Куыд зонæм афтæмæй 28-æм июны президент Гаглойты Алан инспекцион азылд сарæзта Республикон бирæпрофилон медицинон центры. Йемæ ма уыд Парламенты социалон политикæ æмæ æнæниздзинад хъахъхъæнæн комитеты сæргълæууæг Плиты Александр.
Бирæпрофилон медицинон центры куысты уавæримæ базонгæйæ уый йæхи цæстæй федта рынчынтæн медицинон лæггæдтæ бакæнын цы æмвæзадыл ис, медицинон ифтонгады куыстхъомдзинад реанимаци æмæ анестезиологийы блоктæ куыд кусынц, афтæ ма цы уавæрты хос кæнынц стационарон уагдæтты. Уый адыл медицинон бирæпрофилон центры рабæрæг ис, поликлиникæ æмæ стационары рентгенисæн аппарат ныр æртæ азы хæлд кæй у.
Æмæ мæнæ ацы къуыри, дыццæджы Республикон бирæпрофилон медицинон центры рентгенисæн хайады сæргълæууæг Саулохты Георги фехъусын кодта журналисттæн, зæгъгæ, скуыста стационарон рентгены аппарат. «Рентгенисæн аппараты куысты уыд бирæ згъуыдтытæ, йæ программæ схæццæ, нæ куыстой йæ лабораторон компьютертæ. Къуырисæры нæ специалист аиуварс кодта уыцы техникон рæдыдтытæ æмæ ныр рынчындоны æртыккæгæм уæладзыгыл кусы рентген аппарат», – загъта рентгенисæг дохтыр.
Саулохты лæппу ма куыд загъта, афтæмæй ацы аппарат рентгенон нывтæ иста артефактимæ, пленкæ лæвæрдта мæгуырау негативтæ. Уый ма зындзинæдтæ æвзæрын кодта диагноз аразынæн. Информаци радтынæн эффективон кæй нæ уыд, уый тыххæй пленкæ уагътой æндæр аппаратыл. Ныр аппарат сцалцæг кодтой æмæ йыл кусдзысты. «Фæлæ нæй афтæ зæгъæн, ома, нæ куыстам. Сывæллæтты поликлиникæйы цы рентген аппарат ис, рынчынтæ иу бацыдысты уырдæм æмæ сын уым арæзтам нывтæ», – загъы ма уый.
Ныртæккæ РБМЦ-йы ис 800-мæ æввахс рентгенисæн пленкæйы, уыдон фаг кæнынц æрмæстдæр æртæ мæйы куыстæн.
