Президент Гаглойты Алан республикæйы адæммæ æмæ Парламентмæ цы Ныстуан сарæзта, уым ахсджиагдæр фарстатæй сæ иу уыд Æнæниздзинад хъахъхъæнынады цы цухдзинæдтыл æмбæлæм, æмæ сæ рарасткæныны тыххæй цахæм мадзæлттæ хъæуы райсын, уыдоны тыххæй. Профилон министры хæдивæг Сиукъаты Родион æмæ республикæйы районты рынчындæтты хистæр дохтыртæ сæ иумæйаг пресс-конференцийы, банысан кодтой, зæгъгæ, нырæй фæстæмæ республикон рынчындоны туджы анализтæ ист цæудзысты райсомы аст сахатæй. Ацы фарст куыд æххæст цæуы, уый базонынæн нæ уацхæссæг фембæлд рынчындоны лабораторийы медперсоналимæ.
Аст сахат дæр нæма уыдис, афтæмæй уым уыдтæн. Æнхъæл уыдтæн баййафдзынæн дзы бирæ адæм, фæлæ дзы уыдис æрмæст лабораторийы кусджытæ. Ме ‘рбацыды нысан куы базыдтой, уæд загътой, зæгъгæ, ахæм режимыл кусынц цалдæр боны, фæлæ абон туджы анализ радтыны тыххæй аст сахатмæ ничи æрбацыд.
Лабораторийы куысты режим нырма æрæджы кæй раивтой, уымæ гæсгæ йæ, чизоны, адæм нæма фехъуыстой.
«Ис ма æндæр къуыхцыдзинад дæр. Цæвиттон, хайады дохтырты куыст райдайы фараст сахатæй æмæ цæмæй рынчын адæймаг ратта туджы анализ, уый тыххæй дохтырæй хъуамæ райса здæхты гæххæт (направление). Æнæ уыцы гæххæттæй та бар дæр нæй анализ радтынæн æмæ йæ аразгæ дæр ничи скæндзæн», – банысан кодтой лабораторийы кусджытæ.
Ацы фарст æрбæстон кæнын бирæ тыхтæ нæ домы, фæлæ кæцыфæнды чысыл хъуыддаг саразыныл дæр куы нæ бацархайай, уæд йæхи гъæдæй никуы сырæзы. Уырнинаг у, уац мыхуыры куы рацæуа, уæд уавæр хорзæрдæм кæй фæивдзæнис æмæ фарст скъуыддзаг кæй æрцæудзæнис, уый.
Гæззаты Иван
