Республикон медицинон бирæпрофилон центры рынчынтæн медицинон æмвæзад цахæм у, куыд ифтонг сты нырыккон медицинон ифтонггæрзтæй æмæ ма аскъуыддзаг кæнинаг цахæм фарстатæ ис, уыдонимæ, ардæм бацæугæйæ, зонгæ кодта РХИ-йы Президент Бибылты Анатоли. Йемæ ма уыд æнæниздзинад хъахъхъæнын æмæ социалон рæзты министр Тотчиты Георги.
Райдианы уыдон бацыдысты сывæллæтты рынчындонмæ. Ам æвæрд æрцыд ног лабораторион ифтонгад. Раздæр медицинон кусджытимæ йæ фембæлды рæстæджы Президент бахæс кодта, цæмæй уыцы ифтонгад æвæрд æрцæуа 15 маймæ.
Æмæ ныр, Тотчиты Георги куыд загъта, афтæмæй лабораторийы кусы туджы биологион анализатор, гематологион анализатор, афтæ ма туджы газтæ бæрæггæнæг анализатор, кæцы уыдзæн реанимацион хайады. Президент бацымыдис кодта, лабораторион диагностикæйæн æнæмæнгхъæуæг чи сты, ахæм реагенттæй ифтонг сты æви нæ, уымæ. Министр куыд загъта, афтæ сæм реагенттæ кæддæриддæр вæййы. Уыимæ ма банысан кодта, зæгъгæ, медицинон центры ныртæккæ цы аппаратурæ ис, уыдон иууылдæр кусынц нывыл.
Бибылты Анатоли базонгæ ис сывæл-лæтты поликлиникæйы куыстуаты уавæр-тимæ дæр. Республикон медицинон бирæпрофилон центры сæйраг дохтыры хæдивæг Джиоты Луизæ паддзахады сæргълæууæгæн фенын кодта сывæллæттæн физиотерапи, массажы сеанстæ, хосгæнæн физкультурæтæ кæм уадзынц, уыцы хатæнтæ, афтæ ма бассейн дæр.
«Ам церребралон æндзыгнизæй рынчын сывæллæттæн ауадзынц æппæт æнæмæнгхъæуæг процедурæтæ, фæленк кæнынц. Бассейны дон ивæм æрвылбон дæр, æмбæлон температурæйы онг æй схъарм кæнæм. Афтæ ма махмæ ис зал, цыран сывæллæттæ аразынц физкультурæ», – загъта дохтыры хæдивæг.Йæ ныхæстæм гæсгæ, раздæр ахæм процедурæтæ уадзыны тыххæй ныййарджытæ сæ сывæллæтты ластой республикæйæн æдтæмæ. Ныр, зæгъгæ, уыцы процедурæтæн уадзæн ис нæхимæ дæр. Уый ма ракой кодта ахæм проблемæйы тыххæй, зæгъгæ, церебралон æндзыгнизæй рынчын сывæллæттимæ гъæдджынæй кусыны тыххæй – уыдон та сты 40 сывæллонæй фылдæр æмæ сæ хъæуы сæрмагонд костюм, кæцыйы руаджы ахуыр кæниккой цæуын.
«Ахæм костюмы сывæллон вæййы лæугæйæ æмæ сæ хæцъæфтæ фæкусынц. Фæлæ у зынаргъ», – загъта Джиоты чызг. Президент куыд загъта, афтæмæй ацы фарстыл хъæуы бакусын æмæ йæ аскъуыддзаг кæнын.
Дарддæр паддзахады сæргълæууæг бацыд гемодиализы хайадмæ, кæцы кусын райдыдта æрæджы. Хайады сæргълæууæг Джиоты Мадинæйы ныхæстæм гæсгæ ма æрæджыйы онг дæр гемодиализы проце-дурæмæ пациенттæ цыдысты республи-кæйæн æдтæмæ. Уый куыд загъта, афтæмæй пациенттæ процедурæтæ аразынц къуыри æртæ хатты. Иу процедурæ аххæссы æртæ сахаты. «Уымæ гæсгæ рæстæгыл медицинон æххуыс райсыны тыххæй уыдоны хъуыд республикæйæ æдтæмæ ацæуын», – загъта уый.
Куыд ма банысан кодта, афтæмæй хайады хыгъды лæууынц 19 адæймаджы, уыдонæй абоны бонмæ процедурæ регулярон æгъдауæй рацæуынц 10 адæймаджы.
Президент азылд медицинон кластеры иннæ хайадтыл дæр. Базонгæ ис, æрæджы республикон рынчындонмæ раконд чи ‘рцыд, уыцы горæтон поликлиникæйы дохтырты куысты уавæртимæ дæр. Дохтырты ныхæстæм гæсгæ, сæ рацыд ардæм хорзæрдæм бандæвта пациенттыл, уымæн æмæ сæ дыууæрдæм нал хъæуы рацу-бацу кæнын алыгъуызон процедурæты тыххæй.
Горæтон поликлиникæйы сæйраг дохтыр Санахъоты Тамарæ куыд радзырдта, афтæмæй сын ныр фадат ис флюрографи, рентген, маммографи, гастроскопи саразынæн фæзындысты ног биохимион анализатор æмæ компьютерон томограф.
Кæронбæттæны Президент бацыд ног цалцæггонд тубдиспансермæ æмæ ам дæр базонгæ медперсоналы куысты уавæртимæ.
РХИ-йы Президент æмæ Хицауады пресс-службæ
Comments are closed, but trackbacks and pingbacks are open.