæгъын хъæуы уый, æмæ ацы рæвдауæндоны сабитæн Уалыйы фырт, æрвылаз дæр канд ногазон лæвæрттæ нæ бакæны, фæлæ йæ саразыны инициатор дæр уыд йæхæдæг. Æмæ ныртæккæ ам хъæлдзæгæй сæ рæстæг фервитынц канд Дменисы хъæуы цæрджыты сабитæ нæ, фæлæ ма Сатихъар, Уанат, Дисеу æмæ Сацхены хъæуы цæрджыты сабитæ дæр.

Ногазон арфæтæ сабитæн ракодта Владислав йæхæдæг дæр. Йæ цæст сын бауарзта, цæмæй хъомыл кæной æнæ-низæй, хæсты тасдзинад макуы  бавзарой. Мадзал цымыдисон кæй уыд, уый тыххæй хъомылгæнджытæн  зæрдæбынæй уыдыс-ты йæ арфæтæ Владиславæн дæр.

БЕСТАУТЫ Валя