Къуырийы цаутыл афæлгæст

Информацион агентад «Спутник-Южная Осетия»-йы пресс-центры уагъд æрцыд  нæ Республикæйы  информаци æмæ мыхуыры паддзахадон комитеты сæргълæууæг Хъотайты Марияйы радон брифинг. Фыццаджыдæр Хъотайты Мария информацион фæрæзты минæвæрттæн радзырдта, ныртæккæ нæ республикæйы амалиуæггæнджытæ сæ хæлцадон продукттæ Уæрæсейы таможнæйыл  уадзыны фæдыл цы проблемæтыл æмбæлынц, уый фæдыл. «Нæ республикæйы иуæй-иу министрадты минæвæрттæ æмæ нæ Парламенты депутаттæ фембæлдтытæ уадзынц нæ республикæйы амалиуæггæнджытимæ. Азы райдианы уавæр фæвазыгджындæр, Уæрæсейы Федераци æмæ Хуссар Ирыстоны таможнæйы органты  интеграцийы тыххæй сразыдзинады фыст домæнты æнæмæнг сæххæст кæнын кæй хъæуы, уый тыххæй. Сразыдзинадыл къухтæ фыст æрцыд 2016 азы, æмæ, æвæццæгæн, цæмæй æппæт ацы проблемæтыл абон ма дзырдтаиккам, уый тыххæй сæ скъуыддзаг кæнын хъуыд уыцы рæстæджы. Нæ республикæйы Парламенты депутатты иу къорд, Цæгат Ирыстоны таможнæйы кусджытæн фехъусын кодта, сæвзæргæ уавæр кæй у карз æмæ райсын кæй хъæуы æмбæлон мадзæлттæ. Республикæйы Президент Бибылты Анатоли йæ кусæгон балцы рæстæджы Мæскуыйы фембæлдзæн компетентон органты кусджытимæ, цæмæй ацы фарст æвæрццагæй скъуыддзаг æрцæуа», – банысан кодта Хъотайты Мария.

Брифингы рæстæджы ма Мария загъта, зæгъгæ, кæд цалдæр къуырийы размæ нæ магазинтæ цухдзинад æййæфтой хъæуæг продукттæй, уæд  ныртæккæ  та фенæн ис, ацы проблемæ иуварс кæй æрцыд æмæ уый та ууыл дзурæг у, æмæ нæ республикæйы политикты иу къорд ацы фарст аскъуыддзаг кæныны фæдыл сæ уæрæсейаг коллегæтимæ цы бадзырдтæ уагътой, уыдон æвæрццагæй æххæст кæй цæуынц.

ФЫДЫБÆСТÆ ХЪАХЪХЪÆНÆДЖЫ БОН

Аивгъуыйгæ къуырийы нæ Республикæйы Фыдыбæстæ хъахъхъæнæджы бон нæ æмбæстæгтæ банысан кодтой  цытджын æгъдауæй.Уымæн æмæ нæ республикæйы ахæм бинонтæ стæм ис, фы-дыбæстæйы хъахъхъæнæг кæм нæй æмæ нæ уыд. Уыцы бон ма нæ республикæ банысан кодта РХИ-йы Хъахъхъæнынады министрады сырæзтыл 27 азы сæххæсты бон. Нæ Хъахъхъæнынады министрады дæлхæйттæ сæ хæстон цæттæдзинад æвдыстой нæ республикæйы уæвæг  полигонты æмæ сын сæ цæттæдзинадæн саргъ кодта нæ республикæйы Сæйраг командæгæнæг Бибылты Анатоли. Президент банысан кодта, зæгъгæ, иннæ азтимæ абаргæйæ, æфсæддонты цæттæдзинад бирæ хуыздæр у. Æфсæддон ахуыртæ уагъд цыдысты нæ республикæйы уæвæг Уæрæсейы Федерацийы Хъахъхъæнынады министрады 4-æм æфсæддон базæйы службæгæнджытимæ иумæ. Хъотайты Мария куыд банысан кодта, афтæмæй ацы аз  НАТО-йы æфсæдтæ сыхаг Гуырдзыстоны территорийыл уадздзысты стыр масштабон  хæстон ахуыртæ ахæм номимæ: «Европæйы хъахъхъæнджытæ». Ацы ахуырты хайад райсдзысты 20 мин америкæйаг æфсæддоны бæрц. НАТО-йы æфсæддон ахуыртæ Гуырдзыстоны уагъд фæцæуынц æрвылаз дæр. Республикæ Хуссар Ирыстоны арæнтæ хъахъхъæд цæуынц æмæ сты æдас.

КОРОНАВИРУС

Гуырдзыстоны Æнæниздзинад хъахъхъæныны министрад фехъусын кодта, зæгъгæ сæ республикæйы рабæрæг ацы вирусæй рынчын адæймаг. Уый æрцыд изоляцигонд æмæ ис дохтырты хъусдарды бын. Уымæ гæсгæ нæ республикæйы къухдариуæгад райстой профилактикон мадзæлттæ, цæмæй ацы вирус нæ республикæйы ма апарахат уа.  Куыд грипп, афтæ ацы коронавирусæн  дæр ис хосгæнæн. Нæ республикæйы Æнæниздзинад хъахъхъæныны министрад æмæ «Югосетпотребнадзор»-ы рекомендацитæ æххæст кæнгæйæ, хи бахизæн ис вирустæй. Оперативон æгъдауæй Гуырдзыстон æмæ нæ республикæйы ‘хсæн арæнтæ æхгæд æрцыдысты.

АХУЫРАД ÆМÆ ХЪОМЫЛГÆНИНÆГТÆ

Нæ Республикæйы æрдæг азы размæ баконд æрцыд менталон арифметикæйы скъола. Уымæн ныридæгæн ис æвæрццаг фæстиуджытæ.Уыцы скъолайы ахуыргæнинæгтæ ныртæккæ дæр равдыстой хорз æнтыстдзинæдтæ. Ацы мæй Мæскуыйы уагъд æрцыд ерыстæ менталон арифметикæйæ. Уым хайад райстой 500 ахуыргæнинагæй фылдæр, уыдоны ‘хсæн нæ республикæйæ 11 ахуыргæнинаджы. Уыдон  систы ерысты æвзонг призертæ. Ерыстæм ацæуыны хъуыддаджы сын егъау æххуыс бакодта нæ республикæйы Президент Бибылты Анатоли. Ацы скъолайы ахуыр кæнынц 100 ахуыргæнинаджы бæрц.

Нæ республикæйы æвзонг зарæггæнæг Плиты Олег ссис Æппæтдунеон вокалон конкурс «Хрустальный микрофон-Дети»-йы лауреат, кæцы уагъд цыд Санкт-Петербурджы. Афтæ ма Европæйы уæгъдибар хъæбысхæстæй уагъдцæуæг чемпионаты Уæрæсейы æмбырдгонды  сæйраг тренер Тедеты Дзамболаты хъомылгæнинæгтæ райстой паддзахадон хорзæхтæ.

ТАНДЕЛАТЫ Виленæ