Ногазон концерт

Афæдзы кæрон ахуырадон уагдæтты уагъд фæцæуынц алыгъуызон мадзæлттæ, хатдзæгтæ арæзт фæцæуынц азы дæргъы бакæнгæ куыстæн. Иу ахæм ногазон хыгъдон мадзал уагъд æрцыд Тедеты Георгийы номыл фыццæгæм музыкалон скъолайы. Традицион ссис ацы скъолайы æрвылаз дæр ахæм ногазон концерттæ уадзын.

Ногазон концертмæ æрбамбырд сты ацы скъолайы æмæ музыкалон ахуыргæнæндоны ахуыргæнджытæ, ахуыргæнинæгтæ, сывæллæтты ныййарджытæ. Мадзалмæ фæуазæг сты РХИ-йы Культурæйы министрады сæйраг специалист Наталья Жуйкова, горæт Цхинвалы администрацийы культурæ, фæсивæд æмæ спорты управленийы хистæры хæдивæг Цхуырбаты Полинæ, афтæ ма æндæр уазджытæ дæр.

Ногазон концерты хайад райстой музыкалон скъолайы фортепиано, хор, скрипкæ,  аккордеон, вокалон æххæсткæнынады, домра, ирон фæндыр, духовон инструментты хайады хъомылгæнинæгтæ. Мадзал амыдта ацы скъолайы ахуыргæнæг, РХИ-йы сгуыхт ахуыргæнæг Котолиты Тамарæ. Уый арфæ ракодта æрæмбырдуæвджытæн æрбалæугæ Ног азы цытæн æмæ бахатыд, цæмæй ссыгъдтаиккой ногазон Наз бæлас. Бæрæг-бонон хыгъдон концерт байгом  кодтой кæстæр кълæсты иумиагскъолайон хоры хайадисджытæ, РХИ-йы сгуыхт ахуыргæнæг Тасойты Валентинæйы къухдариуæгадæй. Уыдон сæххæст кодтой фондз зарæджы – «Уарзæм мах зарын», «Листья желтые», «Песенка о капитане», «Кашалотик» æмæ «Новый год».  Хоры солисткæ уыд Гæззаты Эмилия. Уый фæстæ æрæмбырдуæвджыты раз сæ арæхстдзинад равдыстой ацы скъолайы иннæ хайадты хъомылгæнинæгтæ. Уæлдай тынгдæр сценæмæкæсджыты зæрдæмæ фæцыдысты Чилæхсаты Линæ (скрипкæ), Дудайты Константин (духовон инструментты хайад),  Савицкий Максим (аккордеон), Гæджиты Кирæ (фортепиано), Джиоты Анитæ (фортепиано), Плиты Аннæ (фортепиано), Гуыцмæзты Арианнæ (ирон фæндыр). Хорз азарыдысты Наниты Нинæ, Гæззаты Эмилия, Гатыгкоты Линæ, Коцты Бэллæ, Гуыбеты Виктория. Сæ рæсугъд зардæй ма сценæмæкæсджыты сæхимæ æркæсын кодтой академион вокалы ансамблы хайадисджытæ Дзæгъиаты Альвинæ, Хаситы Линæ, Гæбæраты Дианæ æмæ Гасситы Нинæ (сæххæст кодтой зарæг «Каникулы»). Афтæ ма хорз азарыдысты ансамблы 6-æм къласы ахуырдзаутæ Гæззаты Аленæ æмæ Козаты Дианæ, уыдон та сæххæст кодтой «То не ветер ветку клонит». Уалыты Виктория та тынг хорз азарыд «Пусть всегда будет солнце». Зарæг залы бадджыты зæрдæмæ афтæ тынг фæцыд, æмæ уыдон дæр зарыдысты йемæ. Тынг хорз сæххæст кодтой сæ номыр Плиты Аннæ æмæ Плиты Мурат. Аннæ цагъта фортепианойыл æмæ Мурат та – ирон фæндырыл. Банысан кæнын хъæуы уый дæр, æмæ Плиты Мурат кæй у ацы скъолайы раздæры хъомылгæнинаг. Уый Санкт-Петербурджы музыкалон консерватори каст фæуыны фæстæ æрыздæхт йæ райгуырæн Цхинвалмæ æмæ кусын райдыдта, йæхæдæг кæм ахуыр кодта, уыцы музыкалон скъо-лайы. Сывæллæттæн амоны ирон фæндырыл цæгъдын.

Концерты кæрон йæ номыр тынг хорз сæххæст кодта музыкалон скъолайы 3-аг къласы ахуырдзау, дунеон конкурс «Истоки»-йы 1 премийы лауреат Зассеты Максим. Уый азарыд зарæг «Цвети земля моя». Йæ сæххæстгонд номыр афтæ тынг фæцыд æрæмбырдуæвджыты зæрдæмæ, æмæ йын дæргъвæтин рæстæджы æмдзæгъд кодтой. Æмæ, æцæгæйдæр, Зассеты Максимы æмæ иннæ хайадисджыты хуызæн кæстæртæ цы адæмæн, бæстæйæн ис, уымæн ис хорз фидæн. Максимæн алывæрсыг у йæ курдиат. Рæхсы зарынмæ, æмдзæвгæтæ кæсынмæ æмæ афтæ дарддæр. Курдиатджын сты иннæ сывæллæттæ дæр. Ирдæй зыны, сæ ахуыргæнджытæ, уагдоны директор, РХИ-йы сгуыхт ахуыргæнæг Тедеты Маринæйы сæргълæудæй семæ æвæллайгæ куыст кæй кæнынц, уый. Æмæ сын æрвылаз дæр  ахæм концерттæ свæййынц сæ куыстæн фæстиуджытæ саразыны хуызæн. Куыд æрвылаз, афтæ та ныр дæр скъолайы директор Тедеты Маринæ уагдоны хъомылгæнинæгтæн бакодта ногазон лæвæрттæ.

ЧЕРТХЪОТЫ Жаннæ