21-æм июнæй 28 июнмæ Хуссар Ирыстоны территорийыл æрцыдис иу фыдракæнд. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымæй уæлдай ма республикӕйы фӕндӕгтыл ӕрцыд æхсæз фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой цыппар адæймаджы.
Алыгъуызон бархалыны фӕдыл бӕрндзинадмӕ конд ӕрцыдис иу адӕймаг.
Фæндагон змæлды æдасдзинады инспекци къуырийы дæргъы сбæлвырд кодта 286 фæткхалæн цауы. Уыдонæй 18 уыдысты нозтджынæй машинæ скъæрыны цаутæ.
Милицийы наркотикты ӕрзылдыл контроль кӕныны управленийы кусджытӕ 21 июны оперативон информацийы фæстиуæгæн басгæрстой 27-аздзыд горæттаг цæрæджы хисæрмагонд хæдзар æмæ цæхæрадоны ссардтой цыппар гæны къутæры. Слестгæнæн управленийы ацы æмбæстагыл конд æрцыдис уголовон хъуыддаг. Уымæй уæлдай ма баурæдтой нæ горæты 32-аздзыд цæрæджы, кæцы спайда кодта наркотикон буарад «Морфинæй» æмæ йæ горæт Цхинвалы тæрхондон фæивар кодта 10 мин сомы.
Горæт Цхинвалы милицийы управленийы фæдагуырды кусджытæ баурæдтой нæ горæты 38-аздзыд цæрæджы, кæцы æнæзакъонæй спайда кодта медицинон препарат «Лирикайæ». Тæрхондон фæткхалæджы фæивар кодта.
24 июны горæты милицийы хайадмæ фехъусын кодтой, зæгъгæ Лужковы уынгыл хисæрмагонд хæдзары ссардтой 27-аздзыд чызджы мардæй. Куыд рабæрæг, афтæмæй ацы æмбæстаг йæ цардыл йæ къух йæхæдæг систа æмæ цæуынц фæдагурæн куыстытæ, цæмæй сбæрæг кæной ахæм æнамонд хъуыддаг саразыны аххосæгтæ.
26 июны Ленингоры районы Салбиеры хъæуы арæнхъахъхъæнджытæ баурæдтой ацы районы Цирколы хъæуы 60-аздзыд цæрæджы, кæцы æнæзаконæй æрбахызт паддзахадон арæны сæрты. Фæткхалæг конд æрцыд карантинмæ 14 боны æмгъуыдмæ.
Comments are closed, but trackbacks and pingbacks are open.